web
analytics
             
+971 50 7554105
ತುಮ್ಚ್ಯಾ ಗಮನಾಕ್:

'ದೇವಿ ನಿನ್ಕಾಸಿ'ಚೊ ಕವಿ ಮೆಲ್ವಿನ್ ರೊಡ್ರಿಗಸಾಕಡೆ ಸ೦ವಾದ್

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating

ಕೊ೦ಕ್ಣಿ೦ತ್ಲ್ಯಾ  ಶ್ರೇಶ್ಟ್  ಕವಿ೦ ಪಯ್ಕಿ ಎಕ್ಲೊ, ಪ್ರಕೃತೆಚೊ, ಮೊಗಾಚೊ ತಸೊ ಗೂ೦ಡ್ ಚಿ೦ತ್ಪಾಚೊ, ಕೊ೦ಕ್ಣಿ ಕವಿತಾಕ್ ರಾಶ್ಟ್ರೀಯ್ ಮಟ್ಟಾಚಿ ಕೀರ್ತ್ ಜೊಡುನ್ ದಿವ್ಪಾಕ್ ನಿರ೦ತರ್ ವಾವ್ರ್ ಕರ್‍ಚೊ, ಯುವ ಕವಿ೦ಕ್ ಸ್ಪೂರ್ತಿ ಆನಿ ಪ್ರೇರಣ್ ದಿ೦ವ್ಚೊ, ಕೇ೦ದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಚ್ಯಾ 'ದೇವಿ ನಿನ್ಕಾಸಿ' ಕವಿತಾ ಸ೦ಗ್ರಹಾಕ್  2016 ವ್ಯಾ ವರ್‍ಸಾಚಿ ವಿಮಲಾ ವಿ.ಪೈ ಪ್ರಶಸ್ತಿ ಲಾಭ್ಲ್ಯಾ. ರು. 1 ಲಾಕ್, ಯಾದಿಸ್ತಿಕಾ ಆನಿ ಅಭಿನ೦ದನ್ ಪತ್ರ್ ಆಟಾಪ್ಚಿ ಹಿ ಪ್ರಶಸ್ತಿ ದಸೆ೦ಬರ್  3ವೆರ್ ಕೊಡಿಯಾಲ್‌ಬಯ್ಲ್  ಟಿ.ವಿ. ರಮಣ .ಪೈ ಸಭಾ ಸಾಲಾ೦ತ್ ಚಲ್ಚ್ಯಾ ಸ೦ಭ್ರಮಾವೆಳಿ೦ ಹಾತಾ೦ತರ್ ಕರ್‍ತಲೆ.  ಹ್ಯಾ ಸುವಾಳ್ಯಾರ್ ಮೆಲ್ವಿನ್ ರೊಡ್ರಿಗಸಾಕಡೆ ಚಲಯಿಲ್ಲ್ಯಾ ಸ೦ವಾದಾ೦ತ್ಲೆ ಥೊಡೆ ಪ್ರಮುಖ್ ವಿಶಯ್ ಹಾಗಾಸರ್ ದಿಲ್ಯಾತ್.

ಸಿಜ್ಯೆಸ್ : ಮೆಲ್ವಿನ್,  ವಿಮಲಾ ವಿ. ಪೈ ಪ್ರಶಸ್ತಿ ಲಾಬ್‌ಲ್ಲೊ ತುಜ್ಯಾ ಕವಿತಾಂಚೊ ಪುಂಜೊ 'ದೇವಿ ನಿನ್ಕಾಸಿ'ವಿಶಿಂ ಥೊಡೊ ವಿವರ್ ದಿ. ಕೋಣ್ ಹಿ ದೇವಿ ನಿನ್ಕಾಸಿ? ತಿಕಾ ಆನಿ ಮಂಗ್ಳುರ್ಚ್ಯಾ ಪಬ್ ಹಲ್ಲ್ಯಾಕ್ ಕಸಲೊ ಸಂಬಂಧ್?
ಮೆಲ್ವಿನ್ :
 ದೇವಿ ನಿನ್ಕಾಸಿ ಸುಮೇರಿಯನ್ ಪುರಾಣಾಂತ್ಲಿ ದೇವಿ. ಬಿಯರಿಚಿ ದೇವಿ ಮ್ಹಣುನಚ್ ತಿ ವೊಳ್ಕಿಚಿ. ಸಂಸಾರಾಚ್ಯಾ ಹರ್ಯೆಕಾ ದೇಶಾಚ್ಯಾ ಪುರಾಣ್ ಕಾಣಿಯಾಂನಿ ಸೊರ್‍ಯಾಕ್ ಸಮರ್ಪಿಲ್ಲೆ ದೇವ್ ಆಸಾತ್. ಭಾರತಾಂತಯ್ ಆಸಾತ್. ಪುಣ್ ದೇವಿ ನಿನ್ಕಾಸಿಚ್ಯಾ ಪಯ್ಲೆಂ ತಸಲೊ ಏಕ್ ದೇವ್ ಯಾ ದೇವಿ ಆಸ್‍ಲ್ಲಿ ಮ್ಹಳ್ಳ್ಯಾಕ್ ಗೊವಾಯೊ ಮೆಳನಾಂತ್. ಬಿಯರ್ ಯಾ ಸೊರೊ, ಮನ್ಶಾಚ್ಯೆ (ಸು)ಸಂಸ್ಕೃತೆಚ್ಯೊ ಕುರ್ವೊ. ಯುಫ್ರೇಟಿಸ್ ಆನಿ ಟೈಗ್ರಿಸ್ ನಂಯಾಂಚ್ಯಾ ಉದ್ಕಾಬರಿ ಬಿಯರ್ ಪಿಯೆಲ್ಯಾರ್ ಜಿವಿತ್ ಫುಲ್ತಾ ಮ್ಹಳ್ಳಿ ಸಮ್ಜಣಿ ತವಳ್ಚಿ ಆಸ್‍ಲ್ಲಿ.

ಆತಾಂ ಮಂಗ್ಳುರ್ಚೆಂ 'ಪಬ್ ಎಟ್ಯಾಕ್' ಪಳೆಯಾಂ. ಹ್ಯಾ ಹಲ್ಲ್ಯಾ ಪಾಟ್ಲ್ಯಾನ್ ಚಲಿಯೊ ಬಿಯರ್ ಪಿಯೆತಾತ್ ಮ್ಹಳ್ಳೆಂ ಪ್ರಮುಖ್ ಕಾರಣ್ ಆಸಲ್ಲೆಂ. ತ್ಯಾ ದೆಕುನ್ ತಾಂಚೆರ್ ಹಲ್ಲೊ ಚಲ್ಲೊ. ಕೊಣಾಲಾಗಿಂ ಹ್ಯಾ ಚಲಿಯಾಂನಿ ತಾಂಚೆ ಕಷ್ಟ್, ಹಾಲ್-ಹವಾಲ್ ಸಾಂಗ್ಚೆ? ಭಾರತಾಚ್ಯಾ ದೆವಾಂಚೆರ್ ತಾಂಕಾಂ ಪಾತ್ಯೆಣಿ ಉರುಂಕ್ ನಾ. ಕಿತ್ಯಾಕ್ ಹ್ಯಾ ಸರ್ವಯ್ ದೆವಾಂಕ್, ಸಂಸ್ಕೃತೆಚ್ಯಾ ದಲ್ಲಾಳಿಂನಿ ಮೊಲಾಕ್ ಘೆವ್ನ್ ಜಾಲಾಂ. ತ್ಯಾದೆಕುನ್ ಹ್ಯೊ ಚಲಿಯೊ, ಸುಮೇರಿಯನ್ ದೇವಿ ನಿನ್ಕಾಸಿಲಾಗಿಂ ಮಾಗ್ಣೆಂ ಕರುಂಕ್ ವೆತಾತ್ ಆನಿ ಬಿಯರ್ ಪಿಯೆಂವ್ಕ್ ಸೊಡ್ ಮ್ಹಣ್ ಪರಾತ್ತಿತಾತ್.

ಸಿಜ್ಯೆಸ್ : 2010 ಸಪ್ಟೆಂಬರ್ 10 ವೆರ್  'ರಾಕ್ಣೊ' ಸಾತೊಳ್ಯಾನ್,  ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚ್ಯಾ ಸಹಯೋಗಾನ್ ಬಿಸ್ಪಾಚ್ಯಾ ನಿವಾಸಾಚ್ಯಾ ಸಭಾ ಸಾಲಾಂತ್ ಆಸಾ ಕೆಲ್ಲ್ಯಾ 'ಕವಿ ಸಂಧಿಂ'ತ್ ಉಲಯಿತ್ತ್ ತುಂವೆಂ ಆಪುಣ್ ಉಜ್ಯಾಂತ್ ಜಲ್ಮಲ್ಲೊಂ, ದೆಕುನ್ ವೊತಾಕ್ ಬಾವುನ್ ವಚನಾ ಮ್ಹಳ್ಳೆಂಯ್. ಹಾಚೊ ಅರ್ಥ್ ಕಿತೆಂ?
ಮೆಲ್ವಿನ್ :  ಜೆವಣ್, ನ್ಹೆಸಣ್, ಆನಿ ಪಾಕೆಂ - ಮನ್ಶಾಚ್ಯೊ ಪ್ರಮುಖ್ ಗರ್ಜೊ. ಹ್ಯಾ ಗರ್ಜಾಂ ಖಾತೀರ್ ಕೊಣ್ ದಣ್ಸತಾ, ತೊ ಜೀವ್ ಆಸುನ್ ಉಜ್ಯಾಂತ್ ಭಾಜುನ್ ಗೆಲ್ಲೆಬರಿ.  ಮ್ಹಜ್ಯಾ ಜಿವಿತಾಂತ್ ಹಾಂವ್ ಅಸಲ್ಯಾ ಉಜ್ಯಾಂತ್ಲ್ಯಾನ್ ಪಾಶಾರ್ ಜಾವ್ನ್ ಆಯ್ಲಾಂ. ತ್ಯಾದೆಕುನ್ ಲ್ಹಾನ್-ಸಾನ್ ಕಷ್ಟ್-ಸಂಕಷ್ಟ್ ಜಿವಿತಾಂತ್ ಫುಡ್ ಕರುಂಕ್ ಮೆಳ್ತಾನಾ ಹಾಂವ್ ಬಾವನಾ. ಬಿಸ್ಪಾಚ್ಯಾ ಘರಾಂತ್ ಚಲಲ್ಲೆ 'ಕವಿ-ಸಂಧಿ'ವೆಳಾರ್ ಹ್ಯಾವಿಶಿಂ ಹಾಂವ್ ವಿವರಾಯೆನ್ ಉಲಯ್ಲಾಂ.

ಸಿಜ್ಯೆಸ್ : ಚಾ.ಫ್ರಾ. ದೆಕೊಸ್ತಾಸಂಗಿಂ ಮೆಳುನ್ ತುವೆಂ 'ಜಾಗೆ ಕವಿ' ಮ್ಹಳ್ಳೊ ಉದೆತ್ಯಾ ಕವಿಂಚೊ ಏಕ್ ಪಂಗಡ್ ರಚುನ್ ಸಬಾರ್ ನವ್ಯಾ ಕವಿಂಕ್ ಪ್ರೋತ್ಸಾವ್ ದಿಲ್ಲೊಯ್. ಆತಾಂ ಕವಿತಾ ಟ್ರಸ್ಟಾದ್ವಾರಿಂ ವರ್‍ಸಾಕ್ ಏಕ್ ಪಾವ್ಟಿಂ ಭುರ್ಗ್ಯಾಂಕ್, ಯುವಜಣಾಂಕ್ ಆನಿ ಮ್ಹಾಲ್ಗಡ್ಯಾಂಕ್ ಸಾಂಗಾತಾ ಘಾಲುನ್ ವ್ಹಡಾ ದಬಾಜ್ಯಾನ್ 'ಕವಿತಾ ಫೆಸ್ತ್' ಆಚರಣ್ ಕರ್‍ತಾಯ್. ಹಾಚೆವರ್‍ವಿಂ ಕೊಂಕ್ಣಿ ಕಾವ್ಯ ಶೆತಾಕ್ ಕಾಂಯ್ ಬರೆಪಣ್ ಜಾಲಾಂಗೀ? ವ್ಹಡ್ ದೇಣ್ಗಿ ಮೆಳ್ಳ್ಯಾಗೀ?
ಮೆಲ್ವಿನ್ :   ಕವಿತಾ ಟ್ರಸ್ಟ್ ಫಕತ್ ವರ್ಸಾಕ್ ಏಕ್ ಪಾವ್ಟಿಂ 'ಕವಿತಾ ಫೆಸ್ತ್' ಮಾಂಡುನ್ ಹಾಡ್ತಾ ಮ್ಹಣ್ಚೆಂ ಚುಕಿಚೆಂ. ಕವಿತಾ ಟ್ರಸ್ಟ್ ವರ್ಸಾಕ್ ಉಣ್ಯಾರ್ ಬಾರಾ ಕಾರ್ಯಕ್ರಮಾಂ ಮಾಂಡುನ್ ಹಾಡ್ತಾ. ತ್ಯಾ ಭಾಯ್ರ್ ಪುಸ್ತಕಾಂ ಪರ್ಗಟ್ ಕರ್‍ತಾ.  ಕವಿತಾ.ಕೊಮ್ ಜಾಳಿಜಾಗೊ ಚಲೊವ್ನ್ ವ್ಹರ್ತಾ. ಹಿ ಏಕ್ ಚಳುವಳ್. ಪಂಚ್ವೀಸ್ ವರ್ಸಾಂ ಆದಿಂ ಹಾಂವೆಂ ಘಾಲ್ಲ್ಯಾ ಲೆಕಾಂ ಪ್ರಕಾರ್ ಕನ್ನಡ ಲಿಪಿಂತ್ ಫಕತ್ ಸಾತ್ ಕವಿತೆಚಿಂ ಪುಸ್ತಕಾಂ ಪರ್ಗಟ್ ಜಾಲ್ಲಿಂ ಆಸಲ್ಲಿಂ. ಆಜ್ ಹೊ ಸಂಕೊ ತಿನ್ಶಾಂಕ್ ಮಿಕ್ವತಾ. ಮ್ಹಣ್ತಾನಾ ಬದ್ಲಾವಣ್ ಜಾಲ್ಯಾ ನ್ಹಯ್? ಪುಣ್ ಹೆಂ ಸಗ್ಳೆಂ ಕವಿತಾ ಟ್ರಸ್ಟಾಚ್ಯಾ ಕಾಮಾನಿಮ್ತಿಂ ಜಾಲಾಂ ಮ್ಹಣುನ್ ಹಾಂವ್ ಸಾಂಗನಾ. ಪುಣ್ ಆಜ್ ಕೊಂಕಣಿಂತ್ ಕವಿತಾ ಬರೊಂವ್ಚ್ಯಾಕ್ ಏಕ್ ಉತ್ತೀಮ್ ಭೊಂವಾರ್ ನಿರ್ಮಾಣ್ ಜಾಲಾ ಮ್ಹಳ್ಳೆಂ ಖರೆಂ. ಚಡಾನ್ ಚಡ್ ಯುವಜಣ್, ತಾಂತ್ಲ್ಯಾ ತಾಂತುಂ ಶಿಕ್ಪಿ ಯುವಜಣ್ ಆಜ್ ಕವಿತಾ ಬರಯ್ತಾತ್ ತಿ ಗಜಾಲ್ ವ್ಹರ್ತೆ ದಾಧೊಸ್ಕಾಯೆಚಿ.

ಸಿಜ್ಯೆಸ್ : ಕೇಂದ್ರ್ ಸಾಹಿತ್ಯ್ ಅಕಾಡೆಮಿನ್ ಪ್ರಶಸ್ತೆ ಖಾತೀರ್ ಪುಸ್ತಕಾಂಚಿ ವಿಂಚವ್ಣ್ ಕರ್‍ತಾನಾ, ನಾಗರಿ ಸಂಗಿಂ ರೋಮಿ ಆನಿ ಕನ್ನಡ ಲಿಪಿಂನಿ ಪರ್ಗಟ್ ಜಾಲ್ಲಿಂ ಪುಸ್ತಕಾಂ ವಿಂಚಿಜಾಯ್ ನ್ಹಯ್‌ವೆ? ಮಲಯಾಳಮ್ ಆನಿ ಪರ್ಸೊ ಆರೆಬಿಕ್ ಲಿಪಿಂನಿ ವಿಶೇಸ್ ಸಾಹಿತ್ಯ್ ರುತಾ ಜಾಯ್ನಾ. ಪುಣ್ ವ್ಹಡ್ ಮಾಪಾನ್ ಸಾಹಿತ್ಯ್ ರುತಾ ಜಾಂವ್ಚ್ಯಾ ಕನ್ನಡ ಆನಿ ರೋಮಿ ಲಿಪಿಂನಿ ಬರೊಂವ್ಚ್ಯಾ ಲೇಖಕಾಂಕ್ ಅನ್ನ್ಯಾಯ್ ಕೆಲ್ಲೆಬರಿ ಜಾತಾ ನ್ಹಯ್‌ವೇ? ಹ್ಯಾವಿಶಿಂ ತುಜಿ ಅಭಿಪ್ರಾಯ್ ಕಿತೆಂ?
ಮೆಲ್ವಿನ್ :  ತುಜ್ಯಾ ಹ್ಯಾ ಸವಾಲಾಂತ್ ಚಡ್ತಿಕ್ ಪಡ್‌ಸವಾಲಾಂ ಮಿಸ್ಳಲ್ಯಾಂತ್.
ಕೊಂಕಣಿಕ್ ಕಿತ್ಲ್ಯೊ ಲಿಪಿ ಆಸುಂಕ್ ಫಾವೊ - ಹೆಂ ಏಕ್ ಸವಾಲ್. ಹ್ಯಾವಿಶಿಂ ವಾಗ್ವಾದ್ ಪಾಟ್ಲ್ಯಾ ಎಕ್ಶೆಂ ವರ್ಸಾಂ ಥಾವ್ನ್ ಜಾವ್ನ್ ಆಯ್ಲಾ. ಹಾಂವ್ ಕರ್ನಾಟಕಾ ಭಾಯ್ಲ್ಯಾಂವಿಶಿಂ ಹಾಂಗಾಸರ್ ಉಲಯ್ನಾ. ಲುವೀಸ್ ಮಸ್ಕರೆಞ್, ಫಾ. ಸಿಲ್ವೆಸ್ಟರ್ ಮಿನೇಜಾಕ್ ಧರುನ್ ಜಾಯ್ತ್ಯಾ ಜಣಾಂನಿ ಕೊಂಕಣಿಕ್ - ಏಕ್ ಲಿಪಿ - ಜಾಯ್ಜಾಯ್ ಮ್ಹಣುನ್ ಸಾಂಗ್ಲಾಂ. ಲುವೀಸ್ ಮಸ್ಕರೆಞಾನ್ ನಾಗರಿ ಲಿಪಿ ಕೊಂಕಣಿಕ್ ಸಹಜಲ್ಲಿ ಮ್ಹಳ್ಳೆಂ ತರ್, ಫಾ. ಮಿನೇಜಾನ್ ನಾಗರಿ ಲಿಪಿ ಸಹಜಲ್ಲಿ ವ್ಹಯ್ ತರೀ, ರೋಮಿ ಆಪ್ಣಾಯಿಲ್ಲ್ಯಾಂತ್ ಬರೆಪಣ್ ಜಾತಲೆಂ ಮ್ಹಣುನ್ ಸಾಂಗಲ್ಲೆಂ. ಅಯ್ಶಾಂಚ್ಯಾ, ನೊವೊದಾಂಚ್ಯಾ ದಶಕಾಂತ್ ಥೊಡ್ಯಾ ಲೇಖಕಾಂನಿ ಆನಿ ಹೆರಾಂನಿ ನಾಗರಿ ಲಿಪಿ ತೆವ್ಶಿಂ ತಾಂಚೊ ಸಹಮತ್ ದಾಕಯ್ಲೊ ತರೀ, ಉಪ್ರಾಂತ್ ಕನ್ನಡ ಲಿಪಿ ಜಾಯ್ ಮ್ಹಣುಂಕ್ ಸುರು ಕೆಲೆಂ. ಎರಿಕ್ ಒಜೇರಿಯೊ, ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಆಸ್ತಾನಾ ತಾಣೆ ಮ್ಹಜೊ ಅಭಿಪ್ರಾಯ್ ಬರ್ಪಿನಿಶಿಂ ಧಾಡುಂಕ್ ವಿಚಾರ್‍'ಲ್ಲೆಂ. ಹಾಂವೆಂ 'ಕೊಂಕಣಿಕ್ ನಾಗರಿ ಸಹಜಲ್ಲಿ' ಮ್ಹಣುನ್ ಬರೊವ್ನ್ ಧಾಡಲ್ಲೆಂ. ಹೆಂ ಮ್ಹಜೆಂ ಪತ್ರ್ 'ರಾಕ್ಣೊ' ಚೆರಯ್ ಛಾಪುನ್ ಆಯಿಲ್ಲೆಂ. ಆಯ್ಚ್ಯಾ ದಿಸಾ ಲಿಪಿಕ್ ಧರುನ್, ಮ್ಹಜೆರ್ ಗರ್ಜೆಭಾಯ್ಲೆ ಅಪವಾದ್ ಥಾಪ್ತಾತ್ ಆನಿ ಕಾಂಯ್ ಥೊಡೆ ಜಣ್ ಕಿಜಿಲಾಂ ಕರ್‍ತಾತ್. ಹೆಂ ಸಾರ್ಕೆಂ ನ್ಹಯ್. ಮ್ಹಜ್ಯಾ ವಿಚಾರಾಚೆರ್ ಕೊಣಾಯ್ಕಿ ಸಹಮತ್ ನಾ ಜಾಲ್ಯಾರ್ ವ್ಯಕ್ತಿಗತ್ ಠಿಕಾ ಕರ್‍ಚೆಂ ನ್ಹಯ್. ತಾಂಚ್ಯಾ ವಿಚಾರಾಂ ಖಾತೀರ್ ಹಾಂವೆಂ ಕೆನ್ನಾಂಯ್ ವ್ಯಕ್ತಿಗತ್ ಠಿಕಾ ಕೆಲ್ಲಿ ನಾ.  
ಇತ್ಲೆಂ ಸಾಂಗ್ತಾನಾ ಅಖಂಡ್ ಕೊಂಕಣಿ ಸಮುದಾಯಾಚೊ ಲೋಕ್ ಫಾಲ್ಯಾಂ ಸಕಾಳಿಂ ನಾಗರಿ ನಾಕಾ, ರೋಮಿ/ಕನ್ನಡ ಮಾಂದುನ್ ಘೆವ್ಯಾಂ ಮ್ಹಳ್ಳೊ ಠರಾವ್ ಕರಿತ್ ಜಾಲ್ಯಾರ್, ಹಾಂವ್ ತಾಕಾ ವಿರೋಧ್ ಕರ್‍ಚೊನಾ. ಮ್ಹಜೆಂ ಮ್ಹಣಪ್ ಇತ್ಲೆಂಚ್: ಕೊಂಕಣಿಕ್ ಏಕಚ್ ಲಿಪಿ ಆಸುಂದಿ. ಸಮಸ್ತ್ ಕೊಂಕಣಿ ಸಮುದಾಯಾಚ್ಯಾ ಎಕ್ವಟಾಚೆ ನದ್ರೆನ್ ಪಾಂಚ್ ಲಿಪಿ ಘೆವ್ನ್ ಆಮಿ ಸಾಂಗಾತಾ ಯೇಂವ್ಕ್ ಜಾಯ್ನಾ. 
ಖಂಯ್ಚ್ಯಾಯ್ ಸಮುದಾಯಾಚೊ ಎಕ್ತಾರ್ ಎಕೆ ರಾತಿ ಭಿತರ್ ಘಡನಾ. ಆಜ್ ರೊಯಿಲ್ಲೆಂ ಭಿಂ ರೂಕ್ ಜಾವ್ನ್ ಫಳ್ ದೀಂವ್ಕ್ ವರ್ಸಾಂ ಲಾಗ್ತಾತ್. ತ್ಯಾದೆಕುನ್ ಶಾಳಾಂನಿ ನಾಗರಿ ಲಿಪಿನ್ ಕೊಂಕಣಿ ಶಿಕಯ್ಜಾಯ್. ಆಮಿ ಲೇಖಕ್ ತೆಂ ಕಷ್ಟಾಂಚೆಂ ಮ್ಹಣ್ತಾಂವ್. ಭೆಷ್ಟೆಂ. ಭುರ್ಗಿಂ ಶಾಳೆಂನಿ ಹಿಂದಿ ಶಿಕ್ಚೆ ಖಾತೀರ್ ನಾಗರಿ ಬರೊಂವ್ಕ್ ಶಿಕ್ತಾತ್ ಜಾಲ್ಲ್ಯಾನ್ ತಾಂಕಾಂ ಚಡ್ತಿಕ್ ಭೊರ್ ಘಾಲ್ಲೆಬರಿ ಜಾಯ್ನಾ. ಮಾಗೀರ್ ಕೊಂಕಣಿ ಶಿಕ್ಚಿಂ ಪುರಾಯ್ ಭುರ್ಗಿಂ ಕನ್ನಡ ಮೀಡಿಯಮಾಂತ್ಲಿಂ ಆಸನಾಂತ್. ಇಂಗ್ಲಿಷ್ ಮೀಡಿಯಮಾಂತ್ಲಿಂ. ತಾಂಕಾಂ ಕನ್ನಡ ಲಿಪಿಂತ್ ಆನಿ ನಾಗರಿ ಲಿಪಿಂತ್ ಕೊಂಕಣಿ ವಾಚುಂಕ್, ಬರೊಂವ್ಕ್ ಚಡ್ ಕಾಂಯ್ ಫರಕ್ ಪಡನಾ. ಫರಕ್ ಪಡ್ತಾ - ಉಲಯ್ತಲ್ಯಾಂಕ್ ಮಾತ್ರ್. ಕಿತ್ಯಾಕ್ ತಸಲೆಂ ಏಕ್ ಪ್ರಯತನ್ ಕರುಂಕ್ ತಾಂಕಾಂ ವೇಳ್ ನಾ. ಗರ್ಜಯ್ ಭೊಗನಾ. 
ತಶೆಂ ಮ್ಹಣ್ತಾನಾ ಆನ್ಯೇಕ್ ಸವಾಲ್ ಉದೆತಾ. ಫಕತ್ ಕನ್ನಡಾಂತ್ ಬರಯ್ತಲ್ಯಾಂಚಿ ಗತ್ ಕಿತೆಂ? ಪತ್ರಾಂ ಚಲ್ತಯ್ತಲ್ಯಾಂಚಿ ಗತ್ ಕಿತೆಂ? ಕನ್ನಡಾಂತ್ ಬರಯ್ತಲೆ ಬರೊಂವ್ದಿತ್, ಪತ್ರಾಂ ಚಲಯ್ತಲೆ ತಶೆಂಚ್ ಚಲೊಂವ್ದಿತ್. ಹಿ ವೆವ್ಹಾರಾಚಿ ಗಜಾಲ್. ಪುಸ್ತಕಾಂ ಪತ್ರಾಂ ವಿಕುನ್ ವೆತಾ ಪರ್ಯಾಂತ್ ತೆಂ ಮುಕಾರ್ ವಚುಂದಿ. ತಾಚ್ಯಾ ಸಾಂಗಾತಾ ಸಾಧ್ಯ್ ಕೊಣಾಕ್ ಜಾತಾ ತೆ ನಾಗರಿಂತ್ ಬರೊಂವ್ದಿತ್, ನಾಗರಿಂತ್ ಪತ್ರಾಂ ಚಲೊಂವ್ದಿತ್. ರೋಮಿಂತ್ ಚಲೊಂವ್ದಿತ್. ನಾಗರಿಂತ್ ಬರಯ್ತಲ್ಯಾಂಕ್ ವಿರೋಧ್ ಕಿತ್ಯಾಕ್? ತಾಂಚೊ ಕಾಂಟಾಳೊ ಕಿತ್ಯಾಕ್? ಹಾಂವ್ ತೀನಯ್ ಲಿಪಿಂನಿ ಎಕಾಚ್ ವೆಗಾನ್ ಬರೊಂವ್ಕ್ ಜಾಣಾಂ, ವಾಚುಂಕ್ ಜಾಣಾಂ. ಆಜ್ ಥಾವ್ನ್ ನ್ಹಯ್. ಪಾಟ್ಲ್ಯಾ ತೀಸ್ ವರ್ಸಾಂ ಥಾವ್ನ್. ಹಾಂವ್ ಮ್ಹಜೆಂ ಬರಪ್ ಲಿಪ್ಯಾಂತರ್ ಕರಯ್ತಾಂ ಮ್ಹಣ್ತಲೆ ಆಸಾತ್. ತೆ ಮ್ಹಜ್ಯೆ ಹುಶಾರ್ಗಾಯೆ ಥಂಯ್ ಜಾಳ್ ವೊಂಕ್ತಾತ್.
ಆತಾಂ - ಕನ್ನಡ/ರೋಮಿ ಲಿಪಿಂತ್ ಯೆದೊಳ್ ಬರಯ್ತಲ್ಯಾಂಕ್ ಸಾಹಿತ್ಯ ಅಕಾಡೆಮಿಚಿ ಪ್ರಶಸ್ತಿ ಮೆಳಜಾಯ್ ಯಾ ನಾಕಾ? ಮ್ಹಳ್ಳೆಂ ಸವಾಲ್ ಉದೆತಾ. ಹಾಂವೆಂ ಹಾಕಾ ವಿರೋಧ್ ಕೆದಳಾಯ್ ಕರುಂಕ್ ನಾ. ಹಾಂವ್ ನಾಗರಿಂತಯ್ ಬರಯ್ತಾಂ ಮ್ಹಣುನ್, ಹಾಂವೆಂ ಕನ್ನಡ್ ಲಿಪಿಚ್ಯಾ ಸಾಹಿತ್ಯಾಕ್ ಪ್ರಶಸ್ತಿ ಮೆಳುಂಕ್ ವಿರೋಧ್ ಕೆಲೊ ಮ್ಹಣುನ್ ಜಾಯ್ನಾ. ಸಾಹಿತ್ಯ ಅಕಾಡೆಮಿನ್ ಪ್ರಶಸ್ತಿ ದಿಂವ್ಚ್ಯಾ ಖಾತೀರ್ ಕಸಲಿಂ ನೆಮಾಂ ಕೆಲ್ಯಾಂತ್ ತ್ಯಾವಿಶಿಂ ಮ್ಹಾಕಾ ಖಬರ್ ನಾ. ಹಾಂವ್ ಖಂಯ್ಚ್ಯಾಯ್ ವಗ್ತಾ ಸಾಹಿತ್ಯ ಅಕಾಡೆಮಿಚ್ಯಾ ಸಮಿತಿಂನಿ ವಾವ್ರ್ ಕೆಲ್ಲೊ ಮನೀಸ್ ನ್ಹಯ್. ಸಾಹಿತ್ಯ ಅಕಾಡೆಮಿಕ್ ತಿಚಿಂಚ್ ಮ್ಹಳ್ಳಿಂ ಲಿಮಿಟೇಶನ್ಸ್ ಆಸುಂಕ್ ಪುರೊ. ತ್ಯಾ ದೆಕುನ್ ಕಾಂಯ್ ಪ್ರಶಸ್ತೆ ಖಾತೀರ್ ನಾಗರಿ ಲಿಪಿ ಮಾತ್ರ್ ಜಾಯ್ಜಾಯ್ ಮ್ಹಳ್ಳೊ ಠರಾವ್ ತಾಂಣಿ ಕೆಲಾ ಆಸ್ತಲೊ. ಪುಣ್ ತಶೆಂ ಆಸುನಯ್, ತ್ಯಾ ನಿರ್ಧಾರಾಕ್ ಬಾಧಕ್ ಹಾಡಿನಾಸ್ತಾಂ, ಹೆರ್ ಲಿಪಿಚ್ಯಾ ಕೊಂಕಣಿ ಸಾಹಿತ್ಯಾಕ್ ಪ್ರಶಸ್ತಿ ದಿಂವ್ಚೆ ಖಾತೀರ್ ಅಕಾಡೆಮಿನ್ ವಾಟೊ ಸೊಧುಂಕ್ ಜಾತಾತ್. ಹೆಂ ಕಾಮ್ ಕಷ್ಟಾಂಚೆಂ ಮ್ಹಣುನ್ ಮ್ಹಾಕಾ ಭೊಗನಾ.
ಇತ್ಲೆಂ ಸಾಂಗ್ತಾನಾ ನಾಗರಿ ಲಿಪಿ ಜಾಯ್ ಮ್ಹಣುನ್ ಹಾಂವ್ ಕಿತ್ಯಾಕ್ ಮ್ಹಣ್ತಾಂ ಮ್ಹಳ್ಳೆವಿಶಿಂ ಹಾಂಗಾಸರ್ ಹಾಂವ್ ಉಲೊಂವ್ಕ್ ನಾ. ಹೆಂ ತುಜ್ಯಾ ವಾಚ್ಪ್ಯಾಂನಿ ಮತಿಂತ್ ಘೆಂವ್ಚೆಂ. ತಾಚೆ ಖಾತೀರ್ ವೆಗ್ಳೆಂಚ್ ಲೇಖನ್ ಬರಯ್ಜಾಯ್ ಪಡ್ತಲೆಂ.
ಸಾಹಿತ್ಯ್ ಅಕಾಡೆಮಿನ್ ಪ್ರಶಸ್ತೆ ಖಾತೀರ್ ಸರ್ವಯ್ ಲಿಪಿ ಮಾಂದುನ್ ಘೆಜಾಯ್ ಯಾ ನಾಕಾ, ಮ್ಹಣುನ್ ಕೇಂದ್ರ್ ಸರ್ಕಾರಾಚ್ಯಾ ಮಾನವ್ ಸಂಪನ್ಮೂಳ್ ಖಾತ್ಯಾನ್ ನಿರ್ಧಾರ್ ಘೆಂವ್ಕ್ ಬಾಕಿ ಉರ್‍ಲಾಂ. ಹೆಂ ವೆಗಿಂಚ್ ಜಾಂವ್ದಿ ಮ್ಹಣ್ ಆಶೆತಾಂ. 

ಸಿಜ್ಯೆಸ್ : ಆರ್ವಿಲ್ಯಾ ವರ್ಸಾಂನಿ, ಮಂಗ್ಳುರ್‍ಚ್ಯಾ ಕೊಂಕಣಿ ಲೇಖಕಾಂ ಮಧೆಂ ಎಕ್ವಟ್ ಘಡುನ್ ಯೆಂವ್ಚ್ಯಾ ಬದ್ಲಾ ಥೊಡಿ ತುಟಾಫುಟ್ ಜಾಲ್ಲಿ ದಿಸುನ್ ಯೆತಾ- ಅಶೆ೦ ಸಬಾರಾ೦ಚಿ ಅಭಿಪ್ರಾಯ್.  ಹ್ಯಾ ಸಮಸ್ಯಾಕ್ ಕಾಂಯ್ ತರಿ ಪರಿಹಾರ್ ಆಸಾ? 
ಮೆಲ್ವಿನ್ :  ಲೇಖಕಾಂ ಮಧೆಂ ವಾದ್-ವಿವಾದ್-ವಾಗ್ವಾದ್ ಆದೀಂಯ್ ಜಾಲಾ, ಫುಡಾರಾಂತಯ್ ಉರ್ತಲೊ. ಹಾಕಾ ತುಟಾಫುಟ್ ಮ್ಹಣುಂಕ್ ಜಾಯ್ನಾ. ಕಾಂಯ್ ಎಕ್ಲ್ಯಾ ದೊಗಾಂಚಿಂ ವಿವಾದಾಕ್ ಲಾಗುನ್ ತೊಂಡಾಂ ವಾಂಕ್ಡಿಂ ಜಾಲ್ಯಾಂತ್ ಆಸ್ತಲಿಂ.  ಖಂಯ್ಚೋಯ್ ವಾದ್ - ವಿವಾದಾಂತ್ ಸಂಪನಾಸ್ತಾಂ ವಾಗ್ವಾದಾಂತ್ ಮುಖಾರ್ ವಚಜಾಯ್. ತವಳ್ ಭಾಶೆಚೆಂ ಬರೆಪಣ್ ಜಾತಲೆಂ. ನವೆ ವಿಚಾರ್, ಬಳ್ವಂತ್ ವಿಚಾರ್ ಜಲ್ಮಾಕ್ ಯೆತಲೆ. ಖಂಯ್ಚೋಯ್ ವಾದ್, ವಿವಾದಾಂತಚ್ ಉರ್ಲೊ ಜಾಲ್ಯಾರ್ ಮನಾಂ ವಾಂಕ್ಡಿಂ ಜಾತಾತ್.

ಸಿಜ್ಯೆಸ್: "ಶಾಳೆ೦ನಿ ಆನಿ ಕೊಲೆಜಿ೦ನಿ ಕೊ೦ಕ್ಣಿ ಶಿಕೊ೦ವ್ಚೆವಿಶಿ೦ ತು೦ ಕಿತೆ೦ ಮ್ಹಣ್ತಾಯ್? ಮ೦ಗ್ಳುರ್ ಶಹರಾ೦ತ್ಲ್ಯಾ ಆನಿ ಶಹರಾ ಭಾಯ್ಲ್ಯಾ ಸಬಾರ್ ಕೊಲೆಜಿ೦ನಿ ಆಜ್ ಕೊ೦ಕ್ಣಿ ಶಿಕಯ್ತಾತ್. ಕೊ೦ಕ್ಣಿ ಸಾಹಿತ್ಯ್ ಅಕಾಡೆಮಿ ಆನಿ ಕೊ೦ಕ್ಣಿ ಪ್ರಚಾರ್ ಸ೦ಚಾಲನಾಚ್ಯಾ ಹ್ಯಾ ವಾವ್ರಾಕ್ ಮ೦ಗ್ಳುರ್‌ಚ್ಯಾ ಬಿಸ್ಪಾನ್ ಪಾಟಿ೦ಬೊ ಆನಿ ಸಹಕಾರ್ ದಿಲಾ. ಪುಣ್ ಧಾರ್ಮಿಕ್ ಭಯ್ಣಿ೦ಚ್ಯಾ ಶಿಕ್ಪಾ ಸ೦ಸ್ಥ್ಯಾ೦ನಿ ಕೊ೦ಕ್ಣೆಕ್ ಆಜೂನ್ ರೀಗ್ ದೀ೦ವ್ಕ್ ನಾ. ಕೊ೦ಕ್ಣಿ ಶಿಕ್‌ಲ್ಲ್ಯಾ೦ಕ್ ಫುಡಾರ್ ನಾ೦ವೇ?"
ಮೆಲ್ವಿನ್ :  ಆಮಿ ಹ್ಯಾವಿಶಿಂ 'ಸೆಂಟಿಮೆಂಟಲ್' ಜಾಂವ್ಚೆಂ ಸೊಡ್ನ್ 'ರಿಯಾಲಿಟಿ ಚೆಕ್ಕ್' ಕರುಂಕ್ ಜಾಯ್. ಕೊಂಕಣಿಚೊ ಮೋಗ್ ಏಕ್-ದೋನ್-ತೀನ್ ವರ್ಸಾಂ ಆಸತ್. ಪುಣ್ ಹೊ ಮೋಗ್ ಮ್ಹಣುನ್ ಘರ್ಚೆ ರಾಂದ್ಣಿರ್ ಆದಾನ್ ಚಡನಾ ಜಾಲ್ಯಾರ್!  ನಿಮಾಣೆಂ ಸರ್ವಾಂನಿ ಸೊದ್ಚೆಂ 'ಪೊಟಾಕ್ ಕಿತೆಂ ಪಡ್ತಾ'? ಮ್ಹಳ್ಳೆಂ. ಶಿಕೊಂವ್ಚ್ಯಾಂನಿ ಆನಿ ಶಿಕ್ಚ್ಯಾಂನಿ ಸೈತ್ ಹೆಂ ಪಳೆಂವ್ಚ್ಯಾಂತ್ ಚೂಕ್ ನಾ. ತ್ಯಾ ದೆಕುನ್ ಕೊಂಕಣಿ ಶಿಕ್ತಲ್ಯಾಂಕ್ ಜೊ ಖಾಸ್ಗಿ ಫಾಯ್ದೊ ಮೆಳುಂಕ್ ಸಾಧ್ಯ್ ಆಸಾ,  ತ್ಯಾ ವಾಟಾಂನಿ - ಹೆಂ ಕೊಂಕಣಿ ಶಿಕ್ಪಾಚೆಂ ಅಭಿಯಾನ್ ಮುಕಾರ್ ವೆತಾಂ ವೆತಾಂ - ಚಡಿತ್ ಧ್ಯಾನ್ ದೀಜೆ. ನ್ಹಯ್ ತರ್ ಖಂಯ್ಗಿ ಹಿ ಚಳುವಳ್ ಪೊಂತಾಕ್ ಪಾವತ್ ಮ್ಹಳ್ಳೆಂ ಮ್ಹಾಕಾ ಭೊಗನಾ. ಪೊಂತಾಕ್ ಪಾವ್ಲ್ಯಾರಿ ತಾಚೊ ಪ್ರತಿಫಳ್ ವ್ಹಡಾ ಮಾಪಾನ್ ಕೊಂಕಣಿ ಸಮಾಜೆಕ್ ಲಾಭ್ತಲೊ ಮ್ಹಣುಂಕ್ ಜಾಯ್ನಾ. 
ಧಾರ್ಮಿಕ್ ಭಯ್ಣಿಂಚ್ಯಾ ಶಿಕ್ಪಾ ಸಂಸ್ಥ್ಯಾಂನಿ ಕೊಂಕಣಿಕ್ ಕಿತ್ಯಾ ರೀಗ್ ದೀಂವ್ಕ್ ನಾ - ಹ್ಯಾವಿಶಿಂ ಮ್ಹಾಕಾ ಖಬರ್ ನಾ. ಹಾಂವೆಂ ಚಿಂತ್ಚ್ಯೆಬರಿಂ ತಾಂಣಿಂಯ್ ಚಿಂತ್ಲಾಂ ಆಸ್ತಲೆಂ.

ಹ್ಯಾ ಸ೦ವಾದಾ೦ತ್ ಆಪ್ಲೆ ವಿಚಾರ್ ಮ೦ಡನ್ ಕೆಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾಕ್ ಧನ್ಯವಾದ್. ಮೆಲ್ವಿನಾಕ್ ಸಮೆಸ್ತ್ ಕೊ೦ಕ್ಣಿ ಪರ್ಜೆಚೆ ಆನಿ  www.maibhaas.com ವಾಚ್ಪ್ಯಾ೦ಚೆ ಅಭಿನ೦ದನ್. 

Tags:  Melwyn Rodrigues, CGS Taccode, Konkani, Mangalore, Mangalorean, Mother Tongue

1 Comment/s.

  1. Austin Prabhu, Chicago
    ದೇವ್ ಬರೆಂ ಕರುಂ ಮೆಲ್ವಿನ್ ತುಜ್ಯಾ ಚಿಂತ್ಪಾಕ್ ಆನಿ ಸಿಜ್ಯೆಸ್ ತುಜ್ಯಾ ವಾಂಟ್ಪಾಕ್!

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE