From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಭಾಂಗಾರಾಚಿ ಚೊರಿ
Tuesday, November 8, 2016
2009 ಇಸ್ವೆಚಿ ಅಕ್ಟೋಬರ್ 27 ತಾರೀಕ್ ಮಂಗ್ಳಾರ್ :
ಯುಎಇ ದೇಶಾಚಾ ಅಬುಧಾಬಿ ಶೆರಾಂತ್ ದರ್‍ಯಾ ವೇಳೆರ್ ಆಸ್ಚಾ ಇಂಟರ್ ಕೊಂಟಿನೆಂಟಲ್ ಹೊಟೆಲಾಂತ್ ಸಾಂಜೆಚಾ ಸ ವೊರಾಂಚೆರ್ ದೋಗಾಂ ಜೊಡ್ಯಾಂನಿ ರೂಮ್ ಘೆತ್ಲೆಂ. ಪಯ್ಲ್ಯಾ ಜೊಡ್ಯಾಚಾ ದಾದ್ಲ್ಯಾಚೆಂ ನಾಂವ್ ಫೆಲಿಪೊ ಆನಿ ತಾಚೆ ಭಾಯ್ಲೆಚೆಂ ನಾಂವ್ ಸಾರಾ ತರ್ ದುಸ್ರ್ಯಾ ಜೊಡ್ಯಾಚಾ ದಾದ್ಲ್ಯಾಚೆಂ ನಾಂವ್ ರೊಲಂಡೊ ಆನಿ ತಾಚೆ ಭಾಯ್ಲೆಚೆಂ ನಾಂವ್ ಬೆಲಿಯಾ ಮ್ಹಣ್ ಹೊಟೆಲಾಚಾ ದಸ್ತಾವೇಜಾಂತ್ ಉಲ್ಲೇಕ್ ಕೆಲ್ಲೊ. ತಿಂ ಮೆಕ್ಸಿಕೊ ಗಾಂವ್ಚಿಂ ಮ್ಹಣ್ ತಾಂಚೆ ಪಾಸ್‍ಪೋರ್ಟಾಂನಿ ಸೂಚಿತ್ ಕೆಲ್ಲೆಂ. ತಿಸ್ರ್ಯಾ ಮಾಳಿಯೆರ್ ಏಕಾಮೆಕಾ ಲಾಗೊನ್ ಆಸ್ಚಿಂ ದೋನ್ ಕೂಡಾಂ ಹ್ಯಾ ಮೆಕ್ಸಿಕನ್ ಜೊಡ್ಯಾಂಕ್ ಒಪ್ಸಿಲ್ಲಿಂ.
ತ್ಯಾಚ್ ಸಾಂಜೆರ್ ಸಾಡೆ-ಸಾತ್ ವೊರಾಂಚೆರ್ ಕೊಸ್ತಾ-ರಿಕಾ ದೇಶಾಚೊ ನಿವಾಸಿ ಕಾರ್‍ಲೊಸ್ ಮಣ್ಚಾ ವೆಕ್ತಿನ್ ತ್ಯಾಚ್ ಇಂಟರ್‌ಕೊಂಟಿನಲ್ ಹೊಟೆಲಾಚಾ ಪಾಂಚ್ವೆ ಮಾಳಿಯೆರ್ 501 ನಂಬ್ರಾಚೆಂ ಕೂಡ್ ಘೆತ್ಲೆಂ. ರಾತಿಂ ನೋವ್ ವೊರಾಂಚೆರ್ ಅಪ್ಲೆ ಮೆಕ್ಸಿಕನ್ ಈಷ್ಟಾಂ ಸವೆಂ ಕಾರ್‍ಲೊಸಾನ್ ಜೆವ್ಣಾಚಿ ಸುರ್‍ವಾತ್ ಕೆಲಿ. ಬಿಯರ್ ಸೊರ್‍ಯಾ ಸವೆಂ ಆರಂಭ್ ಜಾಲ್ಲೆಂ ಜೆವಾಣ್ ಅಕೇರ್ ಜಾತಾನಾ ವೊರಾಂ ರಾತಿಚಿಂ ಇಕ್ರಾ ಜಾಲ್ಲಿಂ. ಜೆವ್ಣಾ ಉಪ್ರಾಂತ್ ಕಾರ್‍ಲೊಸಾನ್ ಅಪ್ಲೆ ರೂಮಾಂತ್ ಮೆಳೊಂಕ್ ಮೆಕ್ಸಿಕನ್ ಜೊಡ್ಯಾಂಕ್ ಆಮಂತ್ರಿತ್ ಕೆಲೆಂ. ರಾತಿಚಾ ಇಕ್ರಾ ವೊರಾಂಚೆರ್ 501 ಕೂಡಾಂತ್ ಏಕ್ ಮಹತ್ವ್ ಪೂರ್ಣ್ ಜುಂತ್ ಚಲ್ಲೊ.
"ಮಜಾ ಖಬ್ರೆಂತ್ ಕಿತೆಂಚ್ ಬದ್ಲಾವಣ್ ನಾ." ಕಾರ್‍ಲೊಸಾನ್ ಆನಂದಿತ್ ಸ್ವರಾನ್ ವೆಕ್ತ್ ಕೆಲೆಂ. "ದುಬೈ ಥಾವ್ನ್ ಮಲೇಶಿಯಾಚಾ ಕೌಲಲಂಪೂರ್ ಶೆರಾಕ್ ಭಾಂಗಾರಾಚೆ ಕುಡ್ಕೆ ವ್ಹರ್ನ್ ಥಂಯ್ಸರ್ ನಗ್ ಜಾವ್ನ್ ಪರಿವರ್‍ತಿತ್ ಕರ್ನ್ ಪಾಟಿಂ ಹಾಡ್ಚೆಂ ಜಾಯ್ತೆ ಭಾಂಗಾರ್ ವೆಪರಿಸ್ತಾಂಚಾ ನಿಯೋಜಿತ್ ಕಾಮಾಂ ಪಯ್ಕಿ ಏಕ್ ಜಾವ್ನಾಸಾ. ಪೊರ್‍ವಾಂ ಬ್ರೇಸ್ತಾರಾ ಸಾಂಜೆರ್ ನೋವ್ ವೊರಾಂಚಾ ವಿಮಾನಾರ್ ವೆಪಾರಿಸ್ತ್ ನೈಲೆಶ್ ಪಟೇಲ್ ಭಾಂಗಾರಾಚೆ ಕುಡ್ಕೆ ಘೆವ್ನ್ ಮಲೇಶಿಯಾಕ್ ಪಯ್ಣ್ ಕರ್‍ತೊಲೊ."
"ಕಿತ್ಲೊ ಐವಜಾಂಚೆಂ ಭಾಂಗಾರ್ ಮ್ಹಣ್ ಖಬರ್ ಆಸಾ?" ಸಾರಾನ್ ಮಧೆಂ ಸವಾಲ್ ಕೆಲೆಂ.
"ನಿರ್ದಿಷ್ಟ್ ಖಬರ್ ನಾಸ್ತಾನಾ ಕಾರ್‍ಲೊಸ್ ಖಂಚಾಯಿ ಮಿಸಾಂವಾಕ್ ಹಾತ್ ಘಾಲಿನಾ ಆನಿ ಪ್ರತ್ಯೇಕ್ ಜಾವ್ನ್ ಅಪ್ಲ್ಯಾ ಸಾಂಗಾತ್ಯಾಂಚೊ ವೇಳ್ ವ್ಯರ್ಥ್ ಕರಿನಾ." ಕಾರ್‍ಲೊಸಾನ್ ಸ್ಪಷ್ಟ್ ಕೆಲೆಂ. "ಲಗ್ಭಗ್ 1.6 ಮಿಲ್ಲಿಯನ್ ಡೊಲ್ಲರ್‍ಸಾಂಚೆಂ ಭಾಂಗಾರ್ ತಾಚೆ ಬೇಗಾಂತ್ ಆಸ್ತೆಲೆಂ."
"1.6 ಮಿಲ್ಲಿಯನ್ ಡೊಲ್ಲರ್‍ಸಾಚೆಂ ಭಾಂಗಾರ್!" ಫೆಲಿಪೊನ್ ಶಿಳೊಣಿ ಮಾರ್‍ಲಿ.
"ಭಾಂಗಾರ್ ಫಾರುಂಕ್ ಯೋಜನ್ ಕಿತೆಂ ಮ್ಹಣ್ ಸಾಂಗ್. ಆಮ್ಕಾಂ ತುಜೆರ್ ಸರ್ವ್ ಪಾತ್ಯೆಣಿ ಆಸಾ." ರೊಲಂಡಾನ್ ಸಿಗ್ರೇಟ್ ಜಳಯ್ಲಿ.
"ಹ್ಯಾ ಪಂಗ್ಡಾಚೆರ್ ಪಾತ್ಯೆಣಿ ಆಸ್‍ಲ್ಲ್ಯಾನ್ ಹಾಂವೆಂ ತುಮ್ಕಾಂ ಆಜ್ ಹಾಂಗಾಸಾರ್ ಮೆಳೊಂಕ್ ಅಪವ್ಣೆ ದಿಲೆಂ." ಕಾರ್‍ಲೊಸಾನ್ ಉದಾಕ್ ಪಿಯೆವ್ನ್ ಮುಕಾರ್ಸಿಲೆಂ. "ಹಾಚೆ ಆದಿಂ ಆಮಿ ಸರ್ವ್ ಮಿಸಾಂವಾಂ ನಿಯಮಿತ್ ಯೋಜನಾ ಪರ್ಮಾಣೆ ಪೂರ್ಣ್ ಕೆಲ್ಯಾಂತ್."
"ಹ್ಯಾ ಪಾವ್ಟಿಂಯಿ ತುಜೆಂ ಪ್ಲಾನ್ ಪೋಂತಾಕ್ ಪಾವ್ತೆಲೆಂ." ಬೆಲಿಯಾ ಕಿಡ್ಕಿಡೊನ್ ಹಾಸ್ಲೆಂ. "ಪುಣ್ ಪ್ಲಾನ್ ಕಿತೆಂ ಮ್ಹಣ್ ಸಾಂಗ್."
"ಪ್ಲಾನ್ ಆಶೆಂ ಆಸಾ....." ತಾಳೊ ಸದಿಳ್ ಕರ್ನ್ ಕಾರ್‍ಲೊಸ್ ಪುಸ್ಪುಸ್ಲೊ.
************************
2009 ಇಸ್ವೆಚಿ ಅಕ್ಟೋಬರ್ 28 ತಾರೀಕ್ ಬುದ್ವಾರ್ :
ಹ್ಯಾ ಪಾಂಚ್ ಸಾಂದ್ಯಾಂಚಾ ಪಂಗ್ಡಾಕ್ ಏಕಾ ಕಾರಾಚಿ ಗರ್ಜ್ ಆಸ್‍ಲ್ಲಿ. ಹೊಟೇಲಾ ಲಾಗ್ಸಾರ್ ಆಸ್ಚಾ ಕಾರಾಂ ಭಾಡ್ಯಾಕ್ ಚಲೊಂಕ್ ದಿಂವ್ಚಾ ಕಂಪ್ಣೆ ಥಾವ್ನ್ ರೊಲಂಡೊನ್ ಏಕ್ ಹೊಂಡಾ ಎಕೊರ್ಡ್ ಕಾರ್ ಘೆತ್ಲೆಂ. ಕಾರ್‍ಲೊಸಾ ಲಾಗಿಂ ಏಕ್ ಸ್ಥಳೀಯಿ ಸಿಮ್-ಕಾರ್ಡ್ ಆಸ್‍ಲ್ಲೆಂ. ದುಬಯ್ಕ್ ಫೋನ್ ಕರ್ನ್ ತಾಕಾ ಖಬರ್ ದಿಲ್ಲ್ಯಾ ಮನ್ಶಾ ಥಾವ್ನ್ ನೈಲೆಶ್ ಪಟೇಲಾಚಾ ಪಯ್ಣಾ ಪ್ಲಾನಾಂತ್ ಕಿತೆಂಯಿ ಬದ್ಲಾವಣ್ ಆಸಾಗಿ ಮಣ್ಚಿ ಖಬರ್ ಘೆತ್ಲಿ. ಯೋಜನ್ ಮಾಂಡಾವಳೆ ಪರ್ಮಾಣೆ ಘಡ್ತೆಲೆಂ ಮಣ್ಚಿ ವರ್ದಿ ಆಯ್ಲಿ.
ಹಿ ವರ್ದಿ ಕಾರ್‍ಲೊಸಾನ್ ಅಪ್ಲ್ಯಾ ಪಂಗ್ಡಾಕ್ ದನ್ಪರಾಂಚಾ ಜೆವ್ಣಾ ತವಳ್ ಕಳಯ್ಲಿ.
"ಹೆಂ ಯೋಜನ್ ದುಬೈಂತ್ ತರ್ ದೆಡ್ಶೆಂ ಕಿಲೊಮೀಟರ್ ಪಯ್ಸ್ ಆಸ್ಚಾ ಅಬುಧಾಬಿಂತ್ ವಸ್ತಿ ಕರ್ಚೊ ಕಿತೆಂ ಮತ್ಲಬ್?" ಬೆಲಿಯಾನಾ ಜೆವ್ಣಾ ಮಧೆಂ ಸವಾಲ್ ಕೆಲೆಂ.
"ತೊಚ್ ದುಬಾವ್ ಮಾಕಾಯಿ ಧೊಸ್ತಾ." ಮ್ಹಣಾಲೊ ಫೆಲಿಪೊ.
"ದುಬಾವ್ ಕರಿನಾಕಾತ್." ಹಾಸ್ಲೊ ಕಾರ್‍ಲೊಸ್. "ಇತ್ಲ್ಯಾ ಬ್ರಹತ್ ಚೊರಿ ಘಡ್ತಾಚ್, ದುಬಯ್ಚೆ ಪೋಲಿಸ್ ವೊಗೊ ಬೊಸ್ತೆಲೆ ಮ್ಹಣ್ ತುಮಿ ಚಿಂತಾತ್? ದುಬಯ್ಚಾ ಗಲ್ಲೆಂ ಗಲ್ಲೆಂನಿ ಪೋಲಿಸ್ ಕಾರ್‍ಯನಿರತ್ ಜಾತೆಲೆ. ಹೊಟೆಲಾಂ ತಪಾಸಣ್ ಜಾತೆಲಿಂ. ತಾಂಚಿ ನದರ್ ಅಬುಧಾಬಿ ಪರ್ಯಾಂತ್ ಪಡ್ಚಾ ಪಯ್ಲೆಂ ಜಾಗೊ ಖಾಲಿ ಕರಿಜಾಯಿ."
"ಸಮ್ಜಾಲೆಂ." ರೊಲಂಡೊನ್ ತಕ್ಲಿ ಹಾಲಯ್ಲಿ.
"ಕಾರ್‍ಲೊಸಾಚಿಂ ಪ್ಲಾನಾಂ ಕೆದಾಳಾಯಿ ಯಶಸ್ವಿ ಜಾತಾತ್ ಕಿತ್ಯಾಕ್ ಜಾಣಾಂತ್?" ಸಾರಾನ್ ಕುಡ್ಸಿಲೆಂ. "ತೊ ಪೋಲಿಸಾಂ ಪ್ರಾಸ್ ಏಕ್ ಮೇಟ್ ಚಡ್ ಚಿಂತಾ."
*************************
2009 ಇಸ್ವೆಚಿ ಅಕ್ಟೋಬರ್ 29 ತಾರೀಕ್ ಬ್ರೇಸ್ತಾರ್ :
ವಿಮಾನ್ ನಿಲ್ದಾಣಾಚಾ ಏಕ್ ಕಿಲೊಮೀಟರ್ ಪಯ್ಸ್ ಅಪತ್ಕಾಲಿಕ್ ಹಳ್ದುವೆ ಜಳವ್ನ್ ರಾಕೊನ್ ಆಸ್ಚಾ ಕಾರ್‍ಲೊಸಾಚಾ ಕಾರಾನ್ ಏಕ್ ಮರ್ಸಿಡಿಶ್ ಪಾಶಾರ್ ಜಾಲ್ಲ್ಯಾ ಫರಾ ದುಬಾವಾಕ್ ಇಡೆಂ ದೀನಾಸ್ತಾನಾ ಪಾಟ್ಲಾವ್ ಕೆಲೊ. ಕಾರ್ ಪಾರ್ಕಿಂಗಾಕ್ ವಾಹಾನಾಂ ಪ್ರವೇಶ್ ಜಾಲಿಂ. ಮರ್ಸಿಡಿಶಾಚ್ಯಾ ಬಗ್ಲೆನ್ ದೋನ್ ಕಾರಾಂನಿ ಎದೊ‍ಳ್‍ಚ್ ಜಾಗೊ ಅಪ್ಣಾಯಿಲ್ಲೊ. ತಿಸ್ರ್ಯಾ ಸ್ಥಾನಾರ್ ಕಾರ್‍ಲೊಸಾಚಾ ಹೊಂಡಾನ್ ಜಾಗೊ ಭರ್‍ತಿ ಕೆಲೊ.
ನೈಲೇಶ್ ಪಟೇಲಾಚಾ ಕಾರ್ ಚಾಲಕಾನ್ ಭಾಯ್ರ್ ಯೇವ್ನ್ ಏಕ್ ಟ್ರೊಲಿ ಲಾಗಿಂ ವೊಡ್ಲಿ. ಹೊಂಡಾ ಎಕೊರ್ಡ್ ಕಾರಾ ಥಾವ್ನ್ ರೊಲಂಡ್ ಭಾಯ್ರ್ ನಿಕಾಳ್ಳೊ. ತಾಣೆಂಯಿ ಏಕ್ ಟ್ರೊಲಿ ವೋಡ್ನ್ ಡಿಕ್ಕಿಂಟ್ ಆಸ್ಚಿ ಲಗ್ಗೇಜ್ ಟ್ರೊಲಿಂತ್ ಭರ್ಲಿ. ಆತಾಂ ಪಂಗ್ಡಾಚೆ ಪಾಂಚ್‍ಯಿ ಸದಸ್ಯ್ ಭಾಯ್ರ್ ಯೇವ್ನ್ ಪಯ್ಣಾಕ್ ತಯಾರ್ ಜಾಲ್ಲೆ ಜಿನ್ಸಿಂ ಉಬೆ ಜಾಲೆ. ಕಾರ್‍ಲೊಸಾಚಿ ನದರ್ ಮರ್ಸಿಡಿಶಾಂತ್ ಆಯಿಲ್ಲ್ಯಾ ಮನ್ಶಾಂಚೆಂ ಚಲನ್ ವಲನ್ ಪಾರ್ಕಿತಾಲಿ. ಟ್ರೊಲಿ ಲೊಟ್ಚಿ ಜವಾಬ್ದಾರಿ ಡ್ರೈವರಾನ್ ಘೆತ್ಲಿ ಆನಿ ನೈಲೇಶ್ ಪಟೇಲ್ ತಾಚೆ ಬರಾಬರ್ ಚಲೊಂಕ್‍ಲಾಗ್ಲೊ.
ಅಪ್ಲೆ ಡ್ರೈವರಾ ಸಂಗಿಂ ನೈಲೇಶ್ ಪಟೇಲಾಚಿ ಚಾಲ್ ಫುಡೆಂ ಚರ್‍ಲಿ. ಕಾರ್‍ಲೊಸ್ ಅಪ್ಲೆ ಸಾಂಗಾತ್ಯಾಂ ಸವೆಂ ಟ್ರೊಲಿ ಲೊಟಿತ್ತ್ ನೈಲೇಶ್ ಪಟೇಲಾಚಾ ಪಾಟಾಪಟ್ ಲಿಫ್ಟಾ ಲಾಗಿಂ ಪಾವ್ಲೊ. ಲಿಫ್ಟಾಕ್ ರಾಕೊನ್ ಆಸ್ತಾನಾ ಕಿತೆಂಚ್ ಘಡ್ಲೆಂನಾ. ಸಕಯ್ಲ್ ಪಾವುಲ್ಲಿ ಲಿಫ್ಟ್ ಉಗ್ತೆಂ ಜಾವ್ನ್ ನೈಲೇಶ್ ಪಟೇಲ್ ಭಿತರ್ ಸರ್‍ತಾನಾ ರೊಲಂಡಾನ್ ಆಚಾನಾಕ್ ಆಮ್ಸೊರಾನ್ ಅಪ್ಲಿ ಟ್ರೊಲಿ ನೈಲೇಶ್ ಪಟೇಲಾಚಾ ಟ್ರೊಲಿಕ್ ಅಪ್ಟಿಲಿ.
"ಸೊರ್‍ರಿ." ರೊಲಂಡೊ ಚುರ್ಚುರ್ಲೊ.
"ಟ್ರೊಲಿ ಸಾಂಬಾಳ್." ನೈಲೇಶ್ ಪಟೇಲಾನ್ ಅಪ್ಲೆ ಡ್ರೈವರಾಕ್ ಅದೇಶ್ ದಿಲೊ.
ಡ್ರೈವರಾಚಾ ಹಾತಿಂ ಟ್ರೊಲಿ ನಿಸ್ರಾಲಿ ಆನಿ ತೊ ಟ್ರೊಲಿ ಪಾಟ್ಲ್ಯಾನ್ ಕೊನ್ಶಾಕ್ ಪಾವ್ಲೊ. ಕಾರ್‍ಲೊಸ್ ಪಂಗ್ಡಾಚಾ ಬಾಕಿಚಾ ಸದಸ್ಯಾಂನಿ ಸಂಶಯಾಕ್ ಆಸ್ಪದ್ ದೀನಾಸ್ತಾನಾ ಸಹಪ್ರಯಾಣಿಕಾಂ ಪರಿಂ ನೈಲೇಶ್ ಪಟೇಲಾ ಭಂವ್ತಿಂ ವೆಡ್ಕೊಳ್ ಘಾಲೊ. ಡ್ರೈವರ್ ಆನಿ ನೈಲೇಶ್ ಪಟೇಲಾ ಮಧೆಂ ಅಂತರ್ ಉಬ್ಜಾಲ್ಲೊ.
"ಎಕ್ಸ್ಯೂಜ್ ಮಿ." ಬೆಲಿಯಾನ್ ನೈಲೇಶ್ ಪಟೇಲಾ ಲಾಗಿಂ ಉಪ್ಕಾರ್ ಮಾಗ್ಲೊ. "ಎಮಿರೆಟ್ಸಾಚಿಂ ವಿಮಾನಾಂ ಹೆಚ್ ಜಾಗ್ಯಾ ಥಾವ್ನ್ ಸುಟ್ತಾಮೂ?"
"ಛೆ... ತುಂ ಚೂಕ್ ಜಾಗ್ಯಾಕ್ ಆಯ್ಲ್ಯಾಯಿ." ನೈಲೇಶ್ ಪಟೇಲ್ ಕ್ಷುಲಕ್ಷ್‍ಪಣಿಂ ಮಾತ್ಸೆಂ ಹಾಸ್ಲೊ. "ಹೆಂ ಎಕಾ ನಂಬ್ರಾಚೆಂ ಟರ್ಮಿನಲ್. ಆದಿಂ ಎಮಿರೆಟ್ಸಾಚಿಂ ಸರ್ವ್ ವಿಮಾನಾಂ ಹೆಚ್ ಟರ್‍ಮಿನಲಾ ಥಾವ್ನ್ ಸುಟ್ತಾಲಿಂ. ಆತಾಂ ಎಮಿರೆಟ್ಸಾಂಚಾ ವಿಮಾನಾ ಖಾತಿರ್ ಏಕ್ ಪ್ರತ್ಯೇಕ್ ಟರ್ಮಿನಲ್ ನಿರ್ಮಾಣ್ ಕೆಲಾಂ. ತೆಂ ತೀನ್ ನಂಬ್ರಾಚೆಂ ಟರ್ಮಿನಲ್. ಟೆನ್ಶನ್ ಕರಿನಾಕಾತ್. ಚಡ್ ಪಯ್ಸ್ ನಾ."
"ಓಹ್ ನೊ." ಸಾರಾನ್ ಅತ್ರಪ್ತಿ ವೆಕ್ತ್ ಕೆಲಿ. "ಆಮ್ಚೆ ಲಾಗಿಂ ಚಡಿತ್ ವೇಳ್ ನಾ."
ತಿತ್ಲ್ಯಾರ್ ಲಿಫ್ಟ್ ವಯ್ರ್ ಪಾವುಲ್ಲಿ. ತಾಣಿಂ ಸರ್ವಾಂನಿ ಭಾಯ್ರ್ ನಿಕ್ಳೊನ್ ನೈಲೇಶ್ ಪಟೇಲಾಕ್ ಆನಿ ತಾಚೆ ಡ್ರೈವರಾಕ್ ವಾಟ್ ಸೊಡ್ನ್ ದಿಲಿ. ಟ್ರೊಲಿ ಆನಿ ಡ್ರೈವರಾ ಸವೆಂ ತೊ ಸರಾರಾಂ ವಿಮಾನ್ ನಿಲ್ಡಾಣಾ ತೆವ್ಶಿನ್ ಚಲೊನ್ ಗೆಲೊ. ಕಾರ್‍ಲೊಸ್ ಆನಿ ತಾಚೆ ಸಾಂಗಾತ್ಯಾಂನಿ ಪಾಟಿಂ ಲಿಫ್ಟಾಕ್ ರಿಗೊನ್ ಸಕ್ಲಾ ವೆಚಿ ವಾಟ್ ವಾಪರ್‍ಲಿ.
ಕಾರಾ ಲಾಗಿಂ ಪಾವ್ತಾಂ ಮ್ಹಣಾಸರ್ ಕೋಣ್ಂಚ್ ಉಲಯ್ಲೆನಾಂತ್. ಕಾಳ್ಜಾಂತ್ ಉಲ್ಲಾಸ್ ಆನಿ ಖರಸ್ ಉಮಾಳೊಂಕ್ ಲಾಗ್‍ಲ್ಲಿ. ಟ್ರೊಲಿಂತ್ ಆಸ್ಚಿ ಲಗ್ಗೇಜ್ ತಾಣಿಂ ಕಾರಾಚಾ ಡಿಕ್ಕಿಕ್ ವರ್ಗಾಹ್ಸಿಲಿ. ತ್ಯಾ ಪಯ್ಕಿ ಏಕ್ ಕಾಳೆಂ ಬೇಗ್ ಅಪ್ಲೆ ಚೊರ್ ಚಾವಿಯೆ ಥಾವ್ನ್ ಉಗ್ತೆಂ ಕರ್ನ್ ಕಾರ್‍ಲೊಸಾನ್ ದೀಷ್ಟ್ ಘಾಲಿ. ಸರ್‍ವಾಂಚಿ ತಾಳ್ನೆಭರಿತ್ ನದರ್ ಬೇಗಾ ಭಿತರ್ ಖಂಚ್ಲಿ.
ಪರ್ಜಳ್ಚೆ ಭಾಂಗಾರಾಚೆ ಕುಡ್ಕೆ!
ಲಗ್ಭಗ್ 1.6 ಮಿಲ್ಲಿಯನ್ ಡೊಲ್ಲರ್‍ಸಾಂಚೊ ಫೆರ್‍ಗೊ!!
"ಕಿತ್ಲ್ಯಾ ಸಲೀಸಾಯೆನ್ ತುಂವೆಂ ತೆಂ ಕಾಳೆಂ ಬೇಗ್ ಟ್ರೊಲಿ ಥಾವ್ನ್ ಬದ್ಲಿಲೆಂಯಿಂ!" ಫೆಲಿಪೊನ್ ಕಾರ್‍ಲೊಸಾಚಿ ಪಾಟ್ ಥಾಪುಡ್ಲಿ. "ಆಮ್ಚೆ ಜೈತಾಚಾ ಆಚರಣಾಚಿ ಘಡಿ ಲಾಗಿಂ ಪಾವ್ಲ್ಯಾ."
"ಆಚರಣ್ ಸಾಧ್ಯ್ ಫಕತ್ ಯುಎಇ ಥಾವ್ನ್ ವಿಮಾನಾರ್ ಉಬ್‍ಲ್ಲ್ಯಾ ಉಪ್ರಾಂತ್ ಮಾತ್ರ್." ಕಾರ್‍ಲೊಸ್ ಸುಡ್ಸುಡಿತ್ ಜಾಲೊ. "ಆಜೂನ್ ಜಾಯ್ತೆಂ ಕಾಮ್ ಬಾಕಿ ಆಸಾ."
ತಾಣೆ ಸ್ಟಿಯರಿಂಗಾಚೆಂ ನಿಯಂತ್ರಣ್ ಅಪ್ಲೆ ತಾಬೆನ್ ಘೆತ್ಲೆಂ. ಬಾಕಿಚಾಂನಿ ಕಾರಾ ಭಿತರ್ ಬಸ್ಕಾ ಘೆತ್ಲಿ. ಅಬುದಾಬಿ ತೆವ್ಶಿನ್ ಕಾರಾನ್ ವೇಗ್ ಆರಾಯ್ಲೊ. ಜೆಬೆಲ್ ಆಲಿ ಥಾವ್ನ್ ಮಾತ್ಸೆಂ ಮುಕಾರ್ ವೆತಾಚ್ ಕಾರ್‍ಲೊಸಾನ್ ಅಪ್ಲೆಂ ಕಾರ್ ಉಜ್ವ್ಯಾಕ್ ರಾವಯ್ಲೆಂ. ಡಿಕ್ಕಿಂತ್ ಆಸ್ಚೆ ತೀನ್ ವ್ಹಡ್ ಗಾತ್ರಾಚೆ ಖಾಲಿ ಕಂಪ್ಯೂಟರ್ ಡಬ್ಬೆ ಉಗ್ತೆಂ ಕರ್ನ್ ತಾಣಿಂ ಸರ್ವ್ ಭಾಂಗಾರ್ ಭಿತರ್ ರಿಗವ್ನ್ ಡಬ್ಬ್ಯಾಂಕ್ ಖಿಳೆ ಘಾಲ್ನ್ ಬಂಧ್ ಕೆಲೆ. ಕಾಮ್ ತಿರ್ಸಾತಾಚ್ ಸರ್ವಾಂನಿ ಪಾಟಿಂ ಅಪಾಪ್ಲಿ ಬಸ್ಕಾ ಘೆತ್ಲಿ. ಅಬುಧಾಬಿಚೆಂ ಪಯ್ಣ್ ಮುಕಾರ್ಸುನ್ ವ್ಹೆಲೆಂ.
ಅಬುಧಾಬಿ ಶೆರಾಕ್ ಪಾವ್ತಾಚ್ ಏಕಾ ಕುರಿಯೆರ್ ಕಂಪೆನಿಚಾ ದಫ್ತರಾ ಭಾಯ್ರ್ ತಾಣಿಂ ಕಾರ್ ಸ್ಥಬ್ದ್ ಕೆಲೆಂ. ಕಂಪ್ಯೂಟರಾಚೆ ಡಬ್ಬೆ ದಫ್ತರಾಕ್ ವ್ಹರ್ನ್ ಮೆಕ್ಸಿಕೊಕ್ ಧಾಡ್ಚಿ ವಿಲೇವರಿ ಕೆಲಿ. ಫೆಲಿಪೊನ್ ಮೆಕ್ಸಿಕೊಂತ್ ಆಸ್ಚಾ ಅಪ್ಲೆ ವಿಳಾಸಾಕ್ ಪಾರ್ಸೆಲ್ ಧಾಡ್ಚೊ ಅದೇಶ್ ದೀವ್ನ್ ಕುರಿಯೆರ್ ಕಂಪೆನಿಚೆಂ ಬಿಲ್ಲ್ ಅಪ್ಲೆ ಅಧೀನ್ ಕೆಲೆಂ. ಹೊಟೆಲಾಕ್ ವೆಚಾ ಪಯ್ಲೆಂ ಭಾಡ್ಯಾಕ್ ಘೆತ್‍ಲ್ಲೆಂ ಕಾರ್ ಪಾಟಿಂ ಕಂಪ್ಣೆಕ್ ಪಾವಿತ್ ಕೆಲೆಂ. ಟೆಕ್ಸೆಚೆರ್ ತಾಂಚೊ ಪಂಗಡ್ ಹೊಟೆಲಾಕ್ ಪಾವ್ಲೊ. ತಾಣಿಂ ವೇಳ್ ವೆರ್ಥ್ ಕೆಲೊ ನಾ. ರೂಮಾಚೆಂ ಬಿಲ್ಲ್ ಫಾರಿಕ್ ಕರ್ನ್ ತಾಣಿಂ ವಿಮಾನ್ ನಿಲ್ಡಾಣಾಚಿ ವಾಟ್ ಘೆತ್ಲಿ.
ಪಾಟಿಂ ಮೆಕ್ಸಿಕೊಕ್ ವೆಚೆಂ ಯೋಜನ್ ತಾಣಿಂ ಬದ್ಲಿಲೆಂ.. ರಾತಿಂ ಇಕ್ರಾ ವೊರಾಂಚಾ ವಿಮಾನಾರ್ ಕಾರ್‍ಲೊಸ್ ಆನಿ ತಾಚೆ ಸಾಂಗಾತ್ಯಾಂನಿ ಹೊಂಕೊಂಗ್ ದಿಶಾಚೆಂ ಪಯ್ಣ್ ಘೆತ್ಲೆಂ. ವಿಮಾನ್ ಆಕಾಸಾಕ್ ಪಾವ್ತಾಚ್ ಥೊಡ್ಯಾಚ್ ವೇಳಾನ್ ಗಗನ್ ಸಖಿಂನಿ ಸೊರ್‍ಯಾಚೊ ಸತ್ಕಾರ್ ದಿಲೊ. ಕಾರ್‍ಲೊಸಾಚಾ ಪಂಗ್ಡಾನ್ ಶಾಂಪೆನಾಚಿ ವಿಂಚವ್ಣ್ ಕೆಲಿ.
"ಚಿಯರ್ಸ್" ಕಾರ್‍ಲೊಸಾಚಾ ತೋಂಡಾರ್ ರೂಂದ್ ಹಾಸೊ ಪರ್ಜಳ್ಳ್ಯೊ. "ಆತಾಂ ಆಮ್ಚಿ ಯಶಸ್ವಿ ಆಚರಣ್ ಕರ್ಚ್ಯಾಂತ್ ಚೂಕ್ ನಾ. ದುಬಯ್ಚೆ ಪೋಲಿಸ್ ಬಹುಶಾ ಚೊರಾಂಚಾ ಸೊಧ್ನೆರ್ ಮಾತೆಂ ಖೊರ್ಪುನ್ ಆಸಾತ್ ಆನಿ ಹರ್‍ಯೆಕಾ ಸೆಕುಂಡಾಕ್ ಆಮಿ ತಾಂಚೆ ಥಾವ್ನ್ ಪಯ್ಸ್ ಉಬೊನ್ ಆಸಾಂವ್.... ಭೋವ್ ಪಯ್ಸ್!"
ಪಯ್ಣಾಚೊ ಸತ್ಕಾರ್ ಜಾವ್ನ್ ಲಾಭ್ಚೆಂ ಆಮಾಲ್ ಪೀವನ್ ತಾಣಿಂ ದರಬಸ್ತ್ ಘೆತ್ಲೆಂ. ಪುಣ್ ಲಾಂಬ್ ಪಯ್ಣಾ ಉಪ್ರಾಂತ್ ಹೊಂಕೊಂಗ್ ಪಾವ್ತಾಚ್ ಸ್ವತಂತ್ರ್ ಸುಕ್ಣ್ಯಾಪರಿಂ ವಿಮಾನಾ ಥಾವ್ನ್ ಭಾಯ್ರ್ ವೆಚೆಂ ಭಾಗ್ ತಾಂಕಾಂ ಫಾವೊ ಜಾಲೆಂ ನಾ. ವಿಮಾನ್ ಧರ್ಣಿಕ್ ತೆಂಕೊನ್ ಥೊಡ್ಯಾಚ್ ಮಿನುಟಾಂನಿ ಹೊಂಕೊಂಗ್ ಪೋಲಿಸಾಂಚಿ ಏಕ್ ಫವ್ಜ್ ವಿಮಾನಾ ಭಿತರ್ ಪಾವ್ಲಿ.
ಕಿತೆಂ ಮ್ಹಣ್ ಸಮ್ಜೊಂಚಾ ಆದಿಂ ಕಾರ್‍ಲೊಸ್ ಆನಿ ತಾಚೆ ಚಾರ್ ಸಾಂಗಾತ್ಯಾಂಕ್ ಪೋಲಿಸಾಂನಿ ಕೈದ್ ಕರ್ನ್ ಭಾಯ್ರ್ ಅಪವ್ನ್ ವ್ಹೆಲೆಂ!
***********************
2009 ಇಸ್ವೆಚಿ ಅಕ್ಟೋಬರ್ 30 ತಾರೀಕ್ ಸುಕ್ರಾರ್ :
ಸಾಂಜ್ ಪಾಶಾರ್ ಜಾವ್ನ್ ರಾತಿಚೆಂ ಯೆಣೆ ಜಾಲ್ಲೆಂ. ಹೊಂಗಾಂಗಾ ಥಾವ್ನ್ ಆಯಿಲ್ಲ್ಯಾ ವಿಮಾನಾನ್ ದುಬಯ್ಚಾ ರನ್‍ವೇಕ್ ಉಮೊ ದಿಲೊ. ಹೊಂಕೊಂಗಾಂತ್ ಬಂಧಿತ್ ಜಾಲ್ಲ್ಯಾ ಕಾರ್‍ಲೊಸ್ ಆನಿ ತಾಚೆ ಸಾಂಗಾತ್ಯಾಂಕ್ ಪಾಟಿಂ ದುಬಂಯ್ತ್ ಪೋಲಿಸಾಂಚೊ ಯೆವ್ಕಾರ್ ಲಾಭ್ಲೊ. ದುಬಯ್ಚಾ ಪೋಲಿಸ್ ತನ್ಕೆ ಕೂಡಾಂತ್ ಮುಕೇಲ್ ಪೋಲಿಸ್ ಲುಟೆನೆಂಟ್ ಆನಿ ತಾಚೊ ಸಾಂಗಾತಿ ಮೇಜರ್ ಜನರಲಾನ್ ಬಸ್ಕಾ ಘೆತ್‍ಲ್ಲ್ಯೊ. ನೈಲೇಶ್ ಪಟೇಲಾಕ್ ಸಾಮ್ಕಾರ್ ಬೊಸಯಿಲ್ಲೊ. ಉಬೆಂ ಆಸ್ಚಾ ಕಾರ್‍ಲೊಸ್, ಫೆಲಿಪೊ, ಸಾರಾ, ರೊಲಂಡೊ ಆನಿ ಬೆಲಿಯಾಕ್ ಕಶೆಂ ಸಾಂಪ್ಡಾಲಿಂ ಮ್ಹಣ್ ಆಜೂನ್ ಕಳಿತ್ ನಾತ್‍ಲ್ಲೆಂ.
"ಹಿ ಚೊರಿ ಕಶೆಂ ಧರ್ಲಿ ಮ್ಹಣ್ ತುಮಿ ಆಜೂನ್ ಮಾಕಾ ಸಾಂಗೊಂಕ್ ನಾ." ನೈಲೇಶ್ ಪಟೇಲಾನ್ ಕೂತೂಹಲ್ ವೆಕ್ತ್ ಕೆಲೊ.
"ಭಾಂಗಾರಾಚಾ ಚೊರಿಯೆಚಾ ಯಶಸ್ವೆಚೆಂ ಆಚರಣ್ ಜಾವ್ನ್ ವಿಮಾನಾರ್ ಶಾಂಪೇನ್ ದರಬಸ್ತ್ ಪಿಯೊನ್ ಹಾಣಿಂ ಆಮ್ಚಿಂ ನಕ್ಲಾಂ ಜರೂರ್ ಕೆಲ್ಯಾಂತ್ ಆಸ್ತೆಲಿಂ." ಪೋಲಿಸ್ ಲುಟೆನಂಟ್ ಅಪ್ಲ್ಯಾ ಸಾಂಗಾತಿ ಮೇಜರ್ ಜನರಲಾಕ್ ಉದ್ಧೇಶುನ್ ಮ್ಹಣಾಲೊ.
"ಜೆದ್ನಾಂ ಪೋಲಿಸಾಂ ಪ್ರಾಸ್ ಚೋರ್ ಏಕ್ ಮೇಟ್ ಚಡ್ ಚಿಂತಾ, ತವಳ್ ತಾಣೆ ಸಾಂಪಾಡ್ಚೊ ಸಂಭವ್ ಅಪ್ಸೊಚ್ ಉಬ್ಜಾತಾ." ಮೇಜರ್ ಜನರಲಾನ್ ಕುಡ್ಸಿಲೆಂ. "ಕಿತ್ಯಾಕ್ ಮ್ಹಳ್ಯಾರ್ ಮುಕಾರ್ ಚಿಂತ್ಚಾ ಮನ್ಶಾಕ್ ಪಾಟ್ಲ್ಯಾನ್ ಕಿತೆಂ ಘಡೊನ್ ಆಸಾ ಮ್ಹಣ್ ಜಾಯ್ತೆ ಪಾವ್ಟಿಂ ಖಬರ್ ಆಸಾನಾ."
"ಇಮ್ಮಿಗ್ರೇಶನಾ ಉಪ್ರಾಂತ್ ಹ್ಯಾಂಡ್ ಬೇಗ್ ತಪಾಸಣ್ ಕರ್‍ತಾನಾ ಜೆದ್ನಾಂ ತುಕಾ ತುಜೆಂ ಕಾಳೆಂ ಬೇಗ್ ಉಗ್ತೆಂ ಕರುಂಕ್ ಜಾಲೆಂ ತವಳ್ ತುಂವೆಂ ಪೋಲಿಸಾಂಚಿ ಮಜತ್ ಘೆತ್ಲಿಯಿ." ಪೋಲಿಸ್ ಲುಟೆನಂಟ್ ನೈಲೇಶ್ ಪಟೇಲಾ ತೆವ್ಶಿನ್ ಘುಂವ್ಲೊ. "ತುಜೆಂ ಬೇಗ್ ಖಬ್ರೆವಿಣೆ ಅದಲ್‍ಬದಲ್ ಜಾಲ್ಲೆಂ. ಬದ್ಲಾಲ್ಲೆಂ ಬೇಗ್ ಪೋಲಿಸಾಂನಿ ಫೊಡ್ನ್ ಇಟೆ ದಾಕಯ್ತಾನಾ ತುಂ ಘುಡ್ಬಡ್ಲೊಯಿ ಆನಿ ಚೊರಿಯೆಚೆಂ ಕಂಪ್ಲೆಂಟ್ ದರ್ಜ್ ಕೆಲೆಂಯಿ. ಹಾಚೆ ಉಪ್ರಾಂತ್ ಕಿತ್ಲೆ ಪೋಲಿಸ್ ಕಾರ್ಯ್‍ನಿರತ್ ಜಾಲೆ ಮ್ಹಣ್ ತುಕಾ ಖಬರ್ ಆಸಾ?"
ಪೋಲಿಸ್ ಲುಟೆನಂಟಾನ್ ಲಾಂಬ್ ಶ್ವಾಸ್ ಸೊಡ್ಲೊ.
"ಹ್ಯಾ ಮಿಸಾಂವಾ ಪಾಟ್ಲ್ಯಾನ್ ಚಾಳೀಸ್ ಆನಿ ದೋನ್ ಪೋಲಿಸ್ ಪಂಗ್ಡಾಂಚಿ ಮ್ಹಿನತ್ ಅಟಾಪ್ಲ್ಯಾ." ಮೇಜನ್ ಜನರಲಾನ್ ಮುಕಾರ್ಸಿಲೆಂ. "ಕಾರ್ ಪಾರ್‍ಕಿಂಗಾಚಾ ಸರ್ವಿಲೆನ್ಸ್ ಕೆಮೆರಾ ದ್ವಾರಿಂ ತುಜಾ ಕಾರಾಚಾ ಥೊಡ್ಯಾಚ್ ಅಂತರಾಚೆರ್ ಏಕ್ ಹೊಂಡಾ ಎಕೊರ್ಡ್ ರಾವಯಿಲ್ಲೆಂ ಮಾತ್ರ್ ನಯ್, ತಾಚೆ ಥಾವ್ನ್ ದೆಂವ್‍ಲ್ಲ್ಯಾ ಮನ್ಶಾಂನಿ ತುಜೊ ಪಾಟ್ಲಾವ್ ಕೆಲ್ಲೊ ಮ್ಹಣ್ ಆಮ್ಕಾಂ ಕಳಿತ್ ಜಾಲೆಂ. ಪುಣ್ ಸರ್ವಿಲೆನ್ಸ್ ಕೆಮೆರಾಂತ್ ಕಾರಾಚೆಂ ನಂಬರ್ ಸಾರ್‍ಕೆಂ ದಿಸಾನಾತ್‍ಲ್ಲೆಂ ಜಾಲ್ಲ್ಯಾನ್ ಹ್ಯಾ ಕಾರಾಚಿ ನೊಂದವ್ಣಿ ಕೋಣಾಚಾ ನಾಂವಾರ್ ಜಾಲ್ಯಾ ಮ್ಹಣ್ ನಖ್ಖಿ ಕರುಂಕ್ ಜಾಲೆಂನಾ ತರ್-ಯೀ ಹೆಂ ರೆಂಟಲ್ ಕಂಪ್ಣೆಚೆಂ ಕಾರ್ ಜಾವ್ನಾಸ್ತೆಲೆಂ ಮ್ಹಣ್ ಆಮ್ಚಾ ಗಮನಾಕ್ ಗೆಲೆಂ."
"ರೆಂಟಲ್ ಕಂಪೆನಿಚಿ ಮಾಹೆತ್ ಅಪ್ಣಾಯ್ತಾನಾ ಯುಎಯಿ-೦ತ್ ಆಸ್ಚಾ ವೆವೆಗ್ಳ್ಯಾ ಕಾರ್ ರೆಂಟಲ್ ಕಂಪ್ಣೆಂಲಾಗಿಂ ಅಸಲ್ಯಾ ಮೊಡೆಲ್ ಆನಿ ರಂಗಾಚಿಂ ೩೫೮ ಕಾರಾಂ ಆಸಾತ್ ಮಣ್ಚಿ ವರ್ದಿ ಮೆಳ್ಳಿ." ಪೋಲಿಸ್ ಲುಟೆನಾಂಟಾನ್ ತಾಳೊ ಸದಿಳ್ ಕೆಲೊ. "ಫುಡ್ಲ್ಯಾ ತನ್ಕೆಂತ್ ಅಬುಧಾಬಿಚಾ ಏಕಾ ಕಾರ್ ರೆಂಟಲ್ ಕಂಪ್ಣೆನ್ ಎಕಾ ಮೆಕ್ಸಿಕನ್ ನಿವಾಸಿಂಚಾ ಪಂಗ್ಡಾಕ್ ಭಾಂಗ್ರಾಳ್ಯಾ ವರ್ಣಾಚೆಂ ಹೊಂಡಾ ಎಕೊರ್ಡ್ ದಿಲ್ಲೆಂ ಮ್ಹಣ್ ಸೂಚಿತ್ ಜಾಲೆಂ ತರೀ ಕಾರ್ ಘೆಂವ್ಕ್ ತಾಣಿಂ ದಿಲ್ಲಿಂ ದಸ್ತಾವೇಜಾಂ ನಕ್ಲಿ ಮ್ಹಣ್ಚೆಂ ಪೋಲಿಸಾಂಕ್ ಕಳ್ತಾನಾ ತ್ಯಾ ಪಂಗ್ಡಾಚೆರ್ ಆಮ್ಚೊ ದುಬಾವ್ ಚಡ್ಲೊ. ವಿಮಾನ್ ನಿಲ್ದಾಣಾಚಾ ಇಮ್ಮಿಗ್ರೇಶನ್ ದಫ್ತರಾಂತ್ ಸೊಧ್ನಾಂ ಕರ್‍ತಾನಾ ದೋನ್ ದೀಸಾಂ ಆದಿಂ ಮೆಕ್ಸಿಕನ್ ಜೊಡೆಂ ಆನಿ ಕೊಸ್ತಾ ರಿಕಾಚೆ ಪಯ್ಣಾರಿ ಅಬುಧಾಬಿ ಏರ್‌ಪೋರ್‍ಟಾ ದ್ವಾರಿಂ ಭಿತರ್ ರಿಗ್ಲ್ಯಾತ್ ಮ್ಹಣ್ ಕಳಿತ್ ಜಾಲೆಂ. ಕಾರ್ ರೆಂಟಲ್ ಕಂಪ್ಣೆನ್ ದಿಲ್ಲ್ಯಾ ಮನ್ಶಾಂಚೆಂ ವರ್ಣನ್ ವಿಮಾನ್ ನಿಲ್ಡಾಣಾಚಾ ಸರ್ವಿಲೆನ್ಸ್ ಕೆಮೆರಾನ್ ಅಪ್ಣಾಯಿಲ್ಲ್ಯಾ ವೆಕ್ತಿಂಚಾ ವಿಶಿಷ್ಟಾತೆಂಕ್ ತಾಳ್ ಪಡ್ಲೆಂ. ವಿಚಿತ್ರ್ ಕಿತೆಂ ಮಳ್ಯಾರ್ ಹಾಂಚೆ ನಾಂವಾಚೆರ್ ಪಾಟಿಂ ಮೆಕ್ಸಿಕೊ ವೆಚೊ ಟಿಕೆಟ್ಸ್ ಆಸ್‍ಲ್ಲ್ಯೊ ತರೀ ಕಾಲ್ಚಾ ರಾತಿಂ ಹೊಂಗ್‍ಕೊಂಗಾಚಿ ವಾಟ್ ಧರ್‍ಲ್ಯಾ ಮ್ಹಣ್ ಆಮಿ ಇಮ್ಮಿಗ್ರೇಶನಾ ದ್ವಾರಿಂ ಜಾಣಾ ಜಾಲ್ಯಾಂವ್. ಇಂಟರ್‌ಪೋಲಾಚಾ ಮಜತೆನ್ ಆಮಿ ತಾಂಕಾಂ ಪಾಟಿಂ ಹಾಡಯ್ಲೆಂ."
"ಪುಣ್ ಮಜೆಂ ಭಾಂಗಾರ್?" ನೈಲೇಶ್ ಪಟೇಲ್ ಹುಳ್ವುಳ್ಳೊ.
"ಭಾಂಗಾರ್‌ಯಿ ಪಾಟಿಂ ಯೆತೆಲೆಂ." ಮೇಜರ್ ಜನರಲ್ ಮ್ಹಣಾಲೊ. "ಸುರಕ್ಷಾ ತಪಾಸಣ್ ನಾಸ್ತಾನಾ ವಿಮಾನ್ ನಿಲ್ದಾಣಾ ಥಾವ್ನ್ ಭಾಂಗಾರ್ ಭಾಯ್ರ್ ವೆಚೆಂ ಅಸಂಭವ್ ಮ್ಹಣ್ ಹ್ಯಾ ಗ್ಯಾಂಗಾಕ್ ಕಳಿತ್ ಆಸ್‍ಲ್ಲೆಂ. ಸಾಂಗಾತಾಚ್ ಹಾಂಚೆ ಥಾವ್ನ್ ಏಕ್ ಚೂಕ್ ಘಡ್‍ಲ್ಲಿ. ಹಾಂಚೆಂ ಪಾರ್ಸೆಲ್ ಮೆಕ್ಸಿಕೊಕ್ ಧಾಡ್‍ಲ್ಲ್ಯಾ ಕುರಿಯೆರ್ ಕಂಪ್ಣೆನ್ ದಿಲ್ಲ್ಯಾ ಬಿಲ್ಲಾಚಿ ಏಕ್ ಪ್ರತಿ ಚುಕಾಮುಕಿಂ ಹೊಂಡಾ ಎಕೊರ್ಡ್ ಕಾರಾಂತ್ ಹಾಣಿಂ ಗಳಯಿಲ್ಲಿ. ಮೆಕ್ಸಿಕೊಚಾ ವಾಟೆರ್ ಆಸ್‍ಲ್ಲೆಂ ಹಾಂಚೆಂ ಪಾರ್ಸೆಲ್ ಯೂರೋಪಾಂತ್ ರಾವೊನ್ ಪಾಟಿಂ ಹಾಡ್ಚಿ ವಿಲೆವರಿ ಕೆಲ್ಯಾ. ಹ್ಯಾ ಚೊರಾಂನಿ ಹೊಂಕೊಂಗಾಚೆಂ ಪಯ್ಣ್ ಆರಂಭ್ ಕೆಲ್ಲ್ಯಾ 90 ಮಿನುಟಾಂ ಭಿತರ್ ದುಬಯ್ಚಾ ಪೋಲಿಸಾಂನಿ ಶೋಧನ್ ಪೂರ್ಣ್ ಕರ್ನ್ ಚೊರಾಂಚಿ ವಳಕ್ ಆನಿ ಝಳಕ್ ಧರ್‌ಲ್ಲಿ ಮಾತ್ರ್ ನಯ್, ಭಾಂಗಾರ್‌ಯಿ ಅಪ್ಲೆ ನಿಯಂತ್ರಣಾಕ್ ಘೆತ್‍ಲ್ಲೆಂ."
"ಪುಣ್...." ಪೋಲಿಸ್ ಲುಟೆನಂಟಾನ್ ಲಾಂಬ್ ಶ್ವಾಸ್ ಸೊಡ್ಲೊ. "ಲುಟ್ಕಾರ್ ಶಿರ್ಕಾಲ್ಯಾತ್ ಆನಿ ಮಾಲ್ ಆಮ್ಚಾ ತಾಬೆಕ್ ಯೆಂವ್ಚಾರ್ ಆಸಾ ತರ್-ಯೀ ಥೊಡ್ಯಾ ಸವಾಲಾಂಕ್ ಆಜೂನ್ ಜಾಪಿ ಮೆಳೊಂಕ್ ನಾಂತ್."
"ಕಸಲಿಂ ಸವಲಾಂ?" ನೈಲೇಶ್ ಪಟೇಲಾಕ್ ಸಮ್ಜಾಲೆಂನಾ.
"ಹ್ಯಾ ಚೋರಾಂಕ್ ತುಂ ಖಂಚಾ ತಾರೀಕೆಕ್, ಖಂಚಾ ವಿಮಾನಾರ್ ಮಲೇಶಿಯಾ ಪಯ್ಣ್ ಕರ್ತೊಲೊಯಿ, ತುಜೆಲಾಗಿಂ ಭಾಂಗಾರ್ ಆಸ್ತೆಲೆಂ ಆನಿ ಕಿತ್ಲ್ಯಾ ವೊರಾಂಚೆರ್ ವಿಮಾನ್ ನಿಲ್ದಾಣಾಕ್ ಪಾವ್ತೊಲೊಯಿ ಮಣ್ಚಿ ಸರ್ವ್ ಮಾಹೆತ್ ಪಯ್ಲೆಂಚ್ ಕಳಿತ್ ಆಸ್‍ಲ್ಲಿ. ಥೊಡೆ ಪಾವ್ಟಿಂ ಮ್ಹಾಕಾ ದುಬಾವ್ ಧೊಸ್ತಾ ಹಿ ಚೊರಿ ಇನ್ಶುರೆನ್ಸ್ ಜೊಡ್ಚಾ ಉದ್ಧೇಶಾನ್ ತುಂವೆಂಚ್ ಕರಯಿಲ್ಲಿ ಜಾಂವ್ಕ್ ಪುರೊ ಮ್ಹಣೊನ್." ಪೋಲಿಸ್ ಲುಟೆನಂಟ್ ಸಾಂಗೊಂಕ್ ನರ್ಗಾಲೊನಾ.
"ಕಿತೆಂ ಉಲಯ್ತಾತ್ ತುಮಿ?" ನೈಲೇಶ್ ಪಟೇಲಾಚಾ ಕಪಾಲಾರ್ ಮಿರಿಯೊ ಚರ್‍ಲ್ಯೊ.
"ಆಮಿ ಚಿಂತಿನಾಸ್ತಾನಾ ಉಲಯ್ನಾಂವ್." ಮೇಜರ್ ಜನರಲಾನ್ ತೀಕ್ಷ್ಣ್ ಜಾಪ್ ದಿಲಿ. "ತುಂವೆಂ ಪಯ್ಣಾಚೆರ್ ಸಾಂಗಾತಾ ಘೆವ್ನ್ ವೆಚಾ ಭಾಂಗಾರಾಚೆರ್ ಇನ್ಶುರೆನ್ಸ್ ಆಸ್‍ಲ್ಲೆಂ ಮ್ಹಣ್ಚಾಕ್ ಧಾಕ್ಲೊ ಆಸಾ."
"ಹೆಂ ಮ್ಹಜೆಂ ಪಯ್ಲೆಂ ಪಯ್ಣ್ ನಯ್." ನೈಲೇಶ್ ಪಟೇಲ್ ತಾಪ್ಲೊ. "ಭಾಂಗಾರ್ ಘೆವ್ನ್ ಪಯ್ಣ್ ಕರ್‍ತಾನಾ ಮಾಲಾಚೆರ್ ಇನ್ಶುರೆನ್ಸ್ ಕರ್ಚಿ ರಿವಾಜ್ ಆದಿಂ ಥಾವ್ನ್ ಆಮಿ ಪಾಳ್ನ್ ಆಸಾಂವ್."
"ತಿತ್ಲೊಯಿ ಅಸ್ಥಿರ್ ಜಾಯ್ನಾಕಾ." ಪೋಲಿಸ್ ಲುಟೆನಂಟಾನ್ ಆದೇಶ್ ದಿಲೊ. "ಸತಾಂ ಚಡ್ ವೇಳ್ ಲಿಪೊನ್ ರಾವಾನಾಂತ್. ಕಾರ್‍ಲೊಸಾ ಲಾಗಿಂ ಏಕ್ ಸ್ಥಳೀಯಿ ಸಿಮ್ ಕಾರ್ಡ್ ಆಸ್‍ಲ್ಲೆಂ ತೆಂ ಆಮ್ಚಾ ತಾಬೆಕ್ ಆಯ್ಲಾಂ. ತ್ಯಾ ಮೊಬಯ್ಲ್ ನಂಬ್ರಾ ಥಾವ್ನ್ ತೊ ಕೋಣಾಚಾ ಸಂಪರ್ಕಾರ್ ಆಸ್‍ಲ್ಲೊ ತೆಂ ಸೊಧುನ್ ಕಾಡ್ಚೆಂ ಕಷ್ಟಾಂಚೆಂ ನಯ್."
ತಿತ್ಲ್ಯಾರ್ ಟೆಲಿಫೋನಾಚಿ ಕಾಂಪಿಣ್ ವಾಜ್ಲಿ.
"ಹಲೋ...." ರಿಸೀವರ್ ಉಕಲ್ನ್ ಮ್ಹಣಾಲೊ ಮೇಜರ್ ಜನರಲ್. "ಹಾಂ... ಹಾಂ.... ವ್ಹಯ್‍ಗಿ?..... ಥೆಂಕ್ಯೂ."
"ಯುಎಯಿಚಾ ಏಕಾ ನಂಬ್ರಾಚೆರ್ 28 ಆನಿ 29 ತಾರೀಕೆರ್ ಜಾಯ್ತೆ ಪಾವ್ಟಿಂ ಚೋರಾಂಚೊ ಸಂಪರ್ಕ್ ಚಲ್ಲಾ." ಏಕ್ ನಂಬರ್ ತಾಣೆ ನೋಟ್ ಪ್ಯಾಡಾರ್ ಬರಯ್ಲೆಂ. "ತೆಂ ನಂಬರ್ ಅಭಿರಾಮ್ ಮಣ್ಚಾ ವೆಕ್ತಿಚಾ ನಾಂವಾರ್ ಆಸಾ ಮ್ಹಣ್ ಕಳಿತ್ ಜಾಲಾಂ."
"ಅಭಿರಾಮ್?" ಆಕ್ಲಾಸ್ಲೊ ನೈಲೇಶ್ ಪಟೇಲ್. "ತೊ ಮ್ಹಜೊ ಡ್ರೈವರ್!"
Tags:
Gold Robbery, Konkani Story, Stan Ageira, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
1 Comment/s.
ಹಾ೦ವ್ ಬಾ೦ಗಾರಚೊ ಉದ್ಯೊಗ್ ಕರ್ನ್ ಅಸ್ಚ್ಯಾ ನಿಮ್ತಿ ಮಾಕಾ ಹಿ೦ ಕಾಣಿ ಬೊರಿ ರುಚ್ಲಿ.ಸಬಾರ್ ವರ್ಸಾ ಪಯ್ಲೆ ಹಾ೦ವ್ ಅಬುಧಾಬಿ೦ತ್ ಆಸ್ತಾನಾ ಅಸಲೆ೦ಚ್ ಎಕ್ ಘಡಿತ್ ಮಜ್ಯಾ ಉಡಾಸಕ್ ಆಯ್ಲೆ...ದೆವ್ ಬರೆ ಕರು೦.