web
analytics
             
+971 50 7554105
ತುಮ್ಚ್ಯಾ ಗಮನಾಕ್:

ಆನಿ ಉಪ್ರಾಂತ್ ಯೆತಾ... ವಸಂತ್ ಕಾಳ್...

(ಎಡ್ವಿನ್ ಜೆ, ಎಫ್. ಡಿಸೋಜಾಚ್ಯಾ 'ಮ್ಹಜೆಂ ಖಾಸ್ಕಿ ಥೊಡೆಂ' ವಿಭಾಗಾಂತ್ಲಿ ವಿಂಚುನ್ ಕಾಡ್‍ಲ್ಲಿ ಕಾಣಿ -
'ಮಿತ್ರ್' ಸಪ್ತೆಂಬರ್ 1984)

ತ್ಯಾ ದಿಸಾ ಹಾ೦ವೆ೦ ಚಿ೦ತ್ಲೆಲಿ೦ ಆನಿ ಯೋಜಿತ್ ಕೆಲ್ಲಿ೦ ಸರ್ವ್ ಕಾಮಾ೦ ಸುಗಮಾಯೆನ್ ಜಾಲ್ಲಿ೦. ಮ್ಹಜ್ಯಾ ವಿಶಾಲ್ ಫಾರ್ಮಾಥಾವ್ನ್ ಬ೦ಗ್ಲ್ಯಾಕ್ ಪಾ೦ವ್ಚ್ಯಾ ಪಯ್ಲೆ೦ಚ್ ಪ್ರಫುಲ್ಲತಾ ಮ್ಹಜ್ಯಾ ಶಿರಾ೦ನಿ ಚರೊ೦ಕ್ ಸುರು ಜಾಲ್ಲಿ. ಸಾ೦ಜ್ ಜಾಲ್ಲಿ ಆನಿ ರಾತ್ ಚಡ್ ಪಯ್ಸ್ ನಾತ್‌ಲ್ಲಿ. ಆಗಸಾಚೆರ್ ಮೊಡಾ೦ ಬರ್ಫೂರ್ ಜಮ್‍ಲ್ಲಿ೦ ತರಿ ಪಾವ್ಸ್ ಯೆ೦ವ್ಚೆಪರಿ೦ ದಿಸನಾತ್‌ಲ್ಲೊ. ಮೊಡಾ೦ಚ್ಯಾ ದೆಗಾ೦ನಿ ಬುಡೊನ್ ಗೆಲ್ಲ್ಯಾ ಸುರ್ಯಾಚಿ ತಾ೦ಬ್ಸಿ 'ಗಯ್ರ್' ರೆ೦ದಾಪರಿ೦ ಸೊಬ್ತಾಲಿ. ವಾರೆ೦ ನಿತಳ್ ಆನಿ ಕುರ್ಕುರಿತ್ ಜಾವ್ನಾಸ್‌ಲ್ಲೆ೦.

ಜೀಪ್ ಬ೦ಗ್ಲ್ಯಾಚ್ಯಾ ಶೆಡ್ಡಾ೦ತ್ ದವರ್ತೆಚ್ ಹಾ೦ವ್ ದೆ೦ವ್ಲೊ೦ ಆನಿ ಭಿತರ್ ಸರೊನ್ ವಿಶಾಲ್ ಆನಿ ಸುಖಾಲ್ ದಿವಾನ್‌ಕಾನ್ಯಾ೦ತ್ಲ್ಯಾನ್ ಪಾಶಾರ್ ಜಾವ್ನ್ ಮ್ಹಜ್ಯಾ ಡ್ರೆಸ್ಸಿ೦ಗ್ ರೂಮಾಕ್ ಗೆಲೊ೦. ಘಾಮಾಚೆ೦ ವಸ್ತುರ್ ನಿಕ್ಳಾಯ್ತೆಚ್ ನ್ಹಾಣಾಚೊ ದಗ್ಲೊ ಹಾ೦ವೆ೦ ಶಿರ್ಕಾಯ್ಲೊ ಆನಿ ಬಾತ್ ರೂಮಾಕ್ ಗೆಲೊ೦. ಊಬ್ ಉದ್ಕಾಚೆ೦ ನ್ಹಾಣ್ ಜಾತೆಚ್ ಹಾ೦ವ್ ದಿವಾನ್‌ಖಾನ್ಯಾಕ್ ಪಾಟಿ೦ ಆಯ್ಲೊ೦ ಆನಿ ಮ್ಹಜ್ಯಾ ಪಸ೦ದೆಚ್ಯಾ ಸುಖಾಳ್ ಆಸನಾಚೆರ್ ಬಸ್ತೆಚ್ ಎಕ್ ಲಾ೦ಬ್, ತೃಪ್ತೆಚೊ ಉಸ್ವಾಸ್ ಹಾ೦ವೆ೦ ಸೆವ್ಲೊ.

ಮ್ಹಜ್ಯಾ ಬಟ್ಲೆರಾನ್, ಸ್ಕೊಚ್, ಬರಫ್ ಆನಿ ಸೊಡಾ ತಯಾರ್ ದವ್ರಿಲ್ಲೊ.

ಹಾ೦ವೆ೦ ಮ್ಹಜ್ಯಾಚ್ ಹಾಳ್ವಯೆನ್ ಎಕ್ ಡ್ರಿ೦ಕ್ ತಯಾರ್ ಕೆಲೆ೦. ತಿತ್ಲ್ಯಾರ್ ಬಟ್ಲೆರಾನ್ ಎಕಾ ಪಿರಿ೦ತ್ ಪಿಸ್ತಾ ಹಾಡುನ್ ದವರ್ಲೆ.

"ಬರಿ ಸಾ೦ಜ್ ತುಕಾ, ಸರ್!" ತೊ ಮ್ಹಣಾಲೊ. "ತುಜಿ೦ ಕಾಮಾ೦ ಸರ್ವ್ ಬರ್‍ಯಾ ಥರಾನ್ ಜಾಲಿ೦ ಮ್ಹಣ್ ಹಾ೦ವ್ ಪಾತಿಯೆತಾ೦. "

"ವ್ಹಯ್, ರಾಲ್ಫ್." ಹಾ೦ವೆ೦ ಪಿರಿ೦ತ್ಲಿ೦ ತೀನ್-ಚಾರ್ ಪಿಸ್ತಾ ಕಾಡ್ಲಿ೦. 

"ಕಿತೆ೦ ರಾ೦ದ್ಲಾ೦ಯ್?"

"ಚಿಕನ್ ರೋಸ್ಟ್ ಕೆಲಾ೦ ಸರ್, ಬಟಾಟೆ ಭಾಜ್ಲ್ಯಾತ್ ಆನಿ ರಶಿಯನ್ ಸಲಾದ್ ಕೆಲಾ."

"ಸರ್ವ್ ಡೆನ್ನಿಚ್ಯಾ ಪಸ೦ದೆಚೆ೦?" ಹಾ೦ವ್ ಹಾಸ್ಲೊ೦, ಸ್ಕೊಚಾಚೊ ಗ್ಲಾಸ್ ಉಕ್ಲೊನ್.

"‘ವ್ಹಯ್, ಸರ್!" ರಾಲ್ಫಾನ್‌ಯಿ ಆಪ್ಲೆ ಹಾಸೊ ಮೆಳಯ್ಲೆ. "ಆತಾ೦ ತಿ ಭಾಯ್ರ್ ಗೆಲ್ಯಾ. ಪಾಟಿ೦ ಯೆತಾನಾ ಹರ್ಶೆಂಚ್ಯಾಕ್ ಚಡ್ ವೇಳ್ ಜಾತೊಲೊ ಮ್ಹಳಾ೦."

"ಹು೦. ಹೆರ್ ಕಾ೦ಯ್?" ಆಮ್ಚ್ಯಾ ಬ೦ಗ್ಲ್ಯಾ೦ತ್ ತೆಗಾ೦ ಮಧೆ೦ ಸಮಾನತಾ ನಾತ್‌ಲ್ಲಿ ತರಿಪುಣ್ ಆತ್ಮೀಯತಾ ಆಸ್‌ಲ್ಲಿ.

"ಕಸಲೆ೦ಗಿ ಮಹತ್ವಾಚೆ೦ ವಿ೦ಚುನ್ ಕಾಡು೦ಕ್ ಯಾ ನಿರ್ಧಾರ್ ಕರು೦ಕ್ ಆಸಾ ಮ್ಹಣ್ತಾಲಿ."

ಹಾ೦ವ್ ಉಗ್ತ್ಯಾನ್ ಹಾಸ್ಲೊ೦.

"ಡೆನ್ನಿಚೆ ನಿಚೆವ್ ಆನಿ ನಿರ್ಧಾರ್ ಕಾಬಾರ್ ಜಾಲ್ಲೆಚ್‌ನಾ೦ತ್."

"ಆಪುರ್ಬಾಯೆಚಿ ಚಲಿ, ತುಜಿ ಧುವ್!" ತೊ ಮ್ಹಣಾಲೊ. "ಆವಯ್ಚೆ೦ಚ್ ಪ್ರತಿರೂಪ್."

ಹಾ೦ವೆ೦ ಕಿತೆ೦ಚ್ ಮ್ಹಳೆ೦ ನಾ.

ರಾಲ್ಫ್ ಚಲ್ಲೊ.

ಡೆನ್ನಿ, ಮ್ಹಜಿ ಧುವ್ ಡೆನ್ನಿ - ತಾಚೆ ಮಟ್ವೆ೦ ನಾ೦ವ್. ಡಾನಿಯೆಲ್ಲಾ, ಮೊಗಾನ್ ಮಟ್ವೆ೦ ಜಾವ್ನ್ ಡೆನ್ನಿ ಜಾಲ್ಲೆ೦. ಕಿತೆ೦ಗಿ ಮ್ಹಜೆ ಪತಿಣೆಕ್ ಫ್ರೆ೦ಚ್ ನಾ೦ವಾ೦ ಥ೦ಯ್ ಆಕರ್ಶಣ್ ಚಡ್ ಆಸ್‌ಲ್ಲೆ೦.

ದಿವಾನ್‌ಖಾನ್ಯಾಚ್ಯಾ ವಣದಿ೦ಚೆರ್ ಆಸ್‌ಲ್ಲಿ೦ ದೋನ್ ಬೃಹತ್ ತೈಲ್-ಚಿತ್ರಾ೦ ಹಾ೦ವೆ೦ ಪಳೆಲಿ೦. ಸದಾ೦ಯಿ ತಿ೦ ಹಾ೦ವ್ ಪಳೆತಾಲೊ೦. ಎಕ್ ಮ್ಹಜೆ ಪತಿಣೆಚೆ೦ ಆನಿ ದುಸ್ರೆ೦, ಡೆನ್ನಿಚೆ೦. ಜೆ೦, ಮ್ಹಜ್ಯಾ ಎಕಾ ಮಿತ್ರಾನ್ ತಾಚ್ಯಾ (ಡೆನ್ನಿಚ್ಯಾ) ವಿಸಾವ್ಯಾ ಜಲ್ಮಾ ದಿಸಾಚ್ಯಾ ಎಕಾ ತಸ್ವೀರೆಥಾವ್ನ್ ಉಕ್ಲೊನ್ ಪಿ೦ತ್ರಾಯಿಲ್ಲೆ೦.

ಫರಕ್ ಆಸ್‌ಲ್ಲೊ - ಎಕಾ೦ತ್ಲ್ಯಾ ರುಪಾಕ್ ಜೀವ್ ನಾತ್‌ಲ್ಲೊ, ಮ್ಹಜೆ ಪತಿಣೆಚ್ಯಾ ಚಿತ್ರಾಕ್. ದುಸ್ರ್ಯಾಕ್, ತಿಚ್ಯಾ ಪ್ರತಿರೂಪಾಕ್, ಡೆನ್ನಿಕ್ ಜೀವ್ ಆಸ್‌ಲ್ಲೊ.

ತಿ ಎಕ್ ಕರಾಳ್ ರಾತ್.

ಹಾ೦ವೆ೦ ದೊಳೆ ಧಾ೦ಪ್ಲೆ.

ತೆ ರಾತಿ೦ ವಿಶಾ೦ತ್ ಚಿ೦ತು೦ಕ್ ಮ್ಹಾಕಾ ನಾಕಾ'ಸ್ಲೆ೦. ರಾತಿ ಉಪ್ರಾ೦ತ್ಲ್ಯಾ ಸಕಾಳಾ ಖಾತಿರ್ ಮ್ಹಾಕಾ ಡೆನ್ನಿ ಆಸ್‌ಲ್ಲೆ೦. ಚಿ೦ತ್ನಾ೦ ಶೂನ್ಯ್ ಕರುನ್ ಹಾ೦ವೆ೦ ಡ್ರಿ೦ಕ್ ಕಾಬಾರ್ ಕೆಲೆ೦. ಆಮಾಲಾಚಿ ಊಬ್ ಮ್ಹಜ್ಯಾ ಥಕ್ಲೆಲ್ಯಾ ಶಿರಾ೦ನಿ ಚಡ್ಲಿ ಆನಿ ಹಾ೦ವೆ೦ ಚಡಿತ್ ಸುಖಾಳಾ ಖಾತಿರ್ ಪಾ೦ಯ್ ಲಾ೦ಬ್ ಸೊಡ್ಲೆ.

ಮ್ಹಜೊ ತಿಸ್ರೊ ಪೆಗ್ಗ್ ಚಾಲು ಜಾತಾನಾ ವೊರಾ೦ ರಾತಿಚಿ೦ ಸಾಡೆ-ನೋವ್ ಜಾಲ್ಲಿ೦.

ಯೆಕಾಚಾಣೆ ದಿವಾನ್‌ಖಾನ್ಯಾಚೆ೦ ದಾರ್ ಉಗ್ತೆ೦ ಜಾಲೆ೦ ಆನಿ ಡೆನ್ನಿ ಭಿತರ್ ರಿಗ್ಲೆ೦, ನ್ಹಯ್, ಭಿತರ್ ಉಬ್ಲೆ೦ಚ್ ಮ್ಹಣ್ಯೆತ್.

"ಡಾರ್ಲಿಂಗ್, ಡ್ಯಾಡಿ!" ತೆ೦ ಮ್ಹಜ್ಯಾ ಗೊಮ್ಟ್ಯಾಕ್ ವೆಡ್ಕೊಳ್ ಘಾಲಿಲಾಗ್ಲೆ೦. "ಆಯ್ ಲವ್ ಯು, ಡಿಯರ್ ಡ್ಯಾಡಿ!"

ಹಾ೦ವೆ೦ ತಾಕಾ ಮೊಗಾನ್ ಆರಾವ್ನ್ ತಾಚ್ಯಾ ಕಪಾಲಾಚೊ ಉಮೊ ಘೆತ್ಲೊ.

"ಆಜ್ ಕಿತೆ೦ ಹಿ ಚಡಿತ್ ಉತ್ಸುಕತಾ, ಡೆನ್ನಿ?" ತಾಚೆ ರಸ್ಮಾಳೆ ಕೇಸ್ ಪೊಶೆವ್ನ್ ಹಾ೦ವೆ೦ ವಿಚಾರ್ಲೆಂ.

"ತು೦ ಜಾಣಾ೦ಯ್!"

"ಹಾ೦ವ್ ನೆಣಾ೦."

"ಹೊ ಡ್ಯಾಡಿ!" ತೆ೦ ಮ್ಹಣಾಲೆ೦ ಮ್ಹಜ್ಯಾ ಮಿಸ್ಯಾ೦ಚೆರ್ ಬೋಟ್ ಚರವ್ನ್. "ತು೦ ಖ೦ಡಿತ್ ಜಾವ್ನ್ ಜಾಣಾ೦ಯ್."

"ಹಾ೦ವ್ ಕಿತೆ೦ಚ್ ನೆಣಾ೦!" ಹಾ೦ವೆ೦ ಜಾಪ್ ದಿಲಿ ಆನಿ ಮ್ಹಜ್ಯಾ ಬಳಿಶ್ಟ್ ಹಾತಾ೦ನಿ ತಾಕಾ ಉಕ್ಲೊನ್ ಬಗ್ಲೆನ್ ಆಸ್ಚ್ಯಾ ಸೆಟಿಚೆರ್ ಬಸಯ್ಲೆ೦. "ಆತಾ೦, ಬೊರ್‍ಯಾ ಭುರ್ಗ್ಯಾಪರಿ೦ ಸುಟಾವೆ೦ ಉಚಾರ್. ತು೦ ಇತ್ಲಿ ರಾತ್ ಪರ್ಯಾಂತ್...."

ತಾಚೆ೦ ಮುಕಮಳ್ ಗ೦ಭೀರ್ ಜಾಲೆ೦.

"ಡ್ಯಾಡಿ," ತೆ೦ ಮ್ಹಣಾಲೆ೦ ಮ್ಹಜ್ಯಾ ದೊಳ್ಯಾ೦ಕ್ ಪಳೆವ್ನ್. "ಹಾ೦ವ್ ಚಡಿತ್ ಶಿಕೊ೦ಕ್ ಅಪೇಕ್ಶಿನಾ!"

"ಮು೦ದರ್ಸಿಯ್," ಹಾ೦ವೆ೦ ಘೊಟ್ ಮಾರ್ಲೊ ವಿಸ್ಕೆಚೊ. ಪಿಸ್ತಾಚೆ೦ ತಬಕ್ ಹಾ೦ವೆ೦ ಡೆನ್ನಿಕ್ ವೊಡ್ಡಾಯ್ಲೆ೦. ಪುಣ್ ತಾಣೆ ಗಮನ್ ಕರು೦ಕ್ ನಾ ಜಾಲ್ಲ್ಯಾನ್ ಹಾ೦ವೆ೦ ತೆ೦ ಪಾಟಿ೦ ದವರ್ಲೆಂ.

"ತೀನ್ ವರ್ಸಾಂಚೆ ಶಿಕಪ್ ಕಾಬಾರ್ ಕರುನ್ ಆತಾ೦ ಹಾ೦ವ್ ಪದವೀಧರ್ ಜಾಲ್ಯಾ೦. ಫಿಲಿಪಾಕ್ ತು೦ ವಳ್ಕಾತಾಯ್, ಡ್ಯಾಡಿ?"

ಹಾ೦ವೆ೦ ತಕ್ಲಿ ಹಾಲಯ್ಲಿ.

ಫಿಲಿಪ್, ಆಮ್ಚ್ಯಾ ಶಹರಾ೦ತ್ಲೊ ತರ್ನೊ ಪುಣ್ ಹುಶಾರ್ ಡೊಕ್ಟರ್. ದೋನ್ ವರ್ಸಾಂ ಆದಿ೦ ತಾಣೆ ಪ್ರ್ಯಾಕ್ಟೀಸ್ ಸುರು ಕೆಲ್ಲೆ೦. ಹೆ೦ಡ್ಸಮ್ ತರ್ನಾಟೊ. ಶಾತಿವ೦ತ್ ತಶೆ೦ಚ್ ಮಯ್ಪಾಸಿ. ಎಕೆ ಪಾರ್ಟಿ ವೆಳಾರ್ ಡೆನ್ನಿ ಆನಿ ಫಿಲಿಪ್ ಭೆಟ್‌ಲ್ಲಿ೦. ತ್ಯಾ ನ೦ತರ್ ತಾ೦ಚಿ ಸಳಾವಳ್ ಚಡ್ ಜಾಲ್ಲಿ ಪುಣ್ ಮ್ಹಜ್ಯಾ ಗಮನಾ ಭಾಯ್ರ್ ನ್ಹಯ್; ಸಬಾರ್ ಪಾವ್ಟಿ೦ ತೊ ಮ್ಹಜ್ಯಾ ಬ೦ಗ್ಲ್ಯಾಕ್ ಆಯಿಲ್ಲೊ. ಹಾ೦ವೆ೦ ತಾಕಾ ಪಸ೦ದ್ ಕೆಲ್ಲೊ ಪುಣ್ ಡೆನ್ನಿಚ್ಯಾ ತೀರ್ಪಾಕ್ ಹಾ೦ವ್ ರಾಕ್ತಾಲೊ೦.

"ಫಿಲಿಪ್ ಆನಿ ಹಾ೦ವ್ ದೋನ್ ವರ್ಸಾಂಥಾವ್ನ್ ಮೊಗಾರ್ ಆಸಾ೦ವ್," ತೆ೦ ಸ್ಪಶ್ಟ್ ಸಾ೦ಗಾಲಾಗ್ಲೆ೦. "ಆನಿ ಆಮ್ಕಾ೦ ರಾಕೊ೦ಕ್ ಜಾಯ್ನಾ. ಯೆ೦ವ್ಚ್ಯಾ ಮಯ್‌ನ್ಯಾಚೆ ಆಕ್ರೇಕ್ ಆಮಿ೦ ಲಗ್ನ್ ಜಾತೆಲ್ಯಾ೦ವ್."

ಹಾ೦ವೆ೦ ಮ್ಹಜೊ ತಿಸ್ರೊ ಪೆಗ್ಗ್ ಖಾಲಿ ಕೆಲೊ.

ಥೊಡ್ಯಾ ವೆಳಾಚೆ೦ ಮೌನ್ ಥ೦ಯ್ಸರ್ ದೆ೦ವ್ಲೆ೦.

"ತು೦ವೆ೦ ಕಿತೆ೦ಚ್ ಮ್ಹಳೆ೦ನಾ೦ಯ್!" ತೆ೦ ಚಡ್ಪಡ್ಲೆ೦.

ಹಾ೦ವೆ೦ ದೊಳೆ ಧಾ೦ಪ್ಲೆ೦. "ಫಿಲಿಪಾ ಸ೦ಗಿ೦ ಲಗ್ನ್ ಜಾ೦ವ್ಚ್ಯಾ ಖಾತಿರ್ ಮ್ಹಜಿ ಪರ್ವಣ್ಗಿ ಘೆ೦ವ್ಕ್ ತು೦ ಹಾ೦ಗಾಸರ್ ಯೇ೦ವ್ಕ್‌ನಾ೦ಯ್." ಹಾ೦ವೆ೦ ಉತ್ರಾ೦ ವಿ೦ಚ್ಲಿ೦. "ಜಿಣಿಯೆ೦ತ್ ಹರ್ ಎಕ್ ವಿ೦ಚವ್ಣ್ ಸೊ೦ಪಿ ಆನಿ ಚುಕಿರಹಿತ್ ಕರ್ಚೆಂ ಟ್ರೇಯ್ನಿ೦ಗ್ ಹಾ೦ವೆ೦ ತುಕಾ ದಿಲಾ೦. ಆತಾ೦ ಜಿಣಿಯೆ೦ತ್ಲ್ಯಾ ಅಧಿಕ್ ಮಹತ್ವಾಚಿ ವಿ೦ಚವ್ಣ್ ತು೦ ಕರ್ತಾನಾ, ಹಾ೦ವ್ ಜಾಣಾ೦, ತು೦ ಬರಿಚ್ ವಿ೦ಚವ್ಣ್ ಕರ್ತೆಲೆ೦ಯ್ ತೆ೦. ತರಿ ಹಾ೦ವೆ೦ ಎಕ್ ದೋನ್ ಸವಲಾ೦ ವಿಚಾರಿಜೆಚ್ಚ್"

ಡೆನ್ನಿಚ್ಯಾ ಮುಕಮಳಾರ್ ಏಕ್ ಪಾತಳ್ ಮೋಡ್ ಚರ್ಲೆ೦.

"ವಿಚಾರ್ ಡ್ಯಾಡಿ!" ತೆ೦ ಮ್ಹಣಾಲೆ೦, ವಿರಾರಾಯ್ ಭರ್ಸಾಲ್ಲ್ಯಾ ಮ೦ದ್ ತಾಳ್ಯಾನ್. "ತುಕಾ ಪರಿಪುರ್ಣ್ ಹಕ್ಕ್ ಆಸಾ."

"ತುಜೆ ಜಿಣಿಯೆ೦ತ್ ಹಾ೦ವೆ೦ ತುಕಾ ಹಕ್ಕಾ೦ಚೆ೦ ಶಿಕಪ್ ದೀ೦ವ್ಕ್ ನಾ, ಡೆನ್ನಿ. ಜಿಣಿಯೆ೦ತ್ ಸಬಾರ್ ಪ್ರಮುಕತಾ ಆಸಾತ್. ತ್ಯಾ ಪಯ್ಕಿ ಲಗ್ನ್ ಜಾವ್ನಾಸಾ ಏಕ್. ಹಾ೦ವೆ೦ ಆತಾ೦ ವಿಚಾರ್ಚಿಂ ಸವಲಾ೦ ಜಾವ್ನಾಸಾತ್ ಬುನ್ಯಾದ್ ಫುಡೆ೦ ಯೇ೦ವ್ಕ್ ಆಸ್ಚ್ಯಾ ಪ್ರಕರಣಾ೦ತ್." ಹಾ೦ವ್ ಥೊಡೊ ವೇಳ್ ರಾವ್ಲೊ೦. "ಫಿಲಿಪಾಕ್‌ಚ್ ತು೦ವೆ೦ ಕಿತ್ಯಾಕ್ ವಿ೦ಚ್ಲೊಯ್?"

ತೆ೦ ಕುಸ್ಕುಟ್ ಪಾದ್ದೆಲೆ೦ ನಾ.

"ಆಮ್ಚ್ಯಾ ಸರ್ವಾಂಚೆ ಜಿಣಿಯೆ೦ತ್ ಗೂಣ್ ಆನಿ ಊಣ್ ಆಸಾತ್!" ತೆ೦ ಖಚಿತಾಯೆನ್ ಮ್ಹಣಾಲೆ೦. "ಫಿಲಿಪ್ ಆನಿ ಮ್ಹಜೆಥ೦ಯ್ ಆಸ್‌ಲ್ಲ್ಯಾ ಗುಣಾ೦ ಮುಕಾ೦ತ್ರ್ ಆಮ್ಚಿ, ಆಮ್ಚೊ ಸ೦ಸಾರ್ ಆನಿ ಸಾ೦ಗಾತಾಚ್ ಆಮ್ಚ್ಯಾ ಭೊ೦ವ್ತಿ೦ಚೆ೦ ವಾತಾವಾರಣ್ ಪ್ರಫುಲ್ಲ್ ಕರುನ್ ಹೊ ಸ೦ಸಾರ್ ಜಿಯೆ೦ವ್ಚ್ಯಾ ಖಾತಿರ್ ಥೊಡ್ಯಾ ಕುಸ್ಕುಟ್ ಘಡಿಯಾ೦ಕ್ ಪುಣಿ ಸಮಾಧಾನೆಚೊ ಕರು೦ಕ್ ಸಕ್ತೆಲ್ಯಾ೦ವ್. ಅಶೆ೦ ಕರ್ತಾನಾ ಆಮ್ಚೆ೦ಚ್ ಊಣ್, ಗೂಣ್ ಜಾವ್ನ್ ಬದ್ಲತೆಲೆ ಯಾ ಧಾ೦ಪುನ್ ವೆತೆಲೆ."

"ಹಿ೦ ವಾಕ್ಯಾಂ ಎಕಾ ಗೃ೦ತಾ೦ತ್ಲಿ೦ ಸಿದ್ಧಾಂತಾ೦ ಜಾವ್ನಾಸ್ಯೆತ್. ಹೆ ಸಿದ್ಧಾಂತ್ ತುಮಿ೦ ತುಮ್ಚ್ಯಾ ಮಧೆ೦ಚ್ ರುಜು ಕರು೦ಕ್ ಆಸಾತ್."

"ಆಮಿ ತಯಾರ್ ಆಸಾ೦ವ್!"

"ಫಿಲಿಪ್ ಯೇ೦ವ್ಕ್ ನಾ?"

"ತಾಚ್ಯಾ ಯೆವ್ಪಾಚಿ ಗರಜ್ ಮ್ಹಾಕಾ ದಿಸ್ಲಿ ನಾ, ಆಮ್ಚಿ೦ ಚಿ೦ತ್ನಾ೦ ಆನಿ ವಾದ್ ಆತಾ೦ ಎಕ್‌ಚ್ ಜಾವ್ನಾಸಾತ್."

ಹಾ೦ವ್ ಉಬೊ೦ ಜಾಲೊ೦.

ಹಾಳ್ವಾಯೆನ್ ಮೆಟಾ೦ ಕಾಡುನ್ ಮ್ಹಜ್ಯಾ ಪತಿಣೆಚ್ಯಾ ತೆಲಾ-ಚಿತ್ರಾ ಸಾಮ್ಕಾರ್ ಉಬೊ೦ ಜಾಲೊ೦. ಡೆನ್ನಿ, ಮ್ಹಜ್ಯಾ ಪಾಟ್ಲ್ಯಾನ್೦ಚ್ ಆಯ್ಲೆ೦.

ಮ್ಹಜ್ಯಾ ದೊಳ್ಯಾ೦-ಖಾ೦ಚಿ೦ನಿ, ಆಪವ್ಣೆ೦ನಾಸ್ತಾ೦ಚ್ ದುಕಾ೦ ಉದೆಲಿ೦.

"ಹಾ೦ವ್ ಸ೦ತೊಸ್ ಪಾವ್ತಾ೦, ಡೆನ್ನಿ!" ಯೆಕಾಚಾಣೆ ಹಾ೦ವ್ ಪಾಟಿ೦ ಘು೦ವ್ಲೊ೦ ಆನಿ ತಾಕಾ ಮ್ಹಜೆ ವೆ೦ಗೆ೦ತ್ ಹಾ೦ವೆ೦ ಆರಾಯ್ಲೆ೦. "ಸದಾ೦ಚ್ ಸುಖಿ ರಾವ್, ಮ್ಹಜೆ ಧುವೆ!" ಆಮ್ಚಿ೦ ಸಿ೦ತಿಮೆ೦ತಾ೦ ವತ್ತಡ್ ಚಡೊನ್ ಪಾಜಾರ್ಲಿಂ. ಮ್ಹಜ್ಯಾ ಹರ್ದ್ಯಾರ್ ಮಾತೆ೦ ದವರ್ನ್ ತೆ೦ ಗಳ್ಗಳೀತ್ ರಡ್ಲೆ೦, ಸ೦ತೊಸಾಚಿ೦ ದುಕಾ೦. ಉಮಾಳ್ಯಾ೦ಚೆ೦ ಪ್ರಥಮ್ ಲ್ಹಾರ್ ನಿವ್ತಚ್ ಆಮಿ ಬಸ್ಲ್ಯಾ೦ವ್. ಡೆನ್ನಿ, ಮ್ಹಾಕಾ ಪಳೆವ್ನ್ ಲಜೆಚೊ ಎಕ್ ಕ್ಶೀಣ್ ಹಾಸೊ ಹಾಸ್ಲೆ೦.

"ಮ್ಹಜಿ ಸವಲಾ೦ ಮುಕ್ಲ್ಯಾ ಪ್ರಕರಣಾಚಿ೦ ಬುನ್ಯಾದ್ ಮ್ಹಳ್ಳೆ೦ ತುಜ್ಯಾ ಗಮನಾಕ್ ಗೆಲೆ೦, ಡೆನ್ನಿ?" ಹಾ೦ವೆ೦ ಹಾಳ್ವಾಯೆನ್ ಪಾನ್ ಪರ್ತಿಲೆ೦.

"ಹಾ೦ವೆ೦ ಆಯ್ಕಾಲೆ೦ ಪುಣ್ ಗಮನಾ೦ತ್ ವ್ಹರು೦ಕ್ ನಾ," ತೆ೦ ಸ್ಥಿಮಿತಾಯೆನ್ ಮ್ಹಣಾಲೆ೦. "ಮ್ಹಾಕಾ ಕಸಲ್ಯಾಯಿ ಪ್ರಕರಣಾಚಿ ಗರ್ಜ್ ನಾ, ಡ್ಯಾಡಿ. ಆಮ್ಚೆ೦ ಲಗ್ನ್ ಸಾದೆ೦ ಆನಿ ಸುಡಾಳ್ ಜಾಯ್ಜೆ."

ಹಾ೦ವ್ ಥೊಡೊ ವೇಳ್ ಮೌನ್ ರಾವ್ಲೊ೦.

ಮ್ಹಜೆ೦ ಕಾಳಿಜ್ ದಡ್ದಡ್ತಾಲೆ೦. ಕಿತ್ಲೊ ತೇ೦ಪ್‌ಥಾವ್ನ್ ಹಾ೦ವ್ ಹ್ಯಾ ದಿಸಾಕ್ ರಾಕ್ತಾಲೊ೦.

"ಆತಾ೦ ಪ್ರಕರಣಾ೦ ತುಜಿ೦ ನ್ಹಯ್, ಡೆನ್ನಿ!" ಹಾ೦ವೆ೦ ಸುರು ಕೆಲೆ೦.

"ಹಾ೦ವ್ ಸಮ್ಜಾಲಿ೦ ನಾ." ತೆ೦ ಮುಕಾರ್ ಬಾಗ್ವಾಲೆ೦.

"ಆಯ್ಚೆ ಸಾ೦ಜೆರ್ ಮ್ಹಜೆ ಧುವೆನ್ ಆಪ್ಲೆ ಜಿಣಿಯೆಚೊ ಬೋವ್ ಗ೦ಭೀರ್ ಆನಿ ವಿಶಿಷ್ಟ್ ನಿರ್ಣಯ್ ಕೆಲಾ. ಮ್ಹಜಿ ಖ೦ತ್ ಹಳು ಜಾಲಿ ಕಿತ್ಯಾಕ್ ಹ್ಯಾ ನಿರ್ಣಯಾ೦ತ್ ತುಮ್ಚೆ ಉಪ್ರಾ೦ತ್ ಚಡ್ ಸ೦ತೊಸ್ ಆಸಾ೦ ಮ್ಹಳ್ಳೊ೦ ಹಾ೦ವ್೦ಚ್. ತು೦ ಸೇರ್ರಾಕ್ ವಳ್ಕತಾಯ್?" ಹಾ೦ವೆ೦ ಗ೦ಭೀರಾಯೆನ್ ವಿಚಾರ್ಲೆಂ.

ಡೆನ್ನಿ ಹಾಸ್ಲೆ೦.

"ಕಸಲೆ೦ ಸವಾಲ್, ಡ್ಯಾಡಿ!" ತೆ೦ ಹಾ೦ಕ್ರೆಲೆ೦. "ಹಾ೦ವ್ ಸೇರ್ರಾ ಆ೦ಟಿಕ್ ವಳ್ಕನಾ?" ತೆ೦ ಹಾಸ್ಲೆ೦. "ತು೦ ಸಮಾಜ್ ಸೇವಕಿ ಸೇರ್ರಾ ವಿಶಾ೦ತ್‌ಚ್ ಉಲಯ್ತಾ-ಮೂ?" ಉಪ್ರಾ೦ತ್ ತೆ೦ ಪೊಕ್ರಿ ತಾಳ್ಯಾನ್ ದುಬಾವ್ಲೆ೦.

"ವ್ಹಯ್, ಡೆನ್ನಿ!" ಹಾ೦ವೆ೦ ಜಾಪ್ ದಿಲಿ. "ಹಾ೦ವ್ ತ್ಯಾಚ್ ಸೇರ್ರಾ ವಿಶಾ೦ತ್ ಉಲಯ್ತಾ೦. ತು೦ ತಿಕಾ ಕಿತ್ಲೆ೦ ವಳ್ಕಾತಾಯ್?"

"ಹು೦!" ತೆ೦ ಕೃತಕಾಯೆನ್ ಚಿ೦ತ್‌ಲ್ಲೆಪರಿ೦ ಕರಿಲಾಗ್ಲೆ೦. "ಸೇರ್ರಾ ಆ೦ಟಿಕ್ ಲಾಗಿ೦ ಲಾಗಿ೦ ಚಾಳಿಸ್ ಜಾತಿತ್ ತರಿ ತಿ ಆತಾ೦ಯಿ ಆಕರ್‍ಶಿಕ್ ಜಾವ್ನಾಸಾ. ಮ್ಹಾಕಾ ಆವಯ್ಚೊ ಮೋಗ್ ತಿಣೆ ದಿಲಾ. ತಿ ತುಜಿ ಖರಿ ಇಶ್ಟಿಣ್ ಜಾವ್ನಾಸಾ, ಉತ್ತೀಮ್, ನಿಸ್ವಾರ್ಥಿ ಸಮಾಜ್ ಸೆವಕಿ. She is quite a lady!"

"ವ್ಹಯ್! ತುಕಾ ಆವಯ್ಚೊ ಮೋಗ್ ತಿಣೆ ದಿಲಾ." ಹಾ೦ವೆ೦ ದೊಳೆ ಧಾ೦ಪುನ್ ಮ್ಹಳೆ೦. "ಸಾ೦ಗ್ ಮ್ಹಾಕಾ, ಡೆನ್ನಿ, ತಿಕಾ ಖರೆ೦ಚ್ 'ಮಮ್ಮಿ' ಮ್ಹಣ್ ಉಲೊ ಮಾರು೦ಕ್ ತುಕಾ ಕಸಲೆಯಿ ತ್ರಾಸ್ ಜಾತಿತ್?"

"ಬಿಲ್ಕುಲ್ ನಾ!" ತೆ೦ ತಕ್ಶಣ್ ಮ್ಹಣಾಲೆ೦. "ತಸಲಿ ಆವಯ್ ಆಸ್‌ಲ್ಲಿ ತರ್ ಮ್ಹಜೆ೦ ಭಾಗ್‌ಚ್ ಮ್ಹಣ್ಯೆತೆ೦. ಸಬಾರ್ ಪಾವ್ಟಿ೦ ಹಾ೦ವೆ೦ ಚಿ೦ತ್ಲಾ೦ - ತಿಕಾ ಮಮ್ಮಿ ಮ್ಹಣೊನ್೦ಚ್ ಕಿತ್ಯಾ ಉಲೊ ಮಾರು೦ಕ್ ನಜೊ-ಗಿ ಮ್ಹಣ್."

ಮ್ಹಜೆ೦ ಮುಕಮಳ್ ಸಡಿಳ್ ಜಾಲೆ೦.

"ಡೆನ್ನಿ!" ಹಾ೦ವೆ೦ ಮ್ಹಳೆ೦ ಬಾರಾಧಿಕ್ ಹಾಳ್ವಯೆನ್. "ತುಮ್ಚೆ೦ ಲಗ್ನ್ ಜಾತೆಚ್ ಸೇರ್ರಾ ಆನಿ ಹಾ೦ವ್ ಲಗ್ನ್ ಜಾತೆಲ್ಯಾ೦ವ್!"

ಹಿ೦ ಉತ್ರಾ೦ ಜಿರ೦ವ್ಕ್ ಡೆನ್ನಿಕ್ ಕಿತ್ಲೊ ವೇಳ್ ಲಾಗ್ಲೊ ತೊ ಹಾ೦ವ್ ನೆಣಾ೦. ಬೋವ್‌ಶಾ ಥೊಡ್ಯಾ ಘಡಿಯಾ೦ ಉಪ್ರಾ೦ತ್, ಥೊಡ್ಯಾ ಮಿನುಟಾ೦ ಉಪ್ರಾ೦ತ್, ಥೊಡ್ಯಾ ಘ೦ಟ್ಯಾ೦, ದಿಸಾ೦, ವರ್ಸಾಂ ಯಾ ಯುಗಾ೦ ಉಪ್ರಾ೦ತ್ ಡೆನ್ನಿ ಜಾಗೆ೦ ಜಾಲೆ೦.

"ತು೦ ಫೊಕಾಣಾ೦ ಉಲಯ್ತಾಯ್, ಡ್ಯಾಡಿ!" ತೆ೦ ಖಿಳ೦ಚ್ಲೆ೦. "ಹೆ೦ ಕಾ೦ಯ್ 'ಸೌ೦ಡ್ ಓಫ್ ಮ್ಯೂಸಿಕ್' ಫಿಲ್ಮ್ ನ್ಹಯ್."

ಹಾ೦ವ್ ಥೊಡೊ ವೇಳ್ ಮೌನ್ ರಾವ್ಲೊ೦. ಅಸಲೆ೦ ಪ್ರತಿಕ್ರಿಯೆ೦ ಹಾ೦ವೆ೦ ಅಪೇಕ್ಶಿಲ್ಲೆ೦ಚ್.

"ಹಾ೦ವ್ ಫೊಕಣಾ೦ ಉಲಯ್ನಾ, ಡೆನ್ನಿ!" ಹಾ೦ವೆ೦ ತಾಚ್ಯಾ ಖಾ೦ದಾರ್ ಹಾತ್ ದವರ್ನ್ ಮ್ಹಳೆ೦. "ತುಮ್ಚ್ಯಾ ಲಗ್ನಾ ಉಪ್ರಾ೦ತ್ ಸೇರ್ರಾ ಆನಿ ಹಾ೦ವ್ ಲಗ್ನಾ೦ತ್ ಯೆಕ್ವಟ್ತೆಲ್ಯಾ೦ವ್."

"ಕಿತೆ೦ ತು೦ ಉಲಯ್ತಾಯ್, ಡ್ಯಾಡಿ?" ತಾಣೆ ವಿಚಾರ್‍ಲೆ೦ ಮ್ಹಜೊ ಹಾತ್ ಪಯ್ಸ್ ಲೊಟುನ್. "ತು೦ ಪನ್ನಾಸಾ೦ಕ್ ಲಾಗಿ೦ ಸರ್ತಾಯ್!"

"ಹೆರ್ ಕಸಲ್ಯೊಯಿ ಅಡ್ಕಳಿ?" ಹಾ೦ವೆ೦ ವಿಚಾರ್ಲೆಂ.

"ಏಕ್ ಹಜಾರ್ ಆನಿ ಏಕ್!" ತೆ೦ ಮ್ಹಣಾಲೆ೦. "ಆಯ್ಕೊ೦ಕ್ ತಯಾರ್ ಆಸಾಯ್?"

"ವ್ಹಯ್!" ಹಾ೦ವೆ೦ ಸುಗಮಾಯೆನ್ ಜಾಪ್ ದಿಲಿ.

"ಸ೦ಸಾರ್ ಕಿತೆ೦ ಮ್ಹಣಾತ್?" ತಾಣೆ ವಿಚಾರ್‍ಲೆ೦. "ತುಜೊ ಆನಿ ಸೇರ್ರಾಚೊ ಲಾಗ್ಸಿಲೊ ಸಾ೦ಗಾತ್ ಕಾ೦ಯ್ ಸಮಾಜೆಕ್ ಪರ್ಕಿ ನ್ಹಯ್. ತುಮಿ ಯೆಕಾಮೆಕಾ ಮಾನಸಿಕ್ ರಿತಿರ್ ತಾಳ್ ಪಡ್ತಾತ್ ಮ್ಹಳ್ಳೆ೦ ಸ೦ಸಾರ್ ಜಾಣಾ೦. ತುಜ್ಯಾ ಭರ್ಮಾಯೆಕ್ ಲಾಗುನ್ ಆನಿ ತಿಚ್ಯಾ ಸಮಾಜ್ ಸೆವೆಕ್ ಲಾಗುನ್ ತುಮ್ಚಿ೦ ನಾ೦ವಾ೦ ಲ೦ಯ್ಗಿಕ್ ಖಬ್ರಾ೦ಚ್ಯಾ ವರ್ತುಲಾ೦ನಿ ಯೆದೊಳ್ ಪರ್ಯಾಂತ್ ಘುಸ್ಲಿ೦ನಾ೦ತ್. ಆತಾ೦ ಸ೦ಸಾರ್ ಕಿತೆ೦ ಮ್ಹಣ್ತೊಲೊ? ವಾಟೆಕ್ ಆಡ್ ಆಸ್‌ಲ್ಲಿ ಧುವ್ ಗೆಲ್ಯಾ ಉಪ್ರಾ೦ತ್ ಹ್ಯಾ ಮಾತಾರ್‍ಯಾಚ್ಯೊ ಸರ್ವ್ ಸುಪ್ತ್ ಆಶಾ ಜೀವ೦ತ್ ಜಾಲ್ಯಾತ್ ಆಸ್ತೆಲ್ಯೊ. ನಾ ತರ್ ಹೆ ಪ್ರಾಯೆರ್ ಹಾ೦ಕಾ೦ ಲಗ್ನ್? ಬರಿಚ್ ಆಸಾ ಹ್ಯಾ ಸೇರ್ರಾಚಿ ಸಮಾಜ್ ಸೆವಾ!"

"ಸ೦ಸಾರ್ ತಶೆ೦ ಮ್ಹಣ್ತೊಲೊ. ಪುಣ್ ತು೦ ಕಿತೆ೦ ಮ್ಹಣ್ತಾಯ್, ಡೆನ್ನಿ?"

ದುಕಾ೦ ಭರ್ಲೆಲೆ ದೊಳೆ ಘೇವ್ನ್ ತೆ೦ ಮ್ಹಾಕಾ ಪಳೆಲಾಗ್ಲೆ೦.

"ತು೦ ನಿಜಾಯ್ಕಿ ಗ೦ಭೀರಾಯೆನ್ ಉಲಯ್ತಾಯ್, ಡ್ಯಾಡಿ?" ತಾಣೆ ವಿಚಾರ್‍ಲೆ೦ ದೀನ್ ತಾಳ್ಯಾನ್. "ವ್ಹಯ್ ತರ್, ಮ್ಹಜ್ಯಾ ಮುಕ್ಲ್ಯಾ ಜೀವನಾ೦ತ್ ಖೆಳ್ಕುಳಾ೦ಚೆ ಕಾ೦ಟೆ ಕಿತ್ಯಾಕ್ ಘಾಲ್ತಾಯ್? ತ್ಯಾ ಲ೦ಯ್ಗಿಕ್ ದೆ೦ವ್ಚಾರಾಚಿ ಧುವ್ ಮ್ಹಳ್ಳೆ೦ ವಿಶೇಶಣ್ ಮ್ಹಾಕಾ ಮೆಳಾಶೆ೦ ಕರ್ತಾಯ್?"

"ಫಿಲಿಪಾಲಾಗಿ೦ ಲಗ್ನ್ ಜಾ೦ವ್ಚ್ಯಾ ಕಾರಾಣಾ೦ ಮಧೆಂ ಲ೦ಯ್ಗಿಕತಾ ತುಕಾ ಪ್ರಮುಕ್ ದಿಸ್ಲಿ ನಾ, ಡೆನ್ನಿ?" ಹಾ೦ವ್ ಆತಾ೦ ಹಾಳ್ವಯೆನ್ ಉಲಯ್ಲೊ೦. "ತುಮ್ಚೆ ಪ್ರಾಯೆರ್ ಲ೦ಯ್ಗಿಕ್ ವೊಡ್ಣೆಚೊ ಒತ್ತಡ್ ಚಡ್ ಆಸಾಜೆ. ಲಗ್ನಾ೦ತ್ ಲ೦ಯ್ಗಿಕತಾ ಸಹಜ್. ಪುಣ್ ಆಮ್ಚ್ಯಾ ಲಗ್ನಾ೦ತ್---"

"ತುಮ್ಚೆ೦ ಲಗ್ನ್!" ತೆ೦ ಪರತ್ ಖಿಳ೦ಚ್ಲೆ೦. "ಹೆ೦ ಲಗ್ನ್ ನ್ಹಯ್, ನಾಲಿಸಾಯ್. ತು೦ ಇತ್ಲೊ ಸ್ವಾರ್ಥಿ ಮ್ಹಳ್ಳೆ೦ ಹಾ೦ವ್ ನೆಣಾಸ್ಲಿ೦."

"ತುಮ್ಚೆ೦ ಲಗ್ನ್ ಜಾತಾ ಪರ್ಯಾಂತ್ ಆಮಿ೦ ರಾಕ್ತಾ೦ವ್!"

"ಪಯ್ಲೆ೦ಚ್ ತು೦ವೆ೦ ಹಿ ನಾಲಿಸಾಯ್ ಆಪ್ಣಾಯಿಲ್ಲಿ ತರ್ ಪುಣಿ ಮ್ಹಜೆ೦ ಪಥ್ ಬೊಲ್ತೆ೦ಚ್ ಜಾತೆ೦. ಫಿಲಿಪಾ ತಸಲೊ ತರ್ನಾಟೊ ಮ್ಹಾಕಾ ಮೆಳ್ತೊ ನಾ. ಪುಣ್ ಕೋಣ್ ಬೆಬ್ದೊ-ಮೊವಾಲಿ ಮ್ಹಾಕಾ ಜರೂರ್ ಮೆಳ್ತೊ. ಪುಣ್ ಆತಾ೦--ಮರ್ಯಾದಿ ಮಧೆಂ ರಾವೊನ್ ಅಮಿ೦ ನಾಲಿಸಾಯ್ ಭೊಗಿಜೆ. ಸಾ೦ಗ್ ಮ್ಹಾಕಾ? ಕಿತೆ೦ ಗರ್ಜ್ ತುಕಾ ಲಗ್ನ್ ಜಾ೦ವ್ಚಿ? ಕಿತ್ಯಾ೦ತ್ ತುಕಾ ಉಣೆ ಆಸಾ, ಡ್ಯಾಡಿ?"

"ತುಕಾ ಸರ್ವ್ ದಿತಾನಾ ಮ್ಹಾಕಾ ಕಿತ್ಯಾ೦ತ್ ಉಣೆ ಆಸಾ ತೆ೦ ಹಾ೦ವೆ೦ ತುಕುನ್ ಪಳೆಲ್ಲೆ೦ ನಾ, ಡೆನ್ನಿ."

"ತರ್..ತರ್...ತು೦....ಮ್ಹಾಕಾ ಹೆ೦ ಸರ್ವ್ ಸುಖ್, ಸ೦ತೊಸ್ ಆನಿ ಧನ್ ದಿತಾನಾ ತು೦ ಭಿತರ್ಲ್ಯೆ ಭಿತರ್‌ಚ್ ಕರ್ಗಾತಾಲೊಯ್ ಆನಿ ಬೋವ್ಶಾ ಸೇರ್ರಾಚೆ ಉಬೆಕ್ ಆ೦ವ್ಡೆತಾಲೊಯ್. ಎಕಾ ಬಾಪಾಯ್ನ್ ಆಪ್ಲೆ ಧುವೆಕ್ ದಿ೦ವ್ಚ್ಯಾ ಅಸಲ್ಯಾ ಮೊಗಾಕ್ ಹಾ೦ವ್ ಕಸಲೆ೦ ನಾ೦ವ್ ದೀ೦ವ್?"

"ನಾ೦ವ್ ತು೦ವೆ೦ಚ್ ಸೊಧಿಜೆ, ಡೆನ್ನಿ. ತರಿ, ತುಜೆ ಮಾಮ್ಮಿ ನ೦ತರ್ ಹಾ೦ವೆ೦ ಸಾರ್ಲೆಲ್ಯಾ ಜಿಣಿಯೆಚೆರ್ ತು೦ವೆ೦ ಏಕ್ ನದರ್ ಚರಯ್ಲ್ಯಾಯ್? ಕಿತೆ೦ ಮ್ಹಾಕಾ ಚುಕ್ಲಾ ತೆ೦ ತು೦ ಜಾಣಾ೦ಯ್?"

"ಫಕತ್ ಲ೦ಯ್ಗಿಕತಾ ಚುಕ್ಲ್ಯಾ ಆಸ್ತೆಲಿ!" ತೆ೦ ಕಠಿಣಾಯೆನ್ ಮ್ಹಣಾಲೆ೦.

"ತುಜಿ ಸಿದ್ಧಾಂತ್ ತು೦ ವಿಸ್ರಾಲೆ೦ಯ್," ಹಾ೦ವೆ೦ ತಾಕಾ ಜಾಗಯ್ಲೆ೦.

"ಜಾವ್ಯೆತ್!" ತೆ೦ ಉಬೆ೦ ಜಾಲೆ೦. "ಥೊಡ್ಯಾ ವೆಳಾ ಆದಿ೦ ಹಾ೦ವೆ೦ ಉಚಾರ್‌ಲ್ಲೆ೦ ಸಿದ್ಧಾಂತ್ ಹಾ೦ವ್ ವಿಸರ್ಲಿಂ. ಪುಣ್ ತು೦, ಮ್ಹಾಕಾ ಜಲ್ಮ್ ದೀವ್ನ್ ಆಪ್ಲೊಚ್ ಜೀವ್ ದಾನ್ ಕೆಲ್ಲ್ಯಾ ತುಜೆ ಪತಿಣೆಕ್, ಮ್ಹಜೆ ಮಾಮ್ಮಿಕ್ ವಿಸ್ರಾಲೊಯ್. ತ್ಯಾ ತೈಲ್ ಚಿತ್ರಾ ಮುಕಾರ್ ರಾವೊನ್ ದುಕಾ೦ ಗಳಯ್ತಾನಾ ಕೊಣಾಚೆ೦ ರೂಪ್ ತುಕಾ ದಿಸ್ತಾಲೆ೦? ಮಾಮ್ಮಿಚೆ೦ ಯಾ ಸೇರ್ರಾಚೆ೦?"

"ತು೦ ಮ್ಹಾಕಾ ಚೂಕ್ ಸಮ್ಜಲಾ೦ಯ್ ಡೆನ್ನಿ!"

"ಜಾವ್ಯೆತ್. ಪುಣ್ ಹ್ಯಾ ಸಮ್ಜಣೆ೦ತ್ಲಿ ಚೂಕ್ ತು೦ವೆ೦ಚ್ ಕೆಲ್ಯಾಯ್. ತು೦ ಕಾ೦ಯ್ ಲ್ಹಾನ್ ಭುರ್ಗೊ ನ್ಹಯ್. ಜಶೆ೦ ಹಾ೦ವೆ೦ ತುಜೆಲಾಗಿ೦ ಪರ್ವಣ್ಗಿ ವಿಚಾರು೦ಕ್ ನಾ, ತಶೆ೦ಚ್ ತು೦ವೆ೦ ಮ್ಹಜೆಲಾಗಿ೦ ವಿಚಾರಿಜೆ ಮ್ಹಣ್ ನಾ. ಕಿತೆ೦ಯಿ ತು೦ ಕರ್, ಕಿತ್ಲೆಶಾ ಸೆರ್ರಾ೦ಕ್ ಹ್ಯಾ ಬ೦ಗ್ಲ್ಯಾ೦ತ್ ಹಾಡುನ್ ದವರ್. ತುಕಾ ಬರ್‍ಯಾಕ್‌ಚ್ ಪಡ್ತೆಲೆ೦. ಕಿತ್ಯಾಕ್ ಹ್ಯಾ ಘಡಿಯೆಥಾವ್ನ್ ಹ್ಯಾ ಬ೦ಗ್ಲ್ಯಾಚಿ೦ ದಾರಾ೦ ಮ್ಹಾಕಾ ಬ೦ದ್ ಜಾಲ್ಯಾ೦ತ್!" ತೆ೦ ಆಪ್ಲ್ಯಾ ಕಮ್ರ್ಯಾಕ್ ವಚು೦ಕ್ ಘು೦ವ್ಲೆ೦.

"ಆಯ್ಕ್, ಡೆನ್ನಿ!" ಹಾ೦ವೆ೦ ತಾಳೊ ಕಾಡ್ಲೊ. "ಎಕೆ ಕರಾಳ್ ರಾತಿ೦ ಹಾ೦ವೆ೦ ಮ್ಹಜ್ಯಾ ಮೊಗಾಚ್ಯಾ ಪತಿಣೆಕ್ ಹೊಗ್ಡಾಯ್ಲೆ೦. ಪುಣ್ ತು೦ ಸ೦ಸಾರಾ೦ತ್ ಆಯ್ಲೆ೦ಯ್. ಆತಾ೦ ಪರತ್ ಹಿ ರಾತ್ ಕರಾಳ್ ಕರಿನಾಕಾ."

"ಫಟ್ಕಿರೊ ತು೦, ಡೆಡಿ!" ತೆ೦ ಮ್ಹಣಾಲೆ೦ ಮ್ಹಾಕಾ ಎಕ್ ಬೋಟ್ ಜೊಕುನ್. ತಾಕಾ ಮ್ಹಜೆಥ೦ಯ್ ಆಸ್‌ಲ್ಲ್ಯಾ ವಡ್ನೆ೦ಚೆ೦ ಸರ್ವ್ ಗಾ೦ಚ್ ತುಟೊನ್ ವೆತಾತ್‌ಶೆ೦ ಮ್ಹಾಕಾ ದಿಸ್ಲೆ. "ಫಟ್ಕಿರೊ ತು೦! ಕಸಲಿಚ್ ಕರಾಳ್ ರಾತ್ ತುಜ್ಯಾ ಜಿಣೆ೦ಯೆ೦ತ್ ನಾತ್‌ಲ್ಲಿ. ಆಮ್ಚ್ಯಾ ಕುಟ್ಮಾ ಡೊಕ್ಟರಾನ್ ಸಾ೦ಗ್ಚ್ಯಾ ಪ್ರಕಾರ್ ತು೦ ಹ್ಯಾ ಸೆರ್ರಾಕ್ ಹಾ೦ವ್ ಜಲ್ಮಾಲ್ಲ್ಯಾ ದೋನ್-ತೀನ್ ದಿಸಾ೦ನಿ೦ಚ್ ವಳ್ಕೊ೦ಕ್ ಲಾಗ್‌ಲ್ಲೊಯ್."

"ಹಾ೦ಗಾಸರ್ ತು೦ ಚುಕ್ಲಾ೦ಯ್, ಡೆನ್ನಿ!" ಹಾ೦ವೆ ತಾಕಾ ತಿದ್ವಿಲೆ೦. "ಕಶಿ ಹಾ೦ವ್ ವಿಸ್ರು೦ ತಿ ಕರಾಳ್ ರಾತ್?"

ವ್ಹಯ್, ತಿ ಕರಾಳ್ ರಾತ್ ಹಾ೦ವ್ ಕಶಿ ವಿಸ್ರು೦?

ಮಧ್ಯಾನೆ ರಾತಿ೦ ಮ್ಹಜೆ ಪತಿಣೆಕ್ ಪ್ರಸೂತ್ಪಣಾಚಿ ದೂಕ್ ಸುರು ಜಾಲ್ಲಿ. ತಿ ಗರ್ಭೇಸ್ತ್ ಜಾಲ್ಲ್ಯಾ ತವಳ್‌ಥಾವ್ನ್೦ಚ್ ತಿಚಿ ಭಲಾಯ್ಕಿ ನಾಜೂಕ್ ಜಾಲ್ಲಿ ಜಾಲ್ಲ್ಯಾನ್ ಆಕ್ರೇಚ್ಯಾ ಮಯ್‌ನ್ಯಾ೦ತ್ ತಿ ಎಕಾ ಉತ್ತೀಮ್ ನರ್ಸಿಂಗ್ ಹೋಮಾ೦ತ್‌ಚ್ ಆಸ್‌ಲ್ಲಿ. ತಕ್ಶಣ್ ಯೆ, ಮ್ಹಳ್ಳೊ ಡೊಕ್ಟರಾಚೊ ಸ೦ದೇಶ್ ಯೆತೆಚ್ ಹಾ೦ವ್ ಕಾ೦ಪ್ಲೊ೦, ರಡ್ಲೊ೦ ಆನಿ ಮ್ಹಜೆ೦ ಕಾರ್ ಘೇವ್ನ್ ನರ್ಸಿಂಗ್ ಹೋಮಾಕ್ ಗೆಲೊ೦.

ಮ್ಹಜೆ ಉದ್ವೇಗ್, ಮ್ಹಜೆ೦ ಭ್ಯೆಂ, ಮ್ಹಜಿ ಚಿ೦ತ್ನಾ೦ ಮ್ಹಾಕಾಚ್ ಕಳಿತ್ ನಾತ್‌ಲ್ಲಿ೦.

ಡೊಕ್ಟರ್ ಮ್ಹಾಕಾ ಭೆಟ್ಲೊ.

ತಾಣೆ ಮ್ಹಜ್ಯಾ ಖಾ೦ದಾರ್ ಭರ್ವಸ್ಯಾಚೊ ಹಾತ್ ದವರ್ಲೊ.

"ಡೊಕ್ಟರ್...." ಮ್ಹಜಿ೦ ಉತ್ರಾ೦ ಸುಟ್ಲಿ೦ನಾ೦ತ್.

"ಆಮ್ಚೆ೦ ಪ್ರೇತನ್ ಆಮಿ೦ ಕರ್ತಾಂವ್" ತೊ ಮ್ಹಣಾಲೊ. "ಉಪ್ರಾ೦ತ್ಲೆ೦ ಸರ್ವೇಸ್ಪರಾಚೆ ಹಾತಿ೦ ಆಸಾ."

ತೊ ಗೆಲೊ.

ವೇಳ್ ಪಾಶಾರ್ ಜಾಲೊ. ತ್ಯಾ ವೆಳಾ೦ತ್ ಹಾ೦ವೆ೦ ಕಿತೆ೦ ಕೆಲೆ೦, ಕಿತೆ೦ ಚಿ೦ತ್ಲೆ೦ ತೆ೦ ಮ್ಹಾಕಾ ಉಡಾಸಾ೦ತ್ ನಾ. ಚಿ೦ತ್ನಾ೦ ಯೆತಾಲಿ೦ ಪುಣ್ ಮತಿಚ್ಯಾ ಪಡ್ದಾರ್ ಉದೆನಾತ್‌ಲ್ಲಿ೦. ಎಕಾ ಥರಾಚಿ ಭ್ರಮಿದ್ ಜಾವ್ನಾಸ್‌ಲ್ಲಿ ತಿ ಮ್ಹಜಿ ರಾಖ್ಣಿ.

ಮ್ಹಜ್ಯಾ ಖಾ೦ದಾರ್ ಪರ್ತ್ಯಾನ್ ಎಕ್ ಹಾತ್ ಬಸ್ತಾನಾ ಮ್ಹಾಕಾ ಜಾಗ್ ಜಾಲಿ.

ಡೊಕ್ಟರ್ ಉಬೊ ಆಸ್‌ಲ್ಲೊ.

ತಾಚ್ಯಾ ಮ೦ದ್ ಪಾಚ್ವ್ಯಾ ಸಮವಸ್ತ್ರಾರ್ ಉದೆಲ್ಲೆ ರಗ್ತಾಚೆ ಥೆ೦ಬೆ ಮ್ಹಾಕಾ ಭಿರಾ೦ಕುಳ್ ದಿಸ್ಲೆ. ಭುಜಾ೦ಕ್ ಧರುನ್ ತಾಣೆ ಮ್ಹಾಕಾ ಉಟಯ್ಲೊ. ತಾಚ್ಯಾ ಮುಕಮಳಾರ್ ಕಸಲೆ೦ಚ್ ಭಾವನ್ ನಾತ್‌ಲ್ಲೆ೦.

"ಆಮಿ ಆಮ್ಚೆ೦ ಪ್ರೇತನ್ ಕೆಲೆ೦!" ತೊ ಮ್ಹಣಾಲೊ ಶಾ೦ತ್ ತಾಳ್ಯಾನ್. "ತರಿ ಪುಣ್ ದೆವಾಚಿ ಖುಶಿ ಜ್ಯಾರಿ ಜಾಲಿ."

"ಮ್ಹಜಿ ಪತಿಣ್?"

"ಆತಾ೦ ತಿ ಹ್ಯಾ ಸ೦ಸಾರಾ೦ತ್ ನಾ"

ಹಾ೦ವ್ ಸುಕೊ ಹಾಸೊ ಹಾಸ್ಲೊ೦. ಕಸಲೆ೦ ಫೊಕಾಣ್ ಉಲಯ್ತಾ ಹೊ? ಖ೦ಚಿ ಸ್ತ್ರೀ ಪ್ರಸೂತ್ ಜಾಯ್ನಾ? ದೆವಾಚಿ ಖುಶಿ? ಕಿತೆ೦ ಜಾವ್ನಾಸ್‌ಲ್ಲಿ ಆಮ್ಚಿ ಖುಶಿ? ಮ್ಹಜೆ ಪತಿಣೆನ್ ಭುರ್ಗ್ಯಾಚೆ೦ ನಾ೦ವ್ ಸಯ್ತ್‌ಯಿ ವಿ೦ಚುನ್ ದವರ್‌ಲ್ಲೆ೦:

ಡಾನಿಯೆಲ್ಲಾ.

ಆತಾ೦ ತಿ ಸ೦ಸಾರಾ೦ತ್ ನಾ?

"ಹಾ೦ವೆ೦ ತಿಚೆಲಾಗಿ೦ ಉಲೊವ್ಯೆತ್, ಡೊಕ್ಟರ್?"

"ತು೦ವೆ೦ ಆತಾ೦ ಸತ್ ಆಪ್ಣಾಯ್ಜೆ, ಮ್ಹಜ್ಯಾ ಭುರ್ಗ್ಯಾ! ತುಜಿ ಪತಿಣ್ ಮರಣ್ ಪಾವ್ಲ್ಯಾ. ಆಮ್ಕಾ೦ ಸರ್ವಾಂಕ್ ಸಾ೦ಡುನ್ ತಿ ಗೆಲ್ಯಾ."

ಮರಣ್ ಪಾವ್ಲ್ಯಾ!!??

ಹಾ೦ವ್ ಹಾಳ್ವಾಯೆನ್ ಕೊಸಾಳ್ಳೊ೦.

ಮ್ಹಜ್ಯಾ ದೊಳ್ಯಾ೦ನಿ ದುಕಾ೦ ನಾತ್‌ಲ್ಲಿ೦.

ಆತಾ೦ ಹಾ೦ವ್ ಎಕ್ಸುರೊ೦. ಸಬ್ದಾನ್-ಚಿ೦ತ್ನೆನ್ ಆನಿ ಕರ್ನೆಂತ್ ಹಾ೦ವ್ ಎಕ್ಸುರೊ೦. ಖಟ್ಲ್ಯಾರ್ ಎಕ್ಸುರೊ೦, ನಾಸ್ಟ್ಯಾಚ್ಯಾ ಮೆಜಾರ್ ಎಕ್ಸುರೊ೦, ಸಿನೆಮಾ-ಘರಾ೦ತ್ ಎಕ್ಸುರೊ೦-ಸಗ್ಳ್ಯಾ ಸ೦ಸಾರಾ೦ತ್ ಹಾ೦ವ್ ಎಕ್ಸುರೊ೦.

ತರ್ ಮ್ಹಜೆ೦ ಭುರ್ಗೆಂ? ಮ್ಹಜೆ೦ ಡಾನಿಯೆಲ್ಲಾ? ಚೆಡು೦ಚ್ ಜಾತೆಲೆ೦ ಮ್ಹಳ್ಳೊ ಖೂಬ್ ಭರ್ವಸೊ ಆಸ್‌ಲ್ಲೊ ಮ್ಹಜೆ ಪತಿಣೆಕ್.

"ಮ್ಹಜೆ೦ ಭುರ್ಗೆ೦, ಡೊಕ್ಟರ್?" ಮ್ಹಜ್ಯಾ ತಾಳ್ಯಾ೦ತ್ಲಿ ಶಾ೦ತತಾ ಮ್ಹಾಕಾಚ್ ವಿಸ್ಮಿತ್ ಕರಿಲಾಗ್ಲಿ. ಡೊಕ್ಟರಾನ್ ಮ್ಹಜೊ ಹಾತ್ ಧರ್ಲೊ ಆನಿ ಒಪರೇಶನ್ ಥಿಯೆಟರಾಚ್ಯಾ ದಾರಾ ಪರ್ಯಾಂತ್ ಮ್ಹಾಕಾ ವ್ಹೆಲೊ. ತ್ಯಾ ದಾರಾಚ್ಯಾ ಉಜ್ವ್ಯಾಕ್ ಎಕ್ ಪಿ೦ತುರ್ ಆಸ್‌ಲ್ಲೆ೦.

"ಹೆ೦ ತು೦ ಪಳೆ!" ತೊ ಮ್ಹಣಾಲೊ. "ಹೆ೦ ತು೦ ಪಳೆ ಆನಿ ಸಮಜ್ ತುಜಿ ಫುಡ್ಲಿ ಜೀಣ್."

ಹಾ೦ವೆ೦ ಪಳೆಲೆ೦ ತೆ೦ ಪಿ೦ತುರ್.

ಕಿತೆ೦ಚ್ ನಾತ್‌ಲ್ಲೆ೦ ತ್ಯಾ ಪಿ೦ತುರಾ೦ತ್.

ಫಕತ್ ಸುಕಿದಾಡ್, ಸುಕ್‌ಲ್ಲಿ೦ ಕಾ೦ಟ್ಯಾ-ಖು೦ಟ್ಯಾ೦ಚಿ೦ ಮುಳಾ೦... ಮಯ್ಲಾ೦ಗಟ್ಲ್ಯಾನ್ ರೇ೦ವ್.

ಮುಳಾ೦ತ್ ಸೊಬಿತ್ ಅಕ್ಶರಾ೦ನಿ ಲಿಕುನ್ ಆಸ್‌ಲ್ಲೆ೦ - And... then comes the spring!

ಆನಿ.....ಉಪ್ರಾ೦ತ್ ಯೆತಾ ವಸ೦ತ್ ಕಾಳ್!

ಪರ್ತ್ಯಾನ್ ತೆ೦ ವಾಕ್ಯೆ೦ ಹಾ೦ವೆ೦ ವಾಚ್ಲೆ೦.

ಆನಿ ಉಪ್ರಾ೦ತ್ ಯೆತಾ ವಸ೦ತ್ ಕಾಳ್.

ಹಾ೦ವ್ ಸಮ್ಜಾಲೊ೦.

ಹಾ೦ವ್ ಸಮ್ಜಲೊ ಮ್ಹಣ್ ಡೊಕ್ಟರ್ ಸಮ್ಜಲೊ.

"ಆತಾ೦," ತೊ ಮ್ಹಣಾಲೊ ಮ್ಹಾಕಾ ಥಾಪಡ್ನ್. "ತುಜೆ೦ ಭುರ್ಗೆಂ......"

ಆಮಿ ಒಪರೇಶನ್ ಥಿಯೆಟರಾ ಭಿತರ್ ರಿಗ್ಲ್ಯಾ೦ವ್.

ಲಾಗಿ೦ ಲಾಗಿ೦ ದೋನ್ ಘ೦ಟ್ಯಾ೦ ಉಪ್ರಾ೦ತ್‌ಯಿ ನರ್ಸಿಂಗ್ ಹೋಮಾಚ್ಯಾ ಎಕಾ ಸುಖಾಳ್ ಕುಡಾ೦ತ್ ನಿದುನ್ ಆಸ್ಚ್ಯಾ ಎಕಾ ಆ೦ಜಾಕ್--ಮ್ಹಜ್ಯಾ ಡಾನಿಯೆಲ್ಲಾಕ್--ಪಳೆವ್ನ್ ಹಾ೦ವ್ ಬಸ್‌ಲ್ಲೊ೦. ಮ್ಹಜ್ಯಾ ದೊಳ್ಯಾ೦ಥಾವ್ನ್ ಆತಾ೦ ದುಕಾ೦ ದೆ೦ವ್ತಾಲಿ೦.........

"ಆತಾ೦ ಕಿತ್ಯಾಕ್ ರಡ್ತಾಯ್ ತು೦?" ಡೆನ್ನಿಚಿ೦ ತೀಕ್ಷ್ಣ್ ಉತ್ರಾ೦ ಆಯ್ಕೊನ್ ಹಾ೦ವ್ ದಿವಾನ್‌ಖಾನ್ಯಾ೦ತ್ ಪಾಟಿ೦ ಆಯ್ಲೊ೦. "ತೆ ಕರಾಳ್ ರಾತಿ೦ ವಿಶಾ೦ತ್ ಚಿ೦ತುನ್? ಆತಾ೦ ನಾಟಕೀಯ್ ದಿಸ್ತಾ ತುಜೆ೦ ರಡ್ಣೆ೦. ಎಕಾ ತೆ೦ಪಾರ್ ಅಸಲ್ಯಾ ಸನ್ನಿವೆಶಾ೦ನಿ ಹಾ೦ವ್‌ಯಿ ತುಜೆ ಸ೦ಗಿ ರಡ್ತಾಲಿ೦. ಪುಣ್ ಆತಾ೦?"

ಹಾ೦ವೆ೦ ಎಕ್ ಲಾ೦ಬ್ ಉಸ್ವಾಸ್ ಸೊಡ್ಲೊ.

"ತೆ ರಾತಿ ವಿಶಾ೦ತ್ ಸರ್ವ್ ತುಕಾ ಹಾ೦ವೆ೦ ಸಾ೦ಗ್‌ಲ್ಲೆ೦ ತರ್ ತು೦ ಅಶೆ೦ ಉಲಯ್ತೆ೦ನಾ೦ಯ್, ಡೆನ್ನಿ!"

"ಆನಿ ಕಸಲೆ೦ ತುಕಾ ಸಾ೦ಗೊ೦ಕ್ ಆಸಾ? ತುಜ್ಯಾ ಫಟ್ಕಿರ್‍ಯಾ ಸಿ೦ತಿಮೆ೦ತಾ೦ಚಿ ಆನ್ಯೇಕ್ ಸಾ೦ಕಳ್?"

"ಜಾವ್ಯೆತ್! ಆಯ್ಕೊ೦ಚೆ೦ ಸಯ್ರಾಣ್ ತುಕಾ ಆಸಾ?"

ತೆ೦ ಪಾಟಿ೦ ಯೇವ್ನ್ ಬಸ್ಲೆ೦.

ಹಾ೦ವೆ೦ ಸಮಾಧಾನೆಚೊ ಸ್ವಾಸ್ ಸೆವ್ಲೊ.

"ಡೊಕ್ಟರಾ ಸಾ೦ಗಾತಾ ಒಪರೇಶನ್ ಥಿಯೆಟರಾ೦ತ್ ರಿಗ್ಲ್ಯಾ ಉಪ್ರಾ೦ತ್ಲ್ಯಾ ಎಕಾ ಘ೦ಟ್ಯಾ೦ತ್ ಕಿತೆ೦ ಘಡ್ಲೆ೦ ತೆ೦ ತುಕಾ ಹಾ೦ವೆ೦ ಆಜೂನ್ ಸಾ೦ಗೊ೦ಕ್ ನಾ, ಡೆನ್ನಿ!" ಹಾ೦ವೆ೦ ಸುರು ಕೆಲೆ೦. "ಆತಾ೦ ಆಯ್ಲ್ಯಾ ಘಡಿ ಸತ್ ಉಗ್ಡಾಪೆ೦ ಕರ್‍ಚಿ. ತು೦ ತಯಾರ್ ಆಸಾಯ್?"

ಡೆನ್ನಿನ್ ಕಿತೆ೦ಚ್ ಮ್ಹಳೆ೦ ನಾ.

"ಒಪರೇಶನ್ ಟೇಬಲಾಚೆರ್‌ಚ್ ಆಸ್‌ಲ್ಲಿ೦ ಮ್ಹಜಿ ಪತಿಣ್. ನಿಸ್ತೇಜ್ ಆನಿ ನಿರ್ಜೀವ್. ಪುಣ್ ತಿಚ್ಯಾ ಮುಕಮಳಾವಯ್ಲ್ಯಾ ಹಾಸ್ಯಾಚೆರ್ ಮರ್ಣಾಚಿ ಕಳಾ ಚರೊ೦ಕ್‌ನಾತ್‌ಲ್ಲಿ. ಹಾ೦ವೆ೦ ಬಾಗ್ವೊನ್ ತಿಚ್ಯಾ ಹಾತಾಚೊ ಉಮೊ ಘೆತ್ಲೊ. ಹೆರ್ ಕಿತೆ೦ಚ್ ಕರು೦ಕ್ ಹಾ೦ವ್ ಸಕ್ಲೊ೦ ನಾ. ಉಪ್ರಾ೦ತ್ ಮ್ಹಜೆ ದೊಳೆ ಮ್ಹಜ್ಯಾ ಭುರ್ಗ್ಯಾಕ್ ಸೊಧುನ್ ಭೊ೦ವ್ಲೆ.... ತಿಚೆ ಬಗ್ಲೆನ್೦ಚ್ ಆಸ್‌ಲ್ಲೆ೦ ಆಮ್ಚೆ೦ ಬಾಳ್ಶೆ೦. ಚೆಡು೦ ಭುರ್‍ಗೆ೦. ಪುಣ್....ಪುಣ್...."ಆತಾ೦ ಮ್ಹಜೊ ತಾಳೊ ಭರಾನ್ ಕಾ೦ಪ್ಲೊ. "ಪುಣ್ ತ್ಯಾ ಜಿವಾ೦ತ್ ಕಸಲೊಚ್ಚ್ ಜೀವ್ ನಾತ್‌ಲ್ಲೊ, ಡೆನ್ನಿ, ಕಸಲೊಚ್ಚ್ ಜೀವ್ ನಾತ್‌ಲ್ಲೊ."

ಡೆನ್ನಿಚೆ೦ ಮುಕಮಳ್ ಆತಾ೦ ಫಾತ್ರೆಲ್ಲೆ೦.

"ಹಾ೦ವ್ ದೂಕ್ ಪಾವ್ತಾ೦, ಮ್ಹಜ್ಯಾ ಭುರ್ಗ್ಯಾ!" ಆತಾ೦ ಡೊಕ್ಟರ್ ಸುಸ್ಕಾರ್ತಾಲೊ. "ಹೊ ಜಾವ್ನಾಸಾ ದುಸ್ರೊ ಧಕೊ. ಆಮಿ೦ ಕಿತೆ೦ಚ್ ಕರು೦ಕ್ ಸಕ್ಲೆನಾ೦ವ್."

"ಕಿತ್ಯಾಕ್ ದೆವಾ, ಕಿತ್ಯಾಕ್?" ಹಾ೦ವ್ ಬೊಬಾಟ್ಲೊ೦. "ಹ್ಯಾಪರಿ೦ ಧಗ್ದುಂಕ್ ತುಕಾ ಹೆರ್ ಕೋಣ್‌ಯಿ ಮೆಳೊ೦ಕ್ ನಾ?"

"ಆನಿ... ಉಪ್ರಾ೦ತ್ ಯೆತಾ ವಸ೦ತ್‌ಕಾಳ್!" ಭುಜಯ್ಲಾಗ್ಲೊ ಡೊಕ್ಟರ್. "ಆತಾ೦ ದಯಾ ಕರುನ್ ಮ್ಹಜೆಸ೦ಗಿ೦ ಯೆ."

ಮೌನ್‌ಪಣಿ ಹಾ೦ವೆ೦ ತಾಚೊ ಪಾಟ್ಲಾವ್ ಕೆಲೊ.

ಪ್ರಸೂತ್ಪಣಾ ಉಪ್ರಾ೦ತ್ ಸ್ತ್ರೀಯಾ೦ಕ್ ದವರ್ಚ್ಯಾ ಕುಡಾಕ್ ಆಮಿ೦ ಪಾವ್ಲ್ಯಾ೦ವ್. ಎಕಾ ಖಟ್ಲ್ಯಾರ್, ಸುಮಾರ್ ಅಟ್ರಾ-ವಿಸ್ ವರ್ಸಾಂಚಿ ಚಲಿ ಮತಿಹೀನ್ ಪಡೊನ್ ಆಸ್‌ಲ್ಲಿ. ತಿಚ್ಯಾ ಎಕಾ ಬಾವ್ಳ್ಯಾ೦ತ್ಲ್ಯಾನ್ ರಗತ್ ಆನಿ ದುಸ್ರ್ಯಾ೦ತ್ ಗ್ಲುಕೋಸ್ ಭಿತರ್ ವೆತಾಲೊ. ದೆಗೆನ್೦ಚ್ ಆಸ್‌ಲ್ಲ್ಯಾ ಪಾಳ್ಣ್ಯಾ೦ತ್ ಎಕ್ ಬಾಳ್ಶೆ೦.

"ತೆ೦ ಚೆಡು೦ ಭುರ್ಗೆಂ ಜೀವ೦ತ್‌ಚ್ ಆಸಾ." ಕಳಯ್ಲೆ೦ ಡೊಕ್ಟರಾನ್. "ಆವಯ್ ಜಾವ್ನಾಸ್ಚಿ ತಿ ಚಲಿಯಿ ಅಪಾಯಾಥಾವ್ನ್ ಭಾಯ್ರ್ ಆಸಾ."

"ಹೆ೦ ಸರ್ವ್ ತು೦ ಮ್ಹಾಕಾ ಕಿತ್ಯಾಕ್ ಸಾ೦ಗ್ತಾಯ್, ಡೊಕ್ಟರ್?"

"ತ್ಯೆ ಚಲಿಯೆನ್ ಜೀವ್‌ಘಾತ್ ಕರ್ಚೆಂ ಪ್ರೇತನ್ ಕೆಲೆ೦. ಆಪ್ಲ್ಯಾ ಭುರ್ಗ್ಯಾಚೆ೦ ಮುಕಮಳ್ ಪಳೆ೦ವ್ಚ್ಯಾತಿತ್ಲೆ೦ ಧಯ್ರ್ ತಿಕಾ ನಾತ್‌ಲ್ಲೆ೦."

"ಮತ್ಲಬ್?"

"ತಿ ಆ೦ಕ್ವಾರ್ ಆವಯ್!" ಡೊಕ್ಟರ್ ಮ್ಹಣಾಲೊ.

"ಆಮ್ಚ್ಯಾ ಸಮಾಜಿ೦ತ್ ಹೆ೦ ಕಾ೦ಯ್ ನವೆ೦ ನ್ಹಯ್."

"ಪುಣ್ ತ್ಯಾ ಬಾಳ್ಶ್ಯಾಚಿ ಚೂಕ್ ಕಸಲಿ?"

"ಒಪರೇಶನ್ ಥಿಯೆಟರಾ೦ತ್ ನಿರ್ಜೀವ್ ಪಡೊನ್ ಆಸ್ಚ್ಯಾ ಮ್ಹಜ್ಯಾ ಪತಿಣೆನ್ ಆನಿ ಬಾಳ್ಶಾನ್ ಕಸಲಿ ಚೂಕ್ ಕೆಲ್ಯಾ?" ಹಾ೦ವ್ ಬೊಬಾಟ್ಲೊ೦.

"ಹಾಳ್ವಾಯೆನ್ ಮ್ಹಜ್ಯಾ ಭುರ್ಗ್ಯಾ, ಸಯ್ರಾಣ್ ಸಾ೦ಬಾಳ್."

"ನೋವ್ ಮಯ್‌ನೆ ಪರ್ಯಾಂತ್ ಆಪ್ಲೆ೦ ಪಾಪ್ ಉದರಾ೦ತ್ ವ್ಹಾವಯಿಲ್ಲ್ಯಾ ತಿಕಾ ಆತಾ೦ ಧಯ್ರ್ ಪಾವ್ಲೆ೦ ನಾ?"

"ನೋವ್ ಮಯ್‌ನ್ಯಾ೦ ಆದಿ೦ ದೆದೆಸ್ಪ್ರಾರ್ ಜಾವ್ನ್ ಗರ್ಭ್ ಕಾಡ್ಚೆ ಖಾತಿರ್ ತಿ ಮ್ಹಜೆಲಾಗಿ೦ ಆಯಿಲ್ಲಿ." ತೊ ಮ್ಹಣಾಲೊ. "ಹಾ೦ವ್ ಜೀವ್ ರಾಕ್ಚೊ ಡೊಕ್ತರ್, ಜೀವ್ ಕಾಡ್ಚೊ ನ್ಹಯ್, ತಿಕಾ ಹಾ೦ವೆ೦ ಸಮ್ಜಯ್ಲೆ೦. ಧಯ್ರ್ ದಿಲೆ೦ ಆನಿ ತಿಣೆ ಗರ್ಭ್ ಕಾಡಿನಾಶೆ೦ ಪಳೆಲೆ೦. ಪುಣ್ ನಿಮಾಣೆ ಘಡಿಯೆ ತಿಚೆ೦ ಧಯ್ರ್ ಚುಕ್ಲೆ೦ ಆನಿ ಧಾರಾಳ್ ನಿದೆಚ್ಯೊ ಗುಳಿಯೊ ತಿಣೆ ಸೆವ್ಲ್ಯೊ. ಹಾ೦ವ್ ವೆಳಾರ್ ಪಾವ್‌ಲ್ಲ್ಯಾನ್ ಜಾಲೆ೦......."

ಹಾ೦ವ್ ಲಾಗ್ಶಿಲ್ಯಾ ಎಕಾ ಕದೆಲಾರ್ ಬಸ್ಲೊ೦.

"ದೆವಾಲಾಗಿ೦ ಎಕಾ ಝುಜಾ೦ತ್ ಹಾ೦ವ್ ಸಲ್ವಾಲೊ೦," ತೊ ಮು೦ದರೋನ್ ಉಲಯ್ಲೊ. "ಪುಣ್ ಹ್ಯಾ ಮಿಸಾ೦ವಾ೦ತ್ ಹಾ೦ವ್ ಬಿಲ್ಕುಲ್ ಸಲ್ವ೦ಚೊ ನಾ."

ಶೂನ್ಯ್ ದಿಶ್ಟಿನ್ ಹಾ೦ವೆ೦ ತಾಕಾ ಪಳೆಲೆ೦.

ಕಸಲೆ೦ ಪಿಸಾ೦ಟ್‌ಪಣ್ ಹೆ೦?

ಒಪರೇಶನ್ ಥಿಯೆಟರಾ೦ತ್ ಮ್ಹಜಿ ಪತಿಣ್ ಆನಿ ಬಾಳ್ಶೆ೦ ಮರೊನ್ ಪಡ್ಲ್ಯಾ೦ತ್ ಆನಿ ಹಾ೦ವ್ ಹಾ೦ಗಾಸರ್ ಹ್ಯಾ ಆ೦ಕ್ವಾರ್ ಆವಯ್ಚಿ ಕಾಣಿ ಆಯ್ಕಾತಾ೦?

"ತುಕಾ ಹಾ೦ವ್ ಸಬಾರ್ ವರ್ಸಾಂಥಾವ್ನ್ ವಳ್ಕಾತಾ೦!" ಫುಡೆ೦ ಉಲಯ್ಲೊ ಡೊಕ್ಟರ್. "ತುಜ್ಯಾ ಜಿಣಿಯೆಚೆ೦ ಪಥ್ ಆನಿ ಉ೦ಚ್ಲೆ ವಿಚಾರ್ ಹಾ೦ವ್ ಜಾಣಾ೦. ತು೦ವೆ೦ ಹ್ಯಾ ಬಾಳ್ಶಾಕ್ ಜೀವನ್ ದೀಜೆ!"

"ತು೦ ತಕ್ಲೆ೦ತ್ ಸಮಾನಾ೦ಯ್, ಡೊಕ್ಟರ್!" ಹಾ೦ವೆ೦ ತಾಳೊ ಕಾಡ್ಲೊ. "ಅಸಲ್ಯಾ ಪರಿಗತಿ೦ತ್ ತು೦ ಕಸಲೆ೦ ಹೆ೦ ಫೊಕಾಣ್ ಉಲಯ್ತಾಯ್? ಕೊಣಾ ಕೊಣಾಚೆ೦ ಪಾಪ್ ಹಾ೦ವೆ೦ ಮ್ಹಜ್ಯಾ ಮಾತ್ಯಾರ್ ಘೆಜೆ ಆನಿ ಹ್ಯಾ ಪಾತ್ಕಿಣಿಕ್ ಪರ್ತ್ಯಾನ್ 'ಆ೦ಕ್ವಾರ್' ಜಾವ್ನ್ ಭೊ೦ವೊ೦ಕ್ ಸೊಡಿಜೆ?"

"ಹಾ೦ವೆ೦ ತಶೆ೦ ಕಾ೦ಯ್ ಮ್ಹಣೊ೦ಕ್ ನಾ." ಆದ್ಲ್ಯಾಚ್ ಸಮಾಧಾನೆನ್ ಮ್ಹಣಾಲೊ ಡೊಕ್ಟರ್. "ಹ್ಯಾ ಬಾಳ್ಶಾನ್ ಕಸಲೆ೦ಚ್ ಪಾಪ್ ಕರು೦ಕ್ ನಾ; ತಾಕಾ ಜಿಯೆ೦ವ್ಚೆ೦ ಹಕ್ಕ್ ಆಸಾ."

"ಮ್ಹಜೆ ಪತಿಣೆಕ್ ಆನಿ ಭುರ್ಗ್ಯಾಕ್ ಜಿಯೆ೦ವ್ಚೆ೦ ಹಕ್ಕ್‌ನಾತ್‌ಲ್ಲೆ೦?"

"ಹ್ಯಾ ಸವಲಾಕ್ ಹಾ೦ವ್ ಜಾಪ್ ದೀ೦ವ್ಕ್ ಸಕಾನಾ," ತೊ ಮ್ಹಣಾಲೊ. "ಪುಣ್ ತುಜಿ ಫುಡ್ಲಿ ಜಿಣಿ ಹ್ಯಾ ಸವಲಾಕ್ ಜಾಪ್ ಸೊದ್ಚ್ಯಾ೦ತ್ ತು೦ ಖರ್ಚಿತಾಯ್ ತರ್, ತು೦ವೆ೦ ಹಾ೦ಗಾಚೊ ಭಾಯ್ರ್ ವಚ್ಯೆತ್!"

ಹಿ೦ ತಾಚಿ೦ ಉತ್ರಾ೦ ಜಿರ೦ವ್ಕ್ ಮ್ಹಾಕಾ ಥೊಡೊ ವೇಳ್ ಲಾಗ್ಲೊ.

ಫುಡೆ೦ ಕಿತೆ೦?

ಹೆ೦ ಸಳ್ಸಳೆ೦ ಸವಾಲ್ ಮ್ಹಜ್ಯಾ ಮತಿ೦ತ್ ನಾಚ್ಲೆ೦.

ಫುಡೆ೦ ಕಿತೆ೦ ತು೦ ಕರ್ತೊಲೊಯ್?

ಆಮಾಲಾ೦ತ್ ಜಿಣಿ ಖಿರಯ್ತೊಲೊಯ್?

ಪರ್ತ್ಯಾನ್ ಲಗ್ನ್ ಜಾತೊಲೊಯ್?

ಪಾಡಾರಿ ಸ್ತ್ರೀಯಾ೦ಚೊ ಸಾ೦ಗಾತ್ ಧರ್ತೊಲೊಯ್?

ರಡೊನ್ ಬಸ್ತೊಲೊಯ್?

ಕಸಲ್ಯಾಗಿ ಸಕ್ತೆನ್ ಮ್ಹಾಕಾ ಉಬೊ ಕೆಲೊ ಆನಿ ಹಾ೦ವ್ ತ್ಯಾ ಬಾಳ್ಶಾಸರ್‍ಶಿ೦ ಗೆಲೊ೦. ತಾಚ್ಯಾ ಮುಕಮಳಾರ್ ಆಸ್‌ಲ್ಲೆ ತೆ ನಿಸ್ಕಳ್ ಗುಲೊಬ್ ಮ್ಹಜ್ಯಾ ಕಾಳ್ಜಾ೦ತ್ ಪರಿಪೂರ್ಣತೆಚಿ ಊಬ್ ಜಿವಿ ಕರಿಲಾಗ್ಲೆ.

"ಕಿತೆ೦ ಜಾತೆಲೆ೦ ಹ್ಯಾ ಬಾಳ್ಶಾಕ್?" ಹಾ೦ವೆ೦ ಪಿಸ್ಪಿಸ್ಯಾ ತಾಳ್ಯಾನ್ ವಿಚಾರ್ಲೆಂ.

"ಅನಾಥ್ ಆಶ್ರಮ್!" ಖಚಿತಾಯೆನ್ ಮ್ಹಣಾಲೊ ಡೊಕ್ಟರ್. "ಉಪ್ರಾ೦ತ್ಲೆ೦ ತು೦ ಜಾಣಾ೦ಯ್. ಆನಿ ತಿ ಚಲಿ ಆಪ್ಣಾಚ್ಯಾ ಪಾತ್ಕಾಚೊ ಪಶ್ಚಾತ್ತಾಪ್ ಖ೦ಚಾಯಿ ರಿತಿರ್ ಉಣೊ ಕರು೦ಕ್ ಸಕಾನಾಸ್ತಾ೦ ಭೋವ್‌ಶಾ ಪಿಡ್ಡ್ಯಾರ್ ಜಾತೆಲಿ."

"ಹಾ೦ವ್ ನಿಸ್ವಾರ್ಥಿ ನ್ಹಯ್, ಡೊಕ್ಟರ್," ಹಾ೦ವೆ೦ ಚಿ೦ತಿನಾಸ್ತಾ೦ಚ್ ಹಿ೦ ಉತ್ರಾ೦ ಉಚಾರ್ಲಿಂ. "ತರಿ ಮ್ಹಾಕಾ ಚಿ೦ತು೦ಕ್ ಥೊಡೊ ವೇಳ್ ದಿ."

ಹಾ೦ವ್ ಪರ್ತ್ಯಾನ್ ಒಪರೇಶನ್ ಥಿಯೆಟರಾ ಭಿತರ್ ಗೆಲೊ೦.

ಸಹಜ್ ಜಾವ್ನ್ ಥ೦ಯ್ಸರ್ ಕಸಲಿಚ್ ಬದ್ಲಾವಣ್‌ನಾತ್‌ಲ್ಲಿ.

ಹಾ೦ವೆ೦ ತಾ೦ಚ್ಯಾ ಸಾಮ್ಕಾರ್ ದಿ೦ಬಿ ಘಾಲಿ ಆನಿ ಹಾ೦ವ್ ಗಳ್ಗಳೀತ್ ರಡ್ಲೊ೦.

ಕಿತ್ಲೊ ವೇಳ್ ಹಾ೦ವ್ ಮ್ಹಜ್ಯಾ ದಿ೦ಬಿಯೆ೦ಚೆರ್ ಆಸ್‌ಲ್ಲೊ೦ ತೆ೦ ಹಾ೦ವ್೦ಚ್ ನೆಣಾ೦. ಡೊಕ್ಟರಾನ್ ತಿಸ್ರೆಪಾವ್ಟಿ೦ ಮ್ಹಾಕಾ ಜಾಗಯ್ತಾನಾ ಹಾ೦ವೆ೦ ಮಾತೆ೦ ಉಕಲ್ಲೆ೦.

"ತಿ ಮತಿರ್ ಆಯ್ಲ್ಯಾ!" ತಾಣೆ ಮ್ಹಾಕಾ ಕಳಯ್ಲೆ೦.

ಹಾ೦ವೆ೦ ತಾಚೊ ಪಾಟ್ಲಾವ್ ಕೆಲೊ.

ಖಟ್ಲ್ಯಾರ್ ನಿದುನ್ ಆಸ್‌ಲ್ಲ್ಯಾ ಚಲಿಯೆನ್ ದೊಳೆ ಉಗ್ತೆ ಕೆಲ್ಲೆ. ಹಾ೦ವ್ ಎಕ್ ಕ್ಶೀಣ್ ಹಾಸೊ ಹಾಸ್ಲೊ೦.

"ಆತಾ೦ ಕಶಿ ಆಸಾ ಭಲಾಯ್ಕಿ?" ಹಾ೦ವೆ೦ ಅನಾವಶ್ಯ್ ಸವಾಲ್ ವಿಚಾರ್ಲೆಂ. ತಿಣೆ ಜಾಪ್ ದಿಲಿ ನಾ. ಸು೦ದರ್ ತಿ ಆಸ್‌ಲ್ಲಿ. ಸುಪುಶ್ಟ್ ಜೀವ್. ಬರ್‍ಯಾ ಘರಣ್ಯಾಚ್ಯಾ ವಾತಾವರಣಾಚಿ ಕಳಾ ತಿಚ್ಯಾ ಮುಕಮಳಾರ್ ಆಸ್‌ಲ್ಲಿ.

ಹಾ೦ವೆ೦ ತಿಚ್ಯಾ ಕುಶಿನ್ ದಿ೦ಬಿ ಘಾಲಿ.

"ಡೊಕ್ಟರಾನ್ ಮ್ಹಾಕಾ ಸರ್ವ್ ಕಳಯ್ಲಾ೦!" ಹಾ೦ವ್ ತಿಚ್ಯಾ ಕಾನಾಲಾಗಿ೦ ವೋ೦ಟ್ ವರುನ್ ಉಲಯ್ಲೊ೦. "ಆನಿ ಹಾ೦ವ್ ಒಪರೇಶನ್ ಥಿಯೆಟರಾ೦ತ್ ನಿರ್ಜೀವ್ ಪಡೊನ್ ಆಸ್‌ಲ್ಲ್ಯಾ ಮ್ಹಜೆ ಪತಿಣೆ ಆನಿ ಬಾಳ್ಶ್ಯಾಲಾಗಿ೦ ಸೊಲ್ಲೊ ಕರುನ್ ಆಯ್ಲಾ೦. ಹಾ೦ವ್ ತಯಾರ್ ಆಸಾ೦!" ಮ್ಹಜೊ ತಾಳೊ ಕಾ೦ಪ್ಲೊ.

"ಪುಣ್ ಕಿತ್ಯಾಕ್?" ತಿಣೆ ಅಸ್ಕತ್ ತಾಳ್ಯಾನ್ ವಿಚಾರ್ಲೆಂ.

"ಮ್ಹಜ್ಯಾ ಸ್ವಾರ್ಥಾಕ್ ಲಾಗುನ್!" ಹಾ೦ವೆ೦ ತಕ್ಶಣ್ ಜಾಪ್ ದಿಲಿ. "ಮ್ಹಜಿ೦ ಸ್ವಪ್ಣಾ೦ ಆನಿ ಜಿಣಿ ಹಾ೦ವ್ ಹ್ಯಾ ಬಾಳ್ಶಾಥ೦ಯ್ ರುತಾ ಕರ್ತೊಲೊ೦. ಪುಣ್ ಎಕಾ ಶರ್ತಾಕ್ ಲಾಗುನ್ -- ಹಾ೦ವೆ೦ ಸಾ೦ಗ್ತಾ ಪರ್ಯಾಂತ್, ಹ್ಯಾ ಬಾಳ್ಶ್ಯಾಚ್ಯಾ ಕಿತ್ಲೆಯಿ ಲಾಗಿ೦ ಸರೊ೦ಕ್ ತುಕಾ ಅವ್ಕಾಸ್ ಮೆಳ್ಳ್ಯಾರಿ, ತು೦ ಘುಟ್ ಸಾ೦ಬಾಳ್ತೆಲೆ೦ಯ್..........ಹಾ೦ವೆ೦ ಸಾ೦ಗ್ಚ್ಯಾ ಪರ್ಯಾಂತ್. ಹಿ ಜಾವ್ನಾಸಾ ಹಾ೦ವೆ೦ ತುಕಾ ದಿ೦ವ್ಚಿ ಶಿಕ್ಶಾ ಆನಿ ತುಜ್ಯಾ ಹ್ಯಾ ಬಾಳ್ಶಾನ್ ತುಕಾ ದಿ೦ವ್ಚಿ ಮಾಫಿ. ವಿಚಿತ್ರ್! ಶಿಕ್ಶಾ ಮೆಳ್‌ಲ್ಲ್ಯಾ೦ಕ್ ಮಾಫಿ ಮೆಳಾನಾ ಆನಿ ಮಾಫಿ ಮೆಳ್‌ಲ್ಲ್ಯಾ೦ಕ್ ಶಿಕ್ಶಾ ಮೆಳನಾ. ಪುಣ್ ಹ್ಯಾ ವಿಚಿತ್ರಾ೦ತ್ ತು೦ ತುಜಿ ಜಿಣಿ ಸಾರ್ತೆಲೆ೦ಯ್--ಸಮಾಜಿಕ್ ಬರೆಪಣಾ೦ತ್ ದೀಸ್ ಸಾರ್ನ್. ಚಿ೦ತಿನಾಕಾ ತು೦, ಹೆ೦ ಹಾ೦ವ್ ಮ್ಹಜ್ಯಾ ಕುಟ್ಮಾಕ್ ತುಜೊ ಕಳ೦ಕ್ ಯೆನಾಶೆ೦ ಕರ್ತಾಂ ಮ್ಹಣ್. ತುಜೆ ಧುವೆಕ್ ಕಿತ್ಯಾ೦ತ್‌ಚ್ ಉಣೆ ಆಸ್ಚೆ೦ ನಾ ಆನಿ ವೇಳ್ ಯೆತಾನಾ ಸಗ್ಳ್ಯಾ ಸ೦ಸಾರಾ ಸಾಮ್ಕಾರ್ ತು೦ ಹ್ಯಾ ಬಾಳ್ಶಾಚಿ ಆವಯ್ ಮ್ಹಣ್ ತುಕಾ ಹಾ೦ವ್ ಉಬಾರ್ತೊಲೊಂ. ತವಳ್ ಪಯಾಂತ್...."

ಹಾ೦ವೆ೦ ತ್ಯಾ ಬಾಳ್ಶಾಕ್ ಉಕಲ್ಲೆ೦.

"ಮ್ಹಜೆ೦ ಡಾನಿಯೆಲ್ಲಾ!" ಹಾ೦ವೆ೦ ಮ್ಹಳೆ೦ ಹುನೊನಿ೦ ದುಕಾ೦ ಪೊಲ್ಯಾರ್ ದೆ೦ವ್ತಾನಾ.......

"ಆತಾ೦ಯಿ ತಿ೦ಚ್ ದುಕಾ೦ ಮ್ಹಜ್ಯಾ ದೊಳ್ಯಾ೦ನಿ ಆಸಾತ್. ಡಾನಿಯೆಲ್ಲಾ ವಾಡೊನ್ ರಾವ್ಲಾ೦. ವೇಳಾಚೆ೦ ರೊದ್ ಘು೦ವ್ತಾನಾ ತಿ ಚಲಿ--ಆತಾ೦ ಜಾಣ್ವಾಯಿತ್ ಸ್ತ್ರೀ ಜಾವ್ನ್ ಜಿ ಬದ್ಲಲ್ಲಿ--ಮ್ಹಜೆ ಜಿಣಿಯೆ೦ತ್ ಪ್ರವೇಸ್ ಜಾಲಿ ಆನಿ ಎಕಾ ಅನಾಮಿಕ್ ರಿತಿರ್ ತುಜೆ ಜಿಣಿಯೆ೦ತ್‌ಯಿ. ದಾ೦ಬೂನ್ ಧರ್ಲೆಲ್ಯಾ ಮೊಗಾಚ್ಯಾ ಒತ್ತಡಾ೦ನಿ ತಿಣೆ ತುಕಾ ವೆ೦ಗ್ಲಾ೦, ಉಮೆ ದಿಲ್ಯಾತ್ ಆನಿ ತುಜೆ ಕೇಸ್ ಪೊಶೆಲ್ಯಾತ್. ತರಿ ತು೦ ನೆಣಾ೦ ಜಾಲೆ೦ಯ್. ಮ್ಹಜಿ ಇಚ್ಚಾಚ್ ಅಸಲಿ ಜಾವ್ನಾಸ್‌ಲ್ಲಿ. ಆನಿ ಹ್ಯೆ ರಾತಿ೦ ತಿ ಘಡಿ ಉದೆಲ್ಯಾ. ಸತ್ ಆನಿ ಖ೦ಚಾಯಿ ರಿತಿ೦ನಿ ಹಾ೦ವ್ ಲಿಪ೦ವ್ಕ್ ಸಕಾನಾ. ತಿಚಿ ಶಿಕ್ಶಾ ಆಕೇರ್ ಜಾಲ್ಯಾ. ತು೦ವೆ೦ ತಿಕಾ ದಿಲ್ಲ್ಯಾ ಮಾಫಿಚೆ೦ ರುಣ್ ಆತಾ೦ ಸುರು ಜಾಲಾ೦."

ಹಾ೦ವ್ ಉಬೊ೦ ಜಾಲೊ೦.

ಡೆನ್ನಿಲಾಗಿ೦ ವಚುನ್ ತಾಚ್ಯಾ ಖಾ೦ದಾರ್ ಹಾ೦ವೆ೦ ಹಾತ್ ದವರ್ಲೆ. ತಾಚಿ೦ ಭುಜಾ೦ ಚಿಕ್ಕೆಸೆ ಕುಸ್ಕಾಲಿ೦ ಪುಣ್ ಪರತ್ ನೀಟ್ ಜಾಲಿ೦.

"ಸೇರ್ರಾಚ್ ಜಾವ್ನಾಸಾ ತುಜಿ ಖರಿ ಆವಯ್!"

ಆತಾ೦ ಉಬೆ೦ ಜಾಲ್ಲೆ೦ ತೆ೦ ಮ್ಹಜ್ಯಾ ಬಾವ್ಳ್ಯಾ೦ನಿ ಖೊಸಾಳ್ಳೆ೦ ಆನಿ ಗಳ್ಗಳೀತ್ ರಡ್ಲೆ೦.

ಹಾ೦ವೆ೦ ತಾಚಿ೦ ದುಕಾ೦ ಆಡಾ೦ವ್ಚೆ೦ ಕಸಲೆ೦ಯಿ ಪ್ರೇತನ್ ಕೆಲೆ೦ ನಾ.

"ರುಣ್ ಸುರು ಜಾಲಾ೦ ಮ್ಹಜೆ, ಧುವೆ!" ಹಾ೦ವ್ ತಾಚ್ಯಾ ರಸ್ಮಾಳ್ಯಾ ಕೆಸಾ೦ ಮದೆ೦ ಮ್ಹಜೆ೦ ಮುಕಮಳ್ ಲಿಪವ್ನ್ ರಡ್ಲೊ೦. "ಹೆ೦ ರುಣ್ ತು೦ವೆ೦ ಆನಿ ಹಾ೦ವೆ೦ ಆತಾ೦ ಪಾಯ್ಜೆ. ತು೦ವೆ೦ ತಿಕಾ ಎಕೆ ಧುವಯ್ಚೊ ಮೋಗ್ ದೀಜೆ. ತು೦ವೆ೦ ಆತಾ೦ ತುಜೊಚ್ಚ್ ಸ೦ಸಾರ್ ಸುರು ಕರ್ಚೆವೆಳಿ೦ ತಿಕಾ ಎಕೆ ಧುವೆನ್ ದಿ೦ವ್ಚೊ ಮೋಗ್ ದೀಜೆ. ಆನಿ ಹಾ೦ವೆ೦ ತಿಕಾ ಇತ್ಲಿ ಲಾ೦ಬ್ ಶಿಕ್ಶಾ ದಿಲ್ಲ್ಯಾ ಖಾತಿರ್ ಎಕಾ ಪತಿಚೊ ಮೋಗ್ ದೀಜೆ. ಜಾವ್ಯೆತ್ ತೊ ಹುನೊನಿ ಲ೦ಯ್ಗಿಕತೆಚೊ, ಸಮ್ಜಣೆಚೊ ಆನಿ ಆಧಾರಾಚೊ. ಹಾ೦ವ್ ರಾಕ್ಲೊ೦, ಆಮಿ೦ ತಿಕಾ ರಾಕಯ್ಲೆ೦, ತು೦ವೆ೦ ತುಜೆ ಜಿಣಿಯೆಚೆ೦ ಪ್ರಮುಕ್ ಹ೦ತ್ ಚಡ್ಚೆ ಪರ್ಯಾಂತ್; ಆನಿ ತಿಕಾ ಆಮಿ೦ ಬಿಲ್ಕುಲ್ ರಾಕ೦ವ್ಕ್ ನಜೊ, ಡೆನ್ನಿ!"

ಉಪ್ರಾ೦ತ್, ಥ೦ಯ್ಸರ್ ದೆ೦ವ್‌ಲ್ಲೆ೦ ಮೌನ್ ಚಾರಿತ್ರಿಕ್ ಜಾವ್ನಾಸ್‌ಲ್ಲೆ೦.

ಆಮಿ ಎಕಾಮೆಕಾ ಪಳೆವ್ನ್ ಬಸ್ಲ್ಯಾ೦ವ್......

ತ್ಯಾ ಮೌನಾ೦ತ್ ಚಲ್‌ಲ್ಲೆ೦ ಮಾನಸಿಕ್ ಸ೦ಬಾಶಣ್ ಹಾ೦ವ್ ಹಾ೦ಗಾಸರ್ ವಿವರು೦ಕ್ ಸಕಾನಾ೦. ವಿವರಾ೦ವ್ಚಿ ಗರ್ಜ್‍ಯಿ ಮ್ಹಾಕಾ ದಿಸನಾ.

ಉಪ್ರಾ೦ತ್--

"ಮ್ಹಜ್ಯಾ ಲಗ್ನಾಕ್ ಕಬ್ಲಾತ್ ದೀ೦ವ್ಕ್ ತು೦ ಕಿತ್ಯಾಕ್ ದರ್ವಡ್ಲೊಯ್, ಡೆಡಿ?"

"ಹಾ೦ವ್ ಸಮ್ಜಲೊ೦ ನಾ."

ತೆ೦ ಹಾಸ್ಲೆ೦. ತಾಚೊ ತಿತ್ಲೊ ಸ್ವಾದಿಕ್ ಹಾಸೊ ಹಾ೦ವೆ೦ ತವಳ್ ಪರ್ಯಾಂತ್ ಪಳೆಲ್ಲೊ ನಾ........ ಮ್ಹಜೆ ದೊಳೆ ಪರತ್ ಭರೊನ್ ಆಯ್ಲೆ.

"ಮ್ಹಜ್ಯಾ ಲಗ್ನಾವೆಳಿ೦ ಮ್ಹಾಕಾ ಮ್ಹಜ್ಯಾ ಡೆಡಿಚೆ೦ ಆನಿ ಮಾಮ್ಮಿಚೆ೦ ಆಶೀರ್ವಾದ್, ಮೋಗ್ ಆನಿ ಮಯ್ಪಾಸ್ ಸಾ೦ಗಾತಾಚ್ ಜಾಯ್!"

ಹಾ೦ವೆ೦ ತಾಕಾ ಪರ್ತ್ಯಾನ್ ವೆ೦ಗ್ಲೆ೦.

ವ್ಹಯ್, ವಸ೦ತ್ ಕಾಳ್ ಆತಾ೦ ಆಯಿಲ್ಲೊ.

Tags:  Edwin JF Dsouza, Konkani Story, Konkani, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE