From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಹಾಂವ್, ಭೈರಾ ಆನಿ ಪಮೇಲಾ
Tuesday, October 4, 2016
ತೀನ್ ವರ್‍ಸಾಂ ಥಾವ್ನ್ ಹಾಂವೆಂ ಅಬ್ದುಲ್ ಕರೀಮ್ ಖಾನಾಚಿ ಘೊಡ್ಯಾ-ಗಾಡಿ ಧಾಂವ್ಡಯ್ಲ್ಯಾ. ಸಕಾಳಿಂ ಸ ಥಾವ್ನ್ ರಾತಿಚಿಂ ಧಾ-ಇಕ್ರಾ ಪರ್ಯಾಂತ್ ಹಾಂವ್ ಗಿರಾಯ್ಕಾಂಚಿ ವಾಟ್ ಪಳಯ್ತ್ ಬಸ್ಸ್-ಸ್ಟೆಂಡಾಂತ್, ರಯ್ಲ್ ನಿಲ್ದಾಣಾಂತ್ ಯಾ ಸಿನೆಮಾ ಘರಾಂ ಮುಕಾರ್ ಆಸ್ತಾಂ.
ಆಮಿ ಘೊಡ್ಯಾ-ಗಾಡಿಯೆಗಾರಾಂನಿ ಲಾಳ್ ಗಳವ್ನ್ ಗಿರಾಯ್ಕಾಂಚಿ ವಾಟ್ ಪಳಯ್ಲೆಲಿಚ್ ಆಯ್ಲಿ. ತಾಂಕಾಂ ಮಾತ್ ತೀನ್ ರೊದಾಂಚಿ ರಿಕ್ಶಾಚ್ ಜಾಯ್. ಲೊಕಾಚಿ ಖೆಟ್ ಚಡ್ ಆಸೊನ್ ರಿಕ್ಶಾ ಮೆಳನಾಂತ್ ಜಾಲ್ಯಾರ್ ಮಾತ್, ತಾಂಚೆ ನದರ್ ಆಮ್ಚೆ ಗಾಡಿಯೆಂಚೆರ್ ಘುಂವ್ತಾ ಯಾ ಆಪ್ಣಾಲಾಗಿಂ ಸಾಟ್ಲ್ಯೊ-ಪೊಟ್ಲ್ಯೊ ಆಸ್‌ಲ್ಲ್ಯಾ ತೆದ್ನಾಂ ಮಾತ್, ತಾಂಕಾಂ ಆಮ್ಚಿ ವಳಕ್ ಮೆಳ್ತಾ.
''ಹೇಯ್ ಗಾಡಿವಾಲಾ ಜರ್ಮನ್ ಪ್ರೆಸ್ಸಾಲಾಗಿಂ ವಚೊಂಕ್ ಕಿತ್ಲೆ ಘೆತಾಯ್?''
''ತೊ ಜಾಗೊ ಖಂಯ್ ಆಸಾ, ಸರ್?''
''ಜರ್ಮನ್ ಪ್ರೆಸ್ಸ್ ಖಂಯ್ಸರ್ ಆಸಾ ಮ್ಹಣ್ ಕಳಿತ್ ನಾ ತುಕಾ? ತುಜೆ ತಸಲ್ಯಾ ನೆಣಾರ್‍ಯಾಕ್ ಗಾಡಿ ಚಲಂವ್ಕ್ ಕೊಣೆ ಪರ್ವಣ್ಗಿ ದಿಲ್ಲಿ?''
ಗಿರಾಯ್ಕಾಂ ಮುಕಾರ್ ಆಮಿ ಕೆದ್ನಾಂಯ್ ನೆಣಾರಿಚ್!
''ಲಲಿತ್ ಮಹಲಾ ಲಾಗಿಂಚ್ ಜರ್ಮನ್ ಪ್ರೆಸ್ ಆಸಾ.''
''ಹಾಂಗಾ ಥಾವ್ನ್ ತಿ ಸುವಾತ್ ಭೋವ್ ಪಯ್ಸ್ ಆಸಾ ಸರ್.'' ರಿಕ್ಶಾಗಾರ್ ರಾತ್ಚ್ಯಾವೆಳಾ ತಿತ್ಲೆ ಪಯ್ಸ್ ವಚೊನ್ ಖಾಲಿ ಪಾಟಿಂ ಯೇಂವ್ಕ್ ತಯಾರ್ ನಾಂತ್ ದೆಕುನ್ ಮಾತ್, ಹೊ ಮ್ಹಜೆ ಸರ್ಶಿಂ ಆಯ್ಲಾ ಮ್ಹಣ್ ಮ್ಹಾಕಾ ಆತಾಂ ಕಳಿತ್ ಜಾತಾ. ''ಚಡ್ ನಾಕಾತ್ ಶೆಂಭರ್ ರುಪಯ್ ದಿಯಾ ಸರ್.''
''ಶೆಂಭರ್ ರುಪಯ್?'' ತೊ ಮ್ಹಜಾ ದೊಳ್ಯಾಂ ಮುಕ್ಲೊ ನಪಂಯ್ಚ್ ಜಾತಾ!
ಅಸಲ್ಯಾ ಏಕ್, ದೋನ್, ನ್ಹಯ್ ಧಾ ಬಾರಾ ಅನ್ವಾರಾಂ ಥಾವ್ನ್ ಸುಟೊನ್, ಎಕಾ ದಿಸಾಕ್ ಕಾಂಯ್ ಚಾರ್‍ಶಿಂ ರುಪಯ್ ಹಾಂವೆಂ ಜೊಡ್ಲೆ ತರ್, ತಾಂತ್ಲೆ ಹಾಂವೆಂ ಮ್ಹಜ್ಯಾ ಧನ್ಯಾಕ್ ಶೆಂಭರ್ ದೀಜೆ. ಘೊಡ್ಯಾಕ್ ತಣ್ ಆನಿ ಖಾಣ್ ಮ್ಹಣೊನ್ ಪನ್ನಾಸ್ ಗೆಲ್ಯಾರ್, ಮ್ಹಜೆ ಚಾಯೆ, ಬಿಡಿಯೆ ಆನಿ ಜೆವ್ಣಾಕ್ ಮ್ಹಣ್ತಾನಾ, ರಾತಿಕ್ ಮ್ಹಜೆಲಾಗಿಂ ಉರ್ಚೆ ಮ್ಹಜೆ ರಿತೆ ಹಾತ್ ಮಾತ್. ತೆ ಮಾತ್ಯಾ ಪಂದಾಕ್ ದವರ್ನ್, ಕರೀಮ್ ಖಾನಾಚ್ಯಾ ಕಾರ್ ಶೆಡ್ಡಾಂತ್ ಹಾಂವೆಂ ನಿದಜೆ!
'ಲಿಡೊ' ಥಿಯೆಟರಾಚೆ ದುಸ್ರೆ ಮಾಳ್ಯೆರ್ ಬಸೊನ್ ಪಿಕ್ಚರ್ ಪಳೆಂವ್ಚೆಂ, 'ಕ್ವಾಲಿಟಿ' ಹೊಟೆಲಾಂತ್ ರಿಗೊನ್, ಭಾಜ್‌ಲ್ಲೆ ಕೊಂಬಿಯೆಚಿಂ ಜಾಂಗ್ಳಾಂ ಚಾಬ್ಚಿಂ ಯಾ 'ಟೆರಿಶಿಯನ್' ಕೊಲೆಜಿಂತ್ಲ್ಯಾ ಸೊಬಿತ್ ಸುಂದರ್ ಚಲಿಯಾಂಲಾಗಿಂ ಗಜಾಲಿ ಮಾರ್‍ಚೆಂ ಭಾಗ್ ಮ್ಹಾಕಾ ಹ್ಯಾಚ್ ಎಕಾಚ್ ಜಾಗ್ಯಾರ್ ಲಾಬ್ಚೆಂ ಆಸ್‌ಲ್ಲೆಂ, ತೆಂವಿ ಸಪ್ಣಾಂತ್!
ಎಕಾ ದಿಸಾ ಧನ್ವಂತರಿ ರಸ್ತ್ಯಾ ವಯ್ಲ್ಯಾ ಎಕಾ ದುಕಾನಾ ಥಾವ್ನ್ ಆಕಾಶ್‌ವಾಣಿಚ್ಯಾ ಪಾಟ್ಲ್ಯಾಂನ್‌ಚ್ ಆಸ್ಚ್ಯಾ ಘರಾಕ್ ಏಕ್ ಮೋವ್ ತಾಂಬ್ಡೊ ಸೊಫಾ ಪಾವಿತ್ ಕರ್‍ಚೆಂ ಭಾಡೆಂ ಮ್ಹಾಕಾ ಮೆಳ್ಳೆಂ. ಮ್ಹಜೊ ಭಾಡ್ಯಾಗಾರ್ ಹಾಂವೆಂ ಮಾಗ್‌ಲ್ಲೆ ಶೆಂಭರ್ ರುಪಯ್ ದೀಂವ್ಕ್ ಒಪ್ಲೊ ಆನಿ ತಾಚೆಲಾಗಿಂ ಸ್ಕೂಟರ್ ಆಸ್‌ಲ್ಲೆವರ್‍ವಿಂ, ಮ್ಹಜೆ ಗಾಡಿಯೆ ಸವೆಂಚ್ ಸವ್ಕಾಸ್ ಸವಾರಿ ಕರುನ್, ತಾಚ್ಯಾ ಘರಾ ಮ್ಹಾಕಾ ವ್ಹರುನ್ ಗೆಲೊ.
ಗಾಡಿಯೆಚೆ ತಕ್ಲೆರ್ ಬಾಂದ್‌ಲ್ಲೊ ಸೊಫಾ ಸೊಡವ್ನ್, ತಾಚ್ಯಾ ಘರಾ ಭಿತರ್ ದವರ್ತಚ್, ತಾಣೆ ಮ್ಹಜೆಂ ಭಾಡೆಂ ಫಾರಿಕ್ ಕೆಲೆಂ.
''ಹಿ ಗಾಡಿ ತುಜಿ ಸ್ವಂತ್‌ಗಿ?''
''ನಾ ಸರ್, ಹಿ ಗಾಡಿ ಮ್ಹಜಿ ನ್ಹಯ್. ಹಾಚೊ ಧನಿ ದುಸ್ರೊಚ್ ಆಸಾ. ಹಾಂವೆಂ ಹಿ ಗಾಡಿ ಆಂಬ್ಡುನ್ ಸಕಾಳಿಂ ಥಾವ್ನ್ ಸಾಂಜೆ ಪರ್ಯಾಂತ್ ತುಮ್ಚೆ ತಸಲ್ಯಾ ಗಿರಾಯ್ಕಾಂಕ್ ಸೊಧುನ್ ಭೊಂವಜೆ ಆನಿ ರಾತಿಕ್ ಧನಿಯಾಚ್ಯಾ ಹಾತಾರ್ ಶೆಂಭರ್ ರುಪಯ್ ಘಾಲಿಜೆ.''
''ತುಂವೆಂ ತುಜಿಚ್ ಮ್ಹಳ್ಳಿ ಗಾಡಿ ಕಿತ್ಯಾಕ್ ಘೆಂವ್ಕ್ ನಜೊ?''
''ಹಾತಾಂತ್ ತೀಸ್ ಹಜಾರ್ ರುಪಯ್ ಆಸ್ಲ್ಯಾರ್, ತಸಲಿ ಆಲೋಚನ್ ಕರ್‍ಯೆತ್ ಸರ್. ಪೂಣ್ ಮ್ಹಜೆಲಾಗಿಂ ತೀಸ್ ರುಪಯ್‌ಯಿ ನಾಂತ್.''
''ನಾಂತ್ ತರ್ ರೀಣ್ ಕಾಡಿಜೆ!''
''ಮ್ಹಜೆ ತಸಲ್ಯಾ ಎಕ್ಲ್ಯಾ ಎಕ್ಸುರ್‍ಯಾಕ್ ಕೋಣ್ ಸರ್, ರೀಣ್ ದಿತಾ?''
''ಬೇಂಕ್ ದಿತಾ.''
''ಬೆಂಕಾ ವಿಶ್ಯಾಂತ್ ಹಾಂವ್ ಚಡ್ತಿಕ್ ಕಾಂಯ್ ನೆಣಾಂ.''
''ತುಂ ಎಕೀನ್ ಭುರ್ಗೊ ವ್ಹಯ್‌ತರ್, ತುಕಾ ತುಜಿ ಸ್ವಂತ್ ಗಾಡಿ ಘೆಂವ್ಕ್ ರೀಣ್ ಮೆಳ್ತೆಲೆಂ.''
'ಕೋಣ್ ದಿತಲೊ?' ಅಶೆಂ ವಿಚಾರ್ಯಾಂ ಮ್ಹಣ್ ಹಾಂವೆಂ ಚಿಂತ್ಲೆಂ. ತರಿಕೀ ತಿಂ ಉತ್ರಾಂ ಮ್ಹಜೆ ಮತಿಂತ್‌ಚ್ ಜಿರ್‍ಲಿಂ.
ಮ್ಹಾಕಾ ಹ್ಯಾ ವಿಶ್ಯಾಂತ್ ಪಾತ್ಯೆಣಿ ಭೊಗನಾ.
''ತುಜ್ಯಾ ಧನಿಯಾಚೆಂ ಫೋನ್ ನಂಬರ್ ಮ್ಹಾಕಾ ದಿ ಆನಿ ತುಂ ವಚ್.'' ಇತ್ಲೆಂಚ್ ತಾಣೆ ಸಾಂಗ್ಲೆಂ. ತ್ಯಾ ದೆಕುನ್, ಕರಿಮ್‌ ಖಾನಾಚೆಂ ಫೋನ್ ನಂಬರ್ ದೀವ್ನ್, ಥಂಯ್‌ಥಾವ್ನ್ ಮ್ಹಜಿ ಗಾಡಿ ಹಾಂವೆಂ ಧಾಂವ್ಡಾಯ್ಲಿ.
**********************************
ಆಜ್ ಮ್ಹಾಕಾ, ಕೆ.ಆರ್.ಸರ್ಕಲಾರ್ ಆಸ್ಚ್ಯಾ ಎಕಾ ಬೆಂಕಾಚ್ಯಾ ಶಾಖ್ಯಾಕ್ ವಚೊನ್, ಬೆಂಕಾಚ್ಯಾ ಮೆನೆಜರಾಕ್ ಭೆಟೊಂಕ್ ಧನ್‌ಯಾನ್ ಸಾಂಗ್ಲಾಂ. ಥಂಯ್ಸರ್ ವಚೊನ್, ಆರ್ಶ್ಯಾಂಚ್ಯಾ ಘುಡಾಭಿತರ್ ಬಸೊನ್ ಆಸ್ಚ್ಯಾ, ಮೆನೆಜರ್ ಸಾಯ್ಬಾಕ್ ಹಾಂವ್ ದೆಕ್ತಾಂ ತರ್, ತೊ ಮಾನೆಸ್ತ್ ಆಕಾಶ್‌ವಾಣಿ ಪಾಟ್ಲ್ಯಾ ಘರ್‍ಚೊ, ತಾಂಬ್ಡೊ ಸೊಫಾಗಾರ್ ಮ್ಹಣ್ ಮ್ಹಾಕಾ ಕಳೊಂಕ್ ವೇಳ್ ಗೆಲೊನಾ. 'ತುಂ ಎಕೀನ್ ಭುರ್ಗೊ ವ್ಹಯ್‌ ತರ್, ತುಕಾ ತುಜಿ ಸ್ವಂತ್ ಗಾಡಿ ಘೆಂವ್ಕ್ ರೀಣ್ ಮೆಳ್ತೆಲೆಂ.' ತಾಣೆ ಉಚಾರ್‌ಲ್ಲಿಂ ಉತ್ರಾಂ ಮ್ಹಜ್ಯಾ ಉಡಾಸಾಂತ್ ಫುಲೊನ್ ರಾವ್ಲಿಂ.
''ಸ್ವಾಗತ್ ತುಕಾ ರಮೇಶ್, ಯೆ ಬಸ್'' ತಾಣೆ ಮ್ಹಾಕಾ ತಾಚ್ಯಾ ಸಾಮ್ಕಾರ್ ಆಸ್ಚೆಂ ಕದೆಲ್ ದಾಕಯ್ಲೆಂ.
'ಮ್ಹಜೆಂ ನಾಂವ್‌ಯಿ ಹಾಕಾ ಕಳಿತ್ ಆಸಾ'' ಮ್ಹಜೆ ಇತ್ಲ್ಯಾಕ್‌ಚ್ ವಿಸ್ಮಿತ್ ಪಾವೊನ್, ತಾಣೆ ದಾಕಯ್ಲೆಲ್ಯಾ ಕದೆಲಾರ್ ಬಸನಾಸ್ತಾನಾ, ಹಾಂವ್ ಉಬೊಚ್ ರಾವ್ಲೊಂ.
''ತುಜ್ಯಾ ಧನ್‌ಯಾಚೆ ಜಾಮೀನೆರ್ ತುಕಾ ತೀಸ್ ಹಜಾರ್ ರೀಣ್ ಹಾಂವೆಂ ಮಂಜೂರ್ ಕೆಲಾಂ. ಹ್ಯಾ ದುಡ್ವಾನ್ ತುಂವೆಂ ತುಜಿಚ್ ಮ್ಹಳ್ಳಿ ಸ್ವಂತ್ ಘೊಡ್ಯಾಗಾಡಿ ಘೆಜೆ.''
'ಮ್ಹಜಿಚ್ ಸ್ವಂತ್ ಘೊಡ್ಯಾ ಗಾಡಿ' ಮ್ಹಳ್ಳಿಂ ಉತ್ರಾಂ ಆಯ್ಕೊನ್, ಸಂತೊಸಾಚೆ ಭೃಮಿದೆಂತ್ ಹಾಂವ್ ಪುರೊನ್ ಗೆಲ್ಲೆವರ್‍ವಿಂ, ರೀಣ್ ಪಾಟಿಂ ಪಾವಿತ್ ಕರ್‍ಚ್ಯಾ ಶರ್‍ತಾಂವಿಶಿಂ ತಾಣೆ ದಿಲ್ಲೊ ವಿವರ್‌ಯಿ ಮ್ಹಜೆ ಮತಿಕ್ ರಿಗ್ಲೊನಾ.
**********************************
ಹೇಯ್... ಹೇಯ್... ತಾಳೊ ಕಾಡಿತ್, ಘೊಡ್ಯಾಚೆ ಪಾಟಿರ್ ಸವ್ಕಾಸ್ ಹಾತ್ ಚರಯಿತ್, ಮ್ಹಜಿ ಸ್ವಂತ್ ಗಾಡಿ ಹಾಂವ್ ಆತಾಂ, ಶಹರಾಚ್ಯಾ ಕೊನ್ಶಾಂ, ಕೊನ್ಶಾಂನಿ ಧಾಂವ್ಡವ್ನ್ ಆಸಾಂ.
ಮ್ಹಜೆ ನವೆ ಗಾಡ್ಯೆಕ್ ಪಂಚ್ವೀಸ್ ಹಜಾರ್ ಪಡ್ಲೆ. ಊಟಿ ಥಾವ್ನ್ ಹಾಡಯಿಲ್ಲ್ಯಾ ನಾಕಾಕ್ ಚೆಪ್ಚೆ ಪುಡಿ ರಂಗಾಚ್ಯಾ ಘೊಡ್ಯಾಕ್, ಆಟ್ ಹಜಾರ್ ರುಪಯ್ ಹಾಂವೆಂ ದಿಲೆ ಆನಿ ಘೊಡ್ಯಾಕ್ ಜಾಯ್ ಜಾಲ್ಲಿ ಚಾಮ್ಡಾಚೆಂ ಲಗಾಮ್ ಇತ್ಯಾದಿ ಮ್ಹಣ್ತಾನಾ, ಬೆಂಕಾನ್ ದಿಲ್ಲೆಂ ಸಗ್ಳೆಂ ರೀಣ್ ಮ್ಹಜೆ ಸೊಭಿತ್ ನವೆ ಗಾಡ್ಯೆನ್ ಗಿಳುನ್ ಸೊಡ್ಲೆಂ.
ಮ್ಹಜ್ಯಾ ನವ್ಯಾ ಘೊಡ್ಯಾಕ್ ಹಾವೆಂ ದಿಲ್ಲೆಂ 'ಭೈರಾ' ಮ್ಹಳ್ಳೆಂ ನಾಂವ್ ಆತಾಂ ಮ್ಹಾಕಾ ಚಡ್ ಮೊಗಾಚೆಂ ಜಾಲಾಂ. ಹೊ ಭೈರಾ ಮ್ಹಜೊಚ್ ಭಾವ್‌ಮ್ಹಣ್ ಮ್ಹಾಕಾ ಭೊಗ್ತಾ. ಹಾಂವೆಂ ಸಾಂಗ್‌ಲ್ಲೆಂ ತಾಕಾ ಸಮ್ಜಾತಾ ಆನಿ ಮ್ಹಜೆ ಖುಶೆ ಪರ್ಮಾಣೆ ತೊ ಚಲ್ತಾ.
ಕರಿಮ್‌ಖಾನಾಚಿ ಗಾಡಿ ಧಾಂವ್ಡಾಯ್ತಾನಾ, ಸಗ್ಳ್ಯಾ ದಿಸಾಕ್ ಕಶ್ಟಾಂನಿ ಚಾರ್‍ಶಿಂ ರುಪಯ್ ಹಾಂವ್ ಜೊಡ್ತಾಲೊಂ ಆನಿ ಆತಾಂ ಚಾರ್‍ಶಿಂ ರುಪಯ್ ಸುಲಬಾಯೆನ್ ಜಾತಾತ್. ಹಾಕಾಯೀ ಕಾರಣ್ ಆಸಾ. ಮ್ಹಜಿ ಗಾಡಿ ನವಿಚ್ ಆಸೊನ್ ಲೊಕಾಕ್ ಆಕರ್‍ಶಿತಾ ಆನಿ ಮ್ಹಜೊ ಭೈರಾ ಜಿವಾನ್ ಪುಡ್ಪುಡಿತ್ ಆಸೊನ್, 'ಅಪುಣ್ ವೆಗಾನ್ ಧಾಂವ್ತಾಂ' ಮ್ಹಣೊನ್ ಪಳೆತೆಲ್ಯಾಂಕ್ ಖಾತ್ರಿ ದಿತಾ. ಹಾಂವ್‌ಯಿ ಆತಾಂ ಬರಿ ಮುಸ್ತಾಯ್ಕಿ ನ್ಹೆಸ್ತಾಂ. ಪಯ್ಲೆಂಚೆಪರಿಂ ಪರ್‍ನಿ ಯಾ ಪಿಂಜ್‌ಲ್ಲಿ ಮುಸ್ತಾಯ್ಕಿ ಮ್ಹಾಕಾ ಆತಾಂ ಪಸಂದ್ ಜಾಯ್ನಾ. ಕಿತ್ಯಾಕ್, ಹಾಂವ್ ಆತಾಂ ಸ್ವಂತ್ ಘೊಡ್ಯಾ ಗಾಡಿ ಆಸ್ಚೊ ಮಾನೇಸ್ತ್ ಮ್ಹಣ್ ಮ್ಹಜೆಂ ಶಿಂತಿದ್ ಕೊಂಬ್ ವ್ಹಾಜಯ್ತಾ ಆನಿ ಮ್ಹಾಕಾ ಫುಗಯ್ತಾ.
ದಿಸಾಕ್ ಶೆಂಭರ್ ರುಪ್‌ಯಾಂ ಲೆಕಾನ್ ರಿಣಾ ಬಾಬ್ತಿನ್ ಹಾಂವ್ ಬೆಂಕಾಕ್ ಭರ್‍ತಾಂ. ಎಕಾ ಹಪ್ತ್ಯಾಕ್ ಏಕ್‌ಪಾವ್ಟಿಂ ಮ್ಹಜ್ಯಾ ವಾಂಟ್ಯಾಕ್ ದೇವ್ ಜಾವ್ನ್ ಆಯಿಲ್ಲ್ಯಾ ತ್ಯಾ ಮೆನೆಜರಾಚ್ಯಾ ಕುಡಾಕ್ ವಚೊನ್, ಪ್ರಣಾಮ್ ಕರುನ್, ತಾಚೊ ಹಾಂವ್ ಉಪ್ಕಾರ್ ಭಾವುಡ್ತಾಂ.
''ತುಂವೆಂ ಹಪ್ತ್ಯಾ, ಹಪ್ತ್ಯಾಕ್ ಹಾಂಗಾ ಯೇವ್ನ್ ಮ್ಹಜೊ ಉಪ್ಕಾರ್ ಭಾವುಡ್ಚಿ ಗರ್ಜ್ ನಾ ರಮೇಶ್, ಬೆಂಕಾಚೆಂ ರೀಣ್ ಸಗ್ಳೆಂ ಫಾರಿಕ್ ಜಾತೆಚ್, ಏಕ್‌ಪಾವ್ಟಿಂ ಮ್ಹಜೆ ಸರ್ಶಿನ್ ತುಂವೆಂ ಆಯ್ಲ್ಯಾರ್ ಪುರೊ.''
ಪೂಣ್ ತಾಚ್ಯಾ ಉತ್ರಾಂಕ್ ಮಾನ್ ದೀಂವ್ಕ್ ಹಾಂವ್ ಚಿಂತಿನಾ. ಪರ್ತ್ಯಾನ್ ಹಪ್ತೊ ಉತರ್ತಚ್, ಹಾಂವ್ ತಾಚ್ಯಾ ಕುಡಾಕ್ ವೆತಾಂ. ಜರ್‌ತರ್ ತೊ ನ್ಹಯ್ ಆಸ್‌ಲ್ಲೊ, ಹಾಂವ್ ಮೊರ್ತಾ ಪರ್ಯಾಂತ್ ಕರೀಮ್ ಖಾನಾಚಿ ಗಾಡಿ ಧಾಂವ್ಡಾಯ್ತ್ ಆಸ್ತೊಂ. ಮ್ಹಜಿ ಹಿ ಸ್ವಂತ್ ಗಾಡಿ ಮ್ಹಜಿ ಜಾತಿನಾ ಆನಿ ಮ್ಹಾಕಾ ಭೈರಾಯಿ ಮೆಳ್ತೊನಾ!
*************************************
ಮ್ಹಜಿ ಗಾಡಿ ಆತಾಂ ತಿಲಕ್ ನಗರಾಚ್ಯಾ ಪ್ರಮುಕ್ ರಸ್ತ್ಯಾ ವಯ್ಲ್ಯಾನ್, ವೆಗಾನ್ ಧಾಂವೊನ್ ಆಸಾ.
ತರಿಪುಣ್ ರಸ್ತ್ಯಾಚೆ ಬಗ್ಲೆ ಥಾವ್ನ್ ಆಯಿಲ್ಲೊ 'ಗಾಡಿವಾಲಾ.........' ಮ್ಹಳ್ಳೊ ಉಲೊ ಮ್ಹಜಾ ಕಾನಾಕ್ ಪಡ್ತಾನಾ, ಭೈರಾಚೆಂ ಲಗಾಮ್ ಅಂರ್ಡುನ್ ತಾಚಿ ಚಾಲ್ ಹಾಂವ್ ಥಾಂಬಯ್ತಾಂ.
''ತುಕಾ ಕಾಯಾಮ್ ಭಾಡೆಂ ಮೆಳ್ಳ್ಯಾರ್ ಘೆಂವ್ಕ್, ತಯಾರ್ ಆಸಾಯ್?'' ತೊ ಮ್ಹಾತಾರೊ ವೊಕ್ಲಾಚ್ಯಾ ಇಡ್ಯಾ ಥಾವ್ನ್ ದೊಳೆ ಭಾಯ್ರ್ ದಾಕವ್ನ್ ಮ್ಹಾಕಾ ವಿಚಾರ್‍ತಾ.
''ಕಾಯಾಮ್ ಭಾಡೆಂ ಮ್ಹಳ್ಯಾರ್ ಕಸಲೆಂ?''
''ಮ್ಹಜ್ಯಾ ಧನ್‌ಯಾಚಿ ಧುವ್ ಫಿಲೊಮಿನಾ ಕೊಲೆಜಿಕ್ ವೆತಾ. ನಿಯಮಿತ್ ವೆಳಾರ್ ತಾಕಾ ತುಂವೆಂ ಕೊಲೆಜಿಕ್ ವ್ಹರ್ನ್, ತೆಚ್‌ಪರಿಂ ಸಾಂಜೆರ್ ಪಾಟಿಂ ಆಪವ್ನ್ ಹಾಡಿಜೆ'', ತೊ ಮ್ಹಾಕಾ ವಿವರ್ ದಿತಾ. ''ಲ್ಹಾನ್‌ಥಾವ್ನ್ ತಾಕಾ ಘೊಡ್ಯಾ ಗಾಡಿಯೆರ್ ಬಸ್ಚೆಂ ಮ್ಹಳ್ಯಾರ್ ಭಾರಿಚ್ ಖುಶಿ. ಸಬಾರ್ ದಿಸಾಂಥಾವ್ನ್ ಹೆಣೆ ಆಶಾರ್ ಪಾಶಾರ್ ಜಾಂವ್ಚಿ ತುಜಿ ಗಾಡಿ ತೆಂ ಪಳೆವ್ನ್ ಆಸಾ.''
''ಹಾಂಗಾ ಲಾಗ್ಸಾರ್‌ಚ್ ಹಾಂವೆಂ ಏಕ್ ಔಟ್-ಹೌಸ್ ಭಾಡ್ಯಾಕ್ ಘೆತ್ಲಾಂ. ತ್ಯಾ ವರ್ವಿಂ ಫಾವೊತಿ ಕೂಲ್ ಮೆಳ್ಳ್ಯಾರ್, ತುಮ್ಚಿ ಸೆವಾ ಕರುಂಕ್ ಹಾಂವ್ ಸಕ್ತಾಂ, ಸರ್.'' ಹಾತಾಂತ್ ಚಾಬೂಕ್ ಘೆವ್ನ್ ಹಾಂವ್ ಸಕಯ್ಲ್ ದೆಂವ್ತಾಂ.
''ಮಹಿನ್ಯಾಕ್ ಕಿತ್ಲೆ ದೀಜೆ, ಸಾಂಗ್''
''ಕೊಲೆಜಿಕ್ ರಜಾ ಆಸೊಂ ಯಾ ನಾ ಆಸೊಂ, ಮಹಿನ್ಯಾಕ್ ದೇಡ್ ಹಜಾರ್ ರುಪಯ್ ಮೆಳ್ತಿತ್ ತರ್, ತುಮ್ಚೆ ಮಾನಿನಿಕ್ ಸಾರ್ಕ್ಯಾ ವೆಳಾರ್ ವ್ಹರ್ನ್, ತಿಣೆ ಸಾಂಗ್‌ಲ್ಲ್ಯಾ ವೆಳಾರ್ ಪರತ್ ಕೊಲೆಜಿಲಾಗಿಂ ಹಾಜರ್ ಜಾವ್ನ್, ಪಾಟಿಂ ಆಪವ್ನ್ ಹಾಂಗಾಸರ್ ಸೊಡ್ತಲೊಂ.''
''ತಸೆಂಚ್ ಜಾಂವ್.''
ಮಹಿನ್ಯಾಕ್ ದೇಡ್ ಹಜಾರಾವಿಶಿಂ ಹಾಂ ಹುಂ ಕರಿನಾಸ್ತಾನಾ ತೊ ಒಪ್ವಾಲ್ಲೊ ಪಳೆವ್ನ್, ಹಿಂ ಗಿರೇಸ್ತ್ ಮನ್ಶಾಂ ಮ್ಹಣ್ ಮ್ಹಾಕಾ ಸಮ್ಜತಾ.
ದುಸ್ರ್ಯಾ ದಿಸಾ ಸಕಾಳಿಂ ಸಾಡೆ ನೋವ್ ವೊರಾಂಕ್ ಹಾಜರ್ ಜಾಂವ್ಚಿ ಹುಕುಮ್ ಘೆವ್ನ್, ಥಂಯ್‌ಥಾವ್ನ್ ಭೈರಾಕ್ ಚಲ್ ಭೈರಾ ಮ್ಹಣೊನ್ ಹಾಂವ್ ಮುಕಾರ್ ಧಾಂವ್ಡಯ್ತಾಂ.
******************************************************
ಆಜ್ ಸನ್ವಾರ್ ಆನಿ ಪಾಟ್ಲ್ಯಾ ಸೊಮಾರಾಥಾವ್ನ್ ಸಾರ್ಕ್ಯಾ ವೆಳಾರ್ ತಾಕಾ ಹಾವೆಂ ಕೊಲೆಜಿಕ್ ವ್ಹರ್ನ್ ಪಾಟಿಂ ಹಾಡ್ಲಾಂ.
ತಾಣೆಂ ಸಾಂಗ್ಲಲ್ಯಾ ವೆಳಾರ್ ದುಸ್ರೆಂ ಖಂಯ್ಚೆಂಯ್ ಭಾಡೆಂ ಮೆಳ್ಳ್ಯಾರ್, ಹಾಂವ್ ಘೆಂವ್ಕ್ ಕಬೂಲ್ ನಾ. ಕಿತ್ಯಾಕ್ ತೆಂ ಮ್ಹಜೆಂ ಸದಾಂಚೆಂ ಗಿರಾಯ್ಕಿಣ್!
ತಾಚಿ ಪ್ರಾಯ್ ವೀಸ್ ಥಾವ್ನ್ ಬಾವಿಸಾಂ ಭಿತರ್ ಆಸ್ತೆಲಿ ಮ್ಹಣ್ ಮ್ಹಜಿ ಅಭಿಪ್ರಾಯ್. ಹಳ್ತ್ ಶಿರ್‍ಪುಟೊ ಲಾಂಬ್ಸೊ ಜೀವ್ ಆನಿ ತಾಚೆ ತಾಮ್ಶೆ ಕಾತಿಕ್ ಸೊಭ್ಚೆ ಪಿಕ್ಯಾ ಕಾಳ್ಯಾ ದಾಕಾಂ ತಸಲೆ ತೆ ನಿಳ್ಶೆ ದೊಳೆ ತಾಚ್ಯಾ ಸುಂದರ್ ಮುಖಮಳಾರ್ ನೆಕೆತ್ರಾಂ ತಶೆಂ ಉಜಳ್ತಾತ್!
ತಾಚೆಂ ನಾಂವ್ ಹಾಂವ್ ನೆಣಾಂ ಆನಿ ತೆಂ ಕಸಲೆಂ ಶಿಕ್ತಾ ಮ್ಹಣ್‌ಯಿ ಮ್ಹಾಕಾ ಯೆದೊಳ್ ಕಳಿತ್ ಜಾಂವ್ಕ್ ನಾ. ಕಿತ್ಯಾಕ್, ಪಾಟ್ಲ್ಯಾ ಪಾಂಚ್ ದಿಸಾಂ ಥಾವ್ನ್ ಮ್ಹಜೆ ಗಾಡ್ಯೆರ್ ಪಾಟ್ಲ್ಯಾನ್ ತೆಂ ಬಸ್ತಾ ಆನಿ ಕೊಲೆಜಿಲಾಗಿಂ ದೆಂವ್ತಾ. ಪರತ್ ಕೊಲೆಜಿಲಾಗಿಂ ಚಡೊನ್, ತಾಚ್ಯಾ ಘರಾ ಸಾಮ್ಕಾರ್ ದೆಂವ್ತಾ.
''ತುಜೆಂ ನಾಂವ್ ಕಿತೆಂ ಸಾಂಗ್'...' ಆಜ್ ಕೊಲೆಜಿಥಾವ್ನ್ ಘರಾ ಪಾಟಿಂ ಯೆಂವ್ಚೆಖಾತಿರ್ ಗಾಡ್ಯೆರ್ ಚಡೊನ್ ಬಸ್‌ಲ್ಲೆಂಚ್ ತೆಂ ಮ್ಹಾಕಾ ವಿಚಾರ್‍ತಾ.
''ರಮೇಶ್, ಮೇಡಮ್?''
''ಮೇಡಮ್ ಕೋಣ್?''
''ಕೋಣ್ ಮ್ಹಳ್ಯಾರ್ ತುಂ.''
''ಹಾಂವ್ ಮ್ಹಾತಾರಿಂ ನ್ಹಯ್,,,'' ತೆಂ ಆತಾಂ ಕಿಡ್ಕಿಡೊನ್ ಹಾಸ್ಲೆಂ. ''ಮ್ಹಾಕಾ ಕೊಣೆಂಯ್ ಲೆಕಾ-ತುಕಾ ಭಾಯ್ಲಿ ಮರ್ಯಾದ್ ದಿಂವ್ಚಿ ಪಸಂದ್ ನಾ. ಮ್ಹಜೆಂ ನಾಂವ್ ಪಮೇಲಾ. ತುವೆಂ ಮ್ಹಾಕಾ ಫಕತ್ ಪಮೇಲಾ ಮ್ಹಣಜೆ.''
'ಪಮೇಲಾ, ಫಕತ್ ಪಮೇಲಾ' ಮತಿಭಿತರ್‌ಚ್ ತೆಂ ನಾಂವ್ ಉಚಾರುನ್, ತಸೆಂಚ್ ಜಾಂವ್, ಹಾಂವ್ ತಕ್ಲಿ ಹಾಲಯ್ತಾಂ.
ಪಯ್ಲೆಪಾವ್ಟಿಂ ತಾಚೊ ಮಧುರ್ ತಾಳೊ ಆಯ್ಕೊನ್, ಮ್ಹಜೆ ಕುಡಿಂತ್ ವೀಜ್ ಸಕತ್ ಪಾಶಾರ್ ಜಾಲ್ಯಾ.
ಅಶೆಂ ಮ್ಹಜೆ ಥಂಯ್ ಜಾಯ್ಚೆಚ್. ಕಿತ್ಯಾಕ್ ಮ್ಹಾಕಾ ಆತಾಂ ಚೊವಿಸ್ ವರ್‍ಸಾಂ ಭರ್ಲ್ಯಾಂತ್.
ಮ್ಹಜೊ ಭೈರಾ 'ಟಫ್..... ಟಫ್' ಕರುನ್ ನಿಯಮಿತ್ ಆವಾಜ್ ಉಟವ್ನ್, ರೂಂದ್ ರಾಜ್-ರಸ್ತ್ಯಾ ವಯ್ಲ್ಯಾನ್ ಧಾಂವೊನ್ ಆಸಾ ಆನಿ ಹಾಂವ್ ತೆಂ ಕಿತೆಂಯ್ ಪುಣಿ ಉಲಯ್ತೆಲೆಂ ಮ್ಹಣ್ ಕಾನ್ ಫುಲವ್ನ್ ರಾವ್ಲಾಂ. ಥೊಡೊಚ್ ವೇಳ್ ತೆಂ ಮಾವ್ನ್ ಉರ್ತಾ ಆನಿ ಆತಾಂ ಪಾಟ್ಲೆ ಕುಶಿಥಾವ್ನ್ ಘುಂವೊನ್, ಮುಕಾರ್ ತೊಂಡ್ ಕರುನ್ ಬಸ್ತಾ.
''ತುಂ ಎಕಾ ದಿಸಾಕ್ ಕಿತ್ಲೆ ಕಮಾಯ್ತಾಯ್ ರಮೇಶ್?''
''ಲಗ್ಬಗ್ ತಿನ್ಶಿಂ ಜಾತಾತ್...''
''ತಾಂತ್ಲೆ ಕಿತ್ಲೆ ಉರಯ್ತಾಯ್?''
''ಉರಂವ್ಕ್ ಸಾದ್ಯ್ ಜಾಯ್ನಾ. ಮೆಡಮ್. ಬೆಂಕಾಥಾವ್ನ್ ರೀಣ್ ಘೆವ್ನ್ ಹಿ ಗಾಡಿ ಹಾಂವೆಂ ಘೆತ್ಲ್ಯಾ. ತೆಂ ರೀಣ್ ಫಾರಿಕ್ ಕರುಂಕ್ ಆಸಾ.''
''ಮ್ಹಾಕಾ ಮೆಡಮ್ ಮ್ಹಣನಾಕಾ ಮ್ಹಣ್ ತುಕಾ ಹಾಂವೆಂ ಸಾಂಗ್‌ಲ್ಲೆಂ...''
''ಆನಿ ಮುಕಾರ್ ಮ್ಹಣನಾ'' ಅಶಿ ಭಾಸವ್ಣಿ ದೀವ್ನ್, ಹಾಂವ್ ಏಕ್ ಬೀಡಿ ಪೆಟಯ್ತಾಂ.
''ತುಂ ಚಡ್ ಬಿಡಿಯೊ ವೊಡ್ತಾಯ್.''
ಚಾರ್, ಪಾಂಚ್ ದಿಸಾಂಥಾವ್ನ್ ಮೊನ್ಯಾಪರಿಂ ಮ್ಹಜೆ ಗಾಡಿಯೆರ್ ಪಯ್ಣ್ ಕರುಂಕ್ ಹ್ಯಾ ಚೆಡ್ವಾಕ್ ಕಶ್ಟ್ ಮಾರ್ಲ್ಯಾತ್ ಮ್ಹಣ್ ಮ್ಹಾಕಾ ಆತಾಂ ಸಮ್ಜತಾ.
''ತಿ ಮ್ಹಜಿ ಏಕ್ ವಾಯ್ಟ್ ಸವಯ್''
''ತುವೆಂ ಬೀಡಿ ವೊಡಿನಾಯೆ. ತ್ಯಾ ಪಯ್ಶಾಂನಿ ಚಿಕ್ಲೆಟಾಂ ಯಾ ಚೊಕ್ಲೆಟಾಂ ಖಾ.''
''ಉಪ್ರಾಂತ್ ಚೊಕ್ಲೆಟಾಂ ಖಾಂವ್ಚಿ ಸವಯ್ ಜಾವ್ನ್ ದಾಂತಾಂಚ್ಯಾ ಮುಳಾಂನಿ ಕಿಡಿಯಾಂಚೆಂ ರಾಜ್ ಚಲ್ತೆಲೆಂ.''
''ತುಂ ಬರೊ ಹುಶಾರ್ ಆಸಾಯ್, ರಮೇಶ್'' ತೆಂ ಆತಾಂ ಅಪುರ್ಬಾಯೆನ್ ಹಾಸ್ತಾನಾ, ಹಾಂವ್ ಪಾಟಿಂ ಘುಂವೊನ್ ತಾಚ್ಯಾ ಮುಖಮಳಾರ್ ದೀಶ್ಟ್ ಘಾಲ್ತಾಂ ಆನಿ ತಾಚ್ಯಾ ಮೊತ್ಯಾಂ ಸಾರ್ಕ್ಯಾ ದಾಂತಾಂಚಿ ಸೊಬಾಯ್ ಚಾಕ್ತಾಂ.
''ಮ್ಹಾಕಾ ಚೊಕ್ಲೆಟಾಂ ಖಾಂವ್ಚಿ ಸವಯ್ ಜಾಲ್ಯಾ ಆನಿ ತುಂವೆಂ ಆತಾಂ ಸಾಂಗ್ಚೆಂ ಆಯ್ಕತಾನಾ, ಮ್ಹಜಿ ಸವಯ್ ಹಾಂವೆಂ ಮೊಡಿಜೆ ಪಡ್ಲಿ.''
''ಖಂಯ್ಚಿಯ್ ಸವಯ್ ಸೊಡುಂಕ್ ಸುಲಬ್ ನ್ಹಯ್ ಪಮೇಲಾ,,,'' ಮ್ಹಜೆ ಜಿಬೆರ್ ತಾಚೆಂ ನಾಂವ್ ಯೆತಾ. ''ಜರ್‌ತರ್ ತುಜಿ ಸವಯ್ ತುಂ ಸೊಡ್ಶಿ, ಹಾಂವ್ ಬೀಡಿ ವೊಡ್ಚಿ ಸೊಡ್ತಾಂ.''
''ಖಂಡಿತ್‌ಮೂ?''
''ಖಂಡಿತ್‌ಚ್!'' ತಾಚೆ ಮುಕಾರ್ ಲ್ಹಾನ್ ಜಾಂವ್ಕ್ ಹಾಂವ್ ತಯಾರ್ ನಾ. ''ತುಂವೆಂ ತುಜಿ ಸವಯ್ ಸೊಡಿನಾ ಜಾಲ್ಯಾರ್‌ಯಿ ವ್ಹಡ್ ನ್ಹಯ್. ಹಾಂವ್ ಮಾತ್ ಫಾಲ್ಯಾಂ ಥಾವ್ನ್ ಬೀಡಿ ವೊಡ್ಚೊನಾ.''
''ತುಜಾ ನಿಚೆವಾಚಿ ಘಟಾಯ್ ಕಿತ್ಲಿ ತಿ ಹಾಂವ್‌ಯಿ ಪಳೆತೆಲಿಂ'' ತೆಂ ಕಿಡ್ಕಿಡೊನ್ ಹಾಸ್ತಾ.
*********************************************
ಆಯ್ಚೆ ರಾತಿಂ ಮ್ಹಾಕಾ ನೀದ್ ಪಡನಾ. ಮ್ಹಜೆ ಮತಿಂತ್ ರಂಗಾಳ್ ಚಿಂತ್ನಾಂಚಿಂ ಲ್ಹಾರಾಂ ವಾದಾಳ್ ಉಟಯ್ತಾತ್ ಆನಿ ವಿಚಿತ್ರ್ ಮೊಗಾಚಿಂ ಭೊಗ್ಣಾಂ ಗಾಂಚ್, ಗಾಂಚ್ ಜಾವ್ನ್ ಘಡ್ಸೊನ್ ಏಕ್ ಸಾಂಕಳ್ ಜಾತಾತ್.
ಏಕ್ ಗಿರೇಸ್ತ್ ಚಲಿ ಮ್ಹಜೆ ತಸಲ್ಯಾ ಘನ್ ಮಾನ್ ನಾತ್‌ಲ್ಲ್ಯಾ ತರ್ನಾಟ್ಯಾಲಾಗಿಂ ಎಕಾಚ್ ದಿಸಾಭಿತರ್ ಇತ್ಲೆ ಸಳ್ಗೆನ್ ಉಲಯ್ತ್ ಮ್ಹಣ್ ಹಾಂವೆಂ ಲೆಕುಂಕ್ ನಾ.
'ತುಂ ಚಡ್ ಬಿಡಿಯೊ ವೊಡ್ತಾಯ್' ತಾಚಿಂ ಉತ್ರಾಂ ಮ್ಹಜೆ ಮತಿಂತ್ ಉಡ್ಕ್ಯೊ ಮಾರ್ತಾತ್. 'ಹಾಂವೆಂ ಬೀಡಿ ವೊಡ್ಲ್ಯಾರ್ ಪಮೇಲಾಕ್ ಕಸಲೊ ನಶ್ಟ್?' ಹ್ಯಾ ಸವಾಲಾಚಿ ಜಾಪ್ ಸೊಧುನ್ ಕಾಡುಂಕ್ ಹಾಂವ್ ಪೆಚಡ್ತಾಂ.
'ಚೆಡುಂ ಪುಣಿ ಮ್ಹಜ್ಯಾ ಮೊಗಾರ್ ಪಡೊಂಕ್ ನಾಮೂ?' ಅಶೆಂ ಚಿಂತ್ತಾನಾ, ಮ್ಹಜೆಂ ಕಾಳಿಜ್ ಗೊಡ್ಸಾಣೆನ್ ಭರ್ತಾ. 'ನ್ಹಯ್ ತರ್ ಏಕ್ ಪರ್ಕಿ ಚಲಿ ಮ್ಹಜೆ ಸವಯೆ ಥಂಯ್ ನಾಕ್ ಚೆಪುಂಕ್, ಕಿತ್ಯಾಕ್ ಆಂವ್ಡೆತಾ?'
*********************************************
ಘಟ್ ಮನಾಚೊ ತರ್ನಾಟೊ ತುಂ! ನೀಜ್ ಮನಾನ್ ತಿಂ ಉತ್ರಾಂ ತಾಣೆ ಉಚಾರ್ಲ್ಯಾಂತ್ ಮ್ಹಣ್ ತಾಚ್ಯಾ ದೊಳ್ಯಾಂನಿ ನಿಶೆಂವ್ಚೊ ಅಭಿಮಾನ್ ದೆಕೊನ್ ಹಾಂವ್ ಪಾರ್ಕಿತಾಂ. ''ಪಂದ್ರಾ ದೀಸ್ ಉತರ್ಲೆ ಆನಿ ಹೆ ಆವ್ದೆಂತ್ ಮ್ಹಜ್ಯಾ ಮುಕಾರ್ ತುವೆಂ ಏಕ್‌ಯಿ ಬೀಡಿ ವೊಡುಂಕ್‌ನಾಂಯ್. ಹಾಂವ್ ಮಾತ್ ಪಯ್ಲೆಂ ಎಕಾ ದಿಸಾಕ್ ಉಣ್ಯಾರ್ ವೀಸ್ ಚೊಕ್ಲೆಟಾಂ ಖಾತಾಲಿಂ. ತಿ ಸವಯ್ ಮೊಡುಂಕ್ ಪ್ರೇತನ್ ಕರುನ್, ದಿಸಾಕ್ ಧಾ ಖಾಂವ್ಚೆ ತಿತ್ತುನ್ ಪಾವ್ಲ್ಯಾಂ. ಪೂಣ್ ಮ್ಹಜಿ ಸವಯ್ ಪರಿಪೂರ್‍ಣ್ ಮೊಡುಂಕ್ ಸಕೊಂಕ್‌ನಾ.''
ಪಮೇಲಾನ್ ಆತಾಂ ಏಕ್ ಚೊಕ್ಲೆಟ್ ಖಾವ್ನ್, ಮುಕಾರ್ ಬಸೊನ್ ಗಾಡಿ ಧಾಂವ್ಡಾಂವ್ಚ್ಯಾ ಮ್ಹಾಕಾ ಏಕ್ ದಿಲೆಂ.
''ದೇವ್ ಬರೆಂ ಕರುಂ, ಪಮೇಲಾ.'' ತಾಚೆಂ ನಾಂವ್ ಉಚಾರುಂಕ್ ಮ್ಹಾಕಾ ಆತಾಂ ಚಡ್ ಸಂತೊಸ್ ಭೊಗ್ತಾ. ಗರ್ಜೆ ಶಿವಾಯ್ ತರ್‌ಯಿ, ಮೊತ್ಯಾಂ ಸಾರ್ಕಿಂ ತಿಂ ತೀನ್ ಅಕ್ಶರಾಂ ಘಡ್ಸುನ್ ತಾಚೆಂ ನಾಂವ್ ಹಾಂವ್ ಉಚಾರ್ತಾಂ.
ಸದಾಂಯ್ ತಾಕಾ ಕೊಲೆಜಿಕ್ ವ್ಹರ್ನ್ ಸೊಡ್ತಚ್, ಹಾಂವೆಂ ಮ್ಹಜಿ ಗಾಡಿ ಫಿಲೊಮಿನಾ ಇಗರ್‍ಜಿ ಕುಶಿಂ ಆಂಬುಡ್ಚಿ. ಥಂಯ್ ಥಾವ್ನ್ ಮ್ಹಾಕಾ ಖಂಯ್ ಪುಣಿ ವೆಚೆಂ ಭಾಡೆಂ ಮೆಳ್ತಾ. ಪೂಣ್ ಶ್ಹೆರಾಚ್ಯಾ ಖಂಯ್ಚಾಯ್ ಕೊನ್ಶಾಂತ್ ಹಾಂವ್ ಆಸೊಂ ಮ್ಹಜೆಂ ಧ್ಯಾನ್ ಆನಿ ಮನ್ ಪಮೇಲಾನ್ ಕೊಲೆಜಿಲಾಗಿಂ ಯೇಂವ್ಕ್ ಸಾಂಗ್‌ಲ್ಲ್ಯಾ ವೆಳಾಚೊ ಆಟವ್ ಕರುನ್ ಆಸ್ತಾ. ಥಂಯ್ಸರ್ ವಚೊಂಕ್ ವೇಳ್ ಜಾಲೊ ಮ್ಹಣ್ತಾನಾ, ಇಂಗ್ಲೆಂಡಾಚಿ ರಾಣಿ ಯೇವ್ನ್ ಮ್ಹಜಿಗಾಡಿ ಭಾಡ್ಯಾಕ್ ವಿಚಾರಿತ್ ತರ್‌ಯಿ, ಹಾಂವ್ ತಿಚೆಂ ಭಾಡೆಂ ಘೆಂವ್ಕ್ ತಯಾರ್ ನಾ. ತ್ಯಾ ವೆಳಾ ಹಾಂವ್ ಭೈರಾಚ್ಯಾ ಕುಲ್ಯಾಕ್ ಕುಟ್ಟುನ್, 'ಕೊಲೆಜಿಲಾಗಿಂ ಯಾರೆ ಭೈರಾ!' ಮ್ಹಣ್ತಾನಾ, ತೊ ಪಾಟಿಂ ಮುಕಾರ್ ಪಳೆನಾಸ್ತಾನಾ, ಪಮೇಲಾಚೆ ಕೊಲೆಜಿಕುಶಿಂ ಧಾವೊಂಕ್ ಲಾಗ್ತಾ.
ಆಯ್ತಾರ್ ಆನಿ ರಜೆಚೆ ದೀಸ್ ಮ್ಹಳ್ಯಾರ್ ಮ್ಹಜ್ಯಾ ವಾಂಟ್ಯಾಕ್ ಬೋವ್ ಚಡ್ ವಿರಾರಾಯೆಚೆ. ತ್ಯಾ ದಿಸಾಂನಿ ಪಮೇಲಾಲಾಗಿಂ ಉಲಂವ್ಚೆಂ ಸೊಡ್ಯಾಂ, ತಾಚ್ಯಾ ಮುಖಮಳಾರ್ ದೀಶ್ಟ್ ಘಾಲ್ಚೆಂ ಭಾಗ್‌ಯಿ ಮ್ಹಕಾ ಲಾಭಾನಾ. ಸಕಾಳಿಂಥಾವ್ನ್ ಸಾಂಜೆಚ್ಯಾ ಸ ವೊರಾಂ ಪರ್ಯಾಂತ್, ಕಶ್ಟಾಂನಿ ಹಾಂವ್ ಭಾಡ್ಯಾಗಾರಾಂಚಿ ಸೆವಾ ಕರ್ತಾಂ ಆನಿ ಉಪ್ರಾಂತ್ ಖಂಯ್ಚಾಯಿ ಎಕಾ ಸಿನೆಮಾ ಘರಾಂತ್ ಉಣ್ಯಾಚಿ ಏಕ್ ಟಿಕೆಟ್ ಘೆವ್ನ್ ಪಿಕ್ಚರ್ ಪಳೆತಾಂ!
ಆಯ್ಲೆವಾರ್ ಹಾಂವೆಂ ಪಳಯಿಲ್ಲ್ಯಾ ದೋನ್, ತೀನ್ ಪಿಂತುರಾಂನಿ ಗಿರೇಸ್ತ್, ಶಿಕ್ಪಿ ಆನಿ ಸೊಬಿತ್ ನಾಯಕಿ ಮ್ಹಜೆ ತಸಲ್ಯಾ ಉಣ್ಯಾ ಶಿಕ್ಪಾಚ್ಯಾ ದುಬ್ಳ್ಯಾ ಚಲ್ಯಾಲಾಗಿಂ ಮೊಗಾರ್ ಪಡ್ತಾ ಆನಿ ಆಪ್ಲ್ಯಾ ವ್ಹಡಿಲಾಂಥಾವ್ನ್ ನಾನಾಂತೆ ದಗ್ದವ್ಣೆಕ್ ವಳಗ್ ಜಾತಾ ತರ್‌ಯಿ, ಅಕ್ರೇಕ್ ಆಪ್ಲ್ಯಾ ಅಶಿಕ್ಪಿ ಆನಿ ದುಬ್ಳ್ಯಾ ಪ್ರೇಮಿಲಾಗಿಂಚ್ ಕಾಜಾರ್ ಜಾತಾ!
ಹೆಚ್‌ಪರಿಂ, ಪಮೇಲಾಯ್ ಮ್ಹಜೊ ಮೋಗ್ ಕರ್ತಾ ಮ್ಹಳ್ಳೊ ಭರ್ವಸೊ ಮ್ಹಜೆ ಮತಿಂತ್ ಉಬ್ಜತಾ!
'ಮೋಗ್' ಮ್ಹಳ್ಳೊ ಹೊ ಆಮೊಲಿಕ್ ಸಬ್ದ್, ಮ್ಹಜೆ ಕುಡಿಂತ್ ಮ್ಹೊಂವಾಚೆ ಗೊಡ್ಸಾಣೆಚಿಂ ಲಾರಾಂ ಉಟಯ್ತಾ ಆನಿ ಮ್ಹಜ್ಯಾ ಕಳ್ಜಾಂತ್ ರಂಗಾಳ್ ಆನಿ ಪರ್ಮಳಿಕ್ ಫುಲಾಂ ಫುಲಯ್ತಾ.
'ಪಮೇಲಾ ಮ್ಹಜೊ ಮೋಗ್ ಕರ್ತಾ. ಖಂಡಿತ್ ಕರ್ತಾ. ತೆಂ ಮ್ಹಾಕಾ ಪಳೆವ್ನ್ ಹಾಸ್ತಾ. ಮ್ಹಜೆಲಾಗಿಂ ದರಬಸ್ತ್ ಉಲಯ್ತಾ. ತಿತ್ಲೆಂಚ್ ನ್ಹಯ್, ಹಾಂವೆಂ ಬೀಡಿ ವೊಡಿನಾಯೆ ಮ್ಹಣ್ ತಾಚಿ ಖುಶಿ ಜಾವ್ನಾಸಾ'.
'ಅರೇ ಪಿಶ್ಯಾ, ಎಕಾಮೆಕಾಚೊ ಮೋಗ್ ಸರ್ವಾಂಯ್ ಕರ್ತಾತ್...' ಮ್ಹಜೆ ಮತಿಂತ್ಲೊ ಏಕ್ ತಾಳೊ ಮ್ಹಾಕಾ ಜಾಗಯ್ತಾ. 'ಪಮೇಲಾ ತುಜೊ ಮೋಗ್ ಕರ್ತಾ ತರ್, ತೊ ಕಸಲೊ ಮೋಗ್ ಮ್ಹಣ್ ಪಾರ್ಕುಂಕ್ ತುಂ ಸಕೊಂಕ್‌ನಾಂಯ್. ಗಿರೇಸ್ತ್‌ಕಾಯೆಚೆ ಬಂದಡೆಂತ್ ಫುಲ್‌ಲ್ಲ್ಯಾ ತಾಕಾ, ತುಜೆ ತಸಲ್ಯಾ ದುಬ್ಳ್ಯಾ ಧಾಕ್ಟ್ಯಾಂಚೊ ಹುಸ್ಕೊ ಆಸಾ ಆನಿ ಮೋಗ್ ಆಸಾ. ತುಂ ತಾಚೊ ಎಕ್ಲೊ ಮಿತ್ರ್ ಜಾವ್ನಾಸಾಯ್. ಕೊಲೆಜಿಕ್ ವೆತಾ ಪರ್ಯಾಂತ್, ತೆಂ ತುಕಾ ವಳ್ಕತೆಲೆಂ ಉಪ್ರಾಂತ್, ರಮೇಶ್-ಪಮೇಲಾಚೊ ಸಂಬಂಧ್ ತುಟ್ತಲೊ!'
ಆತಾಂ ನಿಜಾಯ್ಕಿ ಹಾಂವ್ ಕಂಗಾಲ್ ಜಾತಾಂ. ಪಮೇಲಾ ಕೊಲೆಜ್ ಸೊಡಿತ್ ತರ್, ಮ್ಹಜೆಥಾವ್ನ್‌ಯಿ ಪಯ್ಸ್ ಸರ್ತೆಲೆಂ?
ಹ್ಯಾ ಬಾಬ್ತಿನ್ ಆಜ್‌ಚ್ ಪಮೇಲಾಕ್ ಗರ್ಜೆಚಿಂ ಥೊಡಿಂ ಸವಲಾಂ ವಿಚಾರುಂಕ್ ಫಾವೊತಿ ತಯಾರಿ ಕರುನ್ ಹಾಂವ್ ಆಯ್ತೊ ಜಾಲಾಂ.
********************************************
''ಆಜ್ ಆಮ್ಕಾಂ ಪರೀಕ್ಶಾ ಸುರು ಜಾತಾ ರಮೇಶ್. ಉಪ್ರಾಂತ್ ರಜಾ ಮೆಳ್ತಾ.'' ಹಾಂವೆಂ ಕಿತೆಂಯ್ ಉಲಂವ್ಚ್ಯಾ ಪಯ್ಲೆಂಚ್, ತಾಣೆ ತೊಂಡ್ ಕಾಡ್ಲಾಂ.
''ರಜೆ ವೆಳಾರ್ ಮ್ಹಜಿ ತಕ್ಲಿ ವಿರ್‍ಯಾರ್ ಜಾತೆಲಿ.''
''ಕಿತ್ಯಾಕ್ ರಮೇಶ್?''
''ತುಜೆಲಾಗಿಂ ಉಲಂವ್ಚೆಂ, ತುಕಾ ಪಳೆಂವ್ಚೆಂ ಭಾಗ್ ಮ್ಹಜೆಥಾವ್ನ್ ಚುಕ್ತೆಲೆಂ.''
''ಓ... ತಿತ್ಲೆಂಚ್..., ಮ್ಹಾಕಾಯ್ ರಜೆಂತ್ ಮಸ್ತ್ ಬೆಜಾರ್ ಜಾತೆಲೆಂ. ಮ್ಹಜ್ಯೊ ಸಾಂಗಾತಿಣಿ ಮ್ಹಾಕಾ ಭೆಟ್ಚ್ಯೊನಾಂತ್. ಸಾಂಗಾತಾಚ್ ತುಂಯಿ ಪಳೆಂವ್ಕ್ ಮೆಳ್ಚೊನಾಂಯ್.''
'ತುಂಯಿ ಪಳೆಂವ್ಕ್ ಮೆಳ್ಚೊನಾಂಯ್' ಪಮೆಲಾಚಿಂ ಹಿಂ ಉತ್ರಾಂ ಆಯ್ಕೊನ್, ಮ್ಹಜೆಂ ಕಾಳಿಜ್ ಫುಲ್ತಾ ಆನಿ ಹಾಂವ್ ಅಸಲೆ ಆಯಿನ್ನ್ ಘಡ್ಯೆ ಪಮೇಲಾಚೆಂ ಮನ್ ಪಾರ್ಕುಂಕ್ ಉತ್ರಾಂ ವಿಂಚ್ತಾನಾ, ತೆಂ ಉಲಯ್ತಾ, 'ಸತ್‌ಚ್ ಹಾಂವ್ ತುಕಾ ಸಾಂಗ್ತಾಂ ರಮೇಶ್. ಹಾಂವೆಂ ಗ್ರೇಸ್ತ್ ಕುಟ್ಮಾಂತ್ ಜಲ್ಮೊಂಕ್ ನಜೊ ಆಸ್‌ಲ್ಲೆಂ. ಮ್ಹಜ್ಯಾ ಡೆಡಿಲಾಗಿಂ ದರಬಸ್ತ್ ದುಡು ಆಸಾ. ಆನಿ ಹ್ಯಾ ಶ್ಹೆರಾಂತ್ ತಾಕಾ ವ್ಹರ್ತಿ ಮರ್ಯಾದ್ ಆಸಾ. ತೊ ಸಂಘ್ ಹೊ ಸಂಘ್, ಮೀಟಿಂಗಾಂ, ಪಾರ್ಟಿ, ರೇಸ್, ಲಯನ್ಸ್ ಕ್ಲಬ್, ರೋಟರಿ ಕ್ಲಬ್ ಮ್ಹಣೊನ್ ತಾಚಿ ರಾಟಾವಳ್ ಖರಿಚ್ ದಾಟಿ ಮೊಟಿ ಆಸ್ತಾ. ತಶೆಂಮ್ಹಣ್ ತಾಚೆ ಬಾಯ್ಲೆ ಭುರ್ಗ್ಯಾಂನಿ ಮಾತ್ ಘರಾಚ್ ಕುಸೊನ್ ಆಸಜೆ. ಆಮ್ಕಾಂ ಘರಾ ಭಾಯ್ರ್ ಭೊವೊಂಕ್ ತೊ ಆವ್ಕಾಸ್ ದೀನಾ.''
ಥೊಡೊ ವೇಳ್ ಹಾಂವ್ ಮೊನೊಂಚ್ ಉರ್‍ತಾಂ. ಆಕ್ರೇಕ್ ಉಲಂವ್ಚೆಖಾತಿರ್ ಉತ್ರಾಂ ವಿಂಚ್ತಾಂ. ''ತುಂವೆಂ ಕೊಣಾಯ್ಚೊಯ್ ಪುಣಿ ಮೋಗ್ ಕೆಲಾಯ್?''
''ಮೋಗ್?'' ತೆಂ ವ್ಹಡ್ಲ್ಯಾನ್ ಹಾಸ್ತಾ. ''ಹೆಂ ಸವಾಲ್ ಕಿತ್ಯಾಕ್ ವಿಚಾರ್ತಾಯ್?''
''ಅಶೆಂಚ್........ ಭೆಶ್ಟೆಂಚ್.....'' ಹಾಂವ್ ಪಿಗ್ಳತಾಂ. ''ಹಾಂವ್ ಮಸ್ತ್ ಪಿಕ್ಚರಾಂ ಪಳೆತಾಂ. ಆನಿ ತಾಂತ್ಲ್ಯೊ ಚಡಾವತ್ ಗಿರೇಸ್ತ್ ಚಲಿಯೊ ಲ್ಹಾನ್ ಪ್ರಾಯೆರ್‌ಚ್ ಮೊಗಾರ್ ಪಡ್ತಾತ್.''
''ಪಾಡ್ ಪಡೊಂ ತ್ಯಾ ಪಿಕ್ಚರಾಂಚೆಂ. ತಾಂತ್ಲ್ಯಾ ಘಡಿತಾಂಕ್ ಆನಿ ಜಿವಿತಾಚ್ಯಾ ಘಡಿತಾಂಕ್ ಬಿಲ್ಕುಲ್ ತಾಳ್ ಪಡನಾ.''
ಮ್ಹಜೆ ಆತುರಾಯೆಚೆ ತಕ್ಲೆ ವಯ್ರ್ ತೆಂ ಬರ್ಪಾ ಕುಡ್ಕೊ ದವರ್ತನಾಂಚ್, ಕೊಲೆಜಿಚೆ ಗೇಟಿ ಸಾಮ್ಕಾರ್ ಭೈರಾ ಉಬೊ ಜಾಲಾ.
***********************************************
ಲಾಂಬ್ ರಜೆ ಉಪ್ರಾಂತ್, ಫಾಲ್ಯಾಂ ಥಾವ್ನ್ ಕೊಲೆಜ್ ಪರ್ತ್ಯಾಕ್ ಸುರು ಜಾತಾ ಜಾಲ್ಲ್ಯಾನ್, ವರ್ತೆ ಆತುರಾಯೆನ್ ಪಮೇಲಾಚ್ಯಾ ಘರಾ ಕುಶಿನ್ ಮ್ಹಜೆ ಗಾಡಿ ಹಾಂವ್ ಧಾಂವ್ಡಾವ್ನ್ ಆಸಾಂ.
ಹಾಂವ್ ಥಂಯ್ಸರ್ ಪಾವ್ತಚ್, ಗಾಡಿಯೆರ್ ಥಾವ್ನ್ ಸಕಯ್ಲ್ ಉಡೊನ್, ಗೇಟಿಲಾಗಿಂ ಪಾವ್ತಾಂ. ಮ್ಹಾಕಾ ಪಳೆವ್ನ್ ಪಮೆಲಾಗೆಲೆ ರಾಕ್ಸಾ ಕಾಸ್ತಾಚೆ ತೆ ದೋಗ್ ಪೆಟೆ ಬೊಬಾಟ್ ಮಾರ್ತಾತ್. ತ್ಯಾ ವರ್ವಿಂ ತಾಂಚ್ಯಾ ಘರಾ ಮುಕ್ಲಿಂ ಫುಲಾಂ ಝಾಡಾಂ ಸಾಂಬಾಳ್ಚೊ ಮಾಲಿ ಮ್ಹಜೆ ಸರ್ಶಿಂ ಯೆತಾ.
''ತುಂವೆಂ ಆನಿ ಮುಕಾರ್ ಹಾಂಗಾ ಯೆಂವ್ಚಿ ಗರ್ಜ್ ನಾ ಖಂಯ್!'' ಅಪ್ರಾದ್ಯಾಕ್, ನಿತಿದಾರಾನ್ ಮರ್ಣಾಚೆಂ ಫರ್ಮಾಣ್ ಉಚಾರ್‍ಲೆಲೆಪರಿಂ ತಾಚಿಂ ಉತ್ರಾಂ ತೊ ಮ್ಹಜ್ಯಾ ಕಾನಾಂತ್ ರಿಗಯ್ತಾ.
ತ್ಯಾ ವರ್ವಿಂ ಥೊಡೆ ಘಡ್‌ಯಾಂಕ್ ಹಾಂವ್ ನಿರ್ಜೀವ್ ಜಾತಾಂ. ಹಾಂವ್ ಜೀವ್ ಆಸಾಂ ಮ್ಹಳ್ಳಿ ವಿಸರ್ ಮ್ಹಾಕಾ ಪಡ್ತಾ. ಆಕ್ರೇಕ್ ಆಪ್ಲ್ಯಾ ವಾವ್ರಾಕ್ ಲಾಗ್‌ಲ್ಲ್ಯಾ ಮ್ಹಜ್ಯಾ ಮೆಂದ್ವಾಚೆ ಹುಕ್ಮೆಕ್ ಪಾಳೊ ದೀವ್ನ್, ಉಲಂವ್ಚೆಖಾತಿರ್ ಮ್ಹಜೆಂ ತೊಂಡ್ ಹಾಂವ್ ಉಗಡ್ತಾಂ.
''ತರ್ ತೆಂ ಆನಿ ಮುಕಾರ್ ಕೊಲೆಜಿಕ್ ವೆಚೆಂನಾ?''
''ತಿ ಸಗ್ಳಿ ಗಜಾಲ್ ಹಾಂವ್ ನೆಣಾಂ. ತುಂ ಯೇಶಿ ತರ್ ತುಂವೆಂ ಆನಿ ಮುಕಾರ್ ಹಾಂಗಾ ಯೆಂವ್ಚೆಂ ನಾಕಾ ಮ್ಹಣ್ ಸಾಂಗೊಂಕ್ ಸಾಯ್ಬಾನ್ ಮ್ಹಾಕಾ ಹುಕುಮ್ ದಿಲ್ಯಾ.''
''ಕಾರಣ್ ಕಸಲೆಂ ಮ್ಹಣ್ ತುಂ ನೆಣಾಂಯ್?''
'ನಾ' ಮ್ಹಣ್ಚೆಪರಿಂ ತಕ್ಲಿ ಹಾಲವ್ನ್ ಮ್ಹಾಕಾ ತೊ ಪಾಟ್ ಕರ್ತಾ. ತೆದ್ನಾಂ, ಮ್ಹಜೆಂ ಕಾಳಿಜ್ ಎಕ್ ಸುರಿಯೆನ್ ಆಡ್-ಉಬೆಂ ಶಿಂದ್‌ಲ್ಲೆಪರಿಂ ಹಾಂವ್ ಕಳ್ವಳ್ತಾಂ. ಉಪ್ರಾಂತ್, ಸವಯೆಚ್ಯಾ ಬಳಾನ್, ಮೆಟಾಂ ಕಾಡುನ್, ಭೈರಾ ಸರ್ಶಿಂ ಪಾವ್ತಾಂ ಆನಿ ಗಾಡ್ಯೆರ್ ಚಡೊನ್ ಬಸ್ತಾಂ.
ಆತಾಂ ಭೈರಾ ಧಾಂವ್ತಾ. ತಾಕಾ ಖುಶಿ ಆಸ್‌ಲ್ಲೆ ವಾಟೆನ್ ತೊ ಧಾಂವೊನ್ ಆಸಾ. ಧಾಂವೊಂದಿ, ತಾಕಾ ಹಾಂವ್ ಆಡಾಂವ್ಚೆ ಸ್ಥಿತೆರ್ ನಾ. ಮ್ಹಜ್ಯಾ ದೊಳ್ಯಾಂನಿ ದುಕಾಂ ಭರ್ಲ್ಯಾಂತ್ ಆನಿ ದುಕಾಂ ಭರ್ಲೆಲ್ಯಾ ಮ್ಹಜ್ಯಾ ದೊಳ್ಯಾಂ ಸಾಮ್ಕಾರ್ ಪಮೆಲಾಚೆಂ ಹಾಸ್ತೆಂ ಮುಕಾಮಳ್ ಉಬೆಂ ಆಸಾ.
ಹೆಂ ಮುಕಾಮಳ್ ಮ್ಹಜ್ಯಾ ಕಾಳ್ಜಾಚೆ ಗುಂಡಾಯೆ ಪರ್ಯಾಂತ್ ರೊಂಬೊನ್ ಉರ್ಲಾಂ!
***************************************************
ಕಾಳ್ಜಾಂತ್ ಭರ್ವಸ್ಯಾಚೊ ದಿವೊ ಪೆಟವ್ನ್ ದವರುನ್, ತೀನ್ ಮ್ಹಯ್‌ನ್ಯಾಂಥಾವ್ನ್ ದಿಸಾಕ್ ತೀನ್ ಪಾವ್ಟಿಂ ಪಮೇಲಾಚ್ಯಾ ಘರಾ ಮುಕ್ಲ್ಯಾನ್ ಮ್ಹಜಿ ಗಾಡಿ ಹಾಂವ್ ಆಶಾರ್ ಪಾಶಾರ್ ಕರ್ತಾಂ... ಪೂಣ್ ಏಕ್‌ಚ್ಜ್ ಏಕ್ ಪಾವ್ಟಿಂ ಪುಣಿ ತೆಂ ಮ್ಹಾಕಾ ಪಳೆಂವ್ಕ್ ಮೆಳನಾ. ಕೊಲೆಜಿಕ್‌ಯಿ ತೆಂ ವಚನಾ, ತರಿಪುಣ್ ಮ್ಹಜೊ ಭರ್ವಸೊ ಘಟ್‌ಮೂಟ್ ಆಸಾ. ತಾಕಾ ಪಿಸುಡ್ನ್ ಉಡಂವ್ಕ್ ಹಾಂವ್ ತಯಾರ್ ನಾ.
ಆತಾಂ ಮ್ಹಾಕಾ ಮ್ಹಜ್ಯಾ ಜಿವಾಚಿ ಖಂತ್ ನಾ. ಬಾಡ್ಯಾಚಿಯಿ ಆಶಾ ನಾ. ಆನಿ ಭೈರಾಚಿಯ್ ಪರ್ವಾ ನಾ. ಹಾಂವ್ ಭಾಗೊನ್ ಕಾಂಟೊ ಜಾಲಾಂ. ತೆಚ್‌ಪರಿಂ ಭೈರಾಯಿ. ತೊ ಫಕತ್ ಧಾಂವಜೆ ಮ್ಹಣೊನ್ ಧಾಂವ್ತಾ ಆನಿ ಹಾಂವ್ ಪಮೇಲಾ ಪರ್ತ್ಯಾಕ್ ಮ್ಹಾಕಾ ಪಳೆಂವ್ಕ್ ಮೆಳ್ತೆಲೆಂ, ಮ್ಹಜೆಲಾಗಿಂ ತೆಂ ಉಲಯ್ತೆಲೆಂ ಮ್ಹಳ್ಳಿ ಆಶಾ ಜಿವಿ ದವರುನ್ ಜಿಯೆತಾಂ!
ತೆಂ ಮ್ಹಾಕಾ ಮೆಳ್ತೆಲೆಂ.
ಖಂಡಿತ್ ಜಾವ್ನ್ ಮೆಳ್ತೆಲೆಂ.
ಹಾಸೊನ್, ಹಾಸೊನ್ ಮ್ಹಜೆಲಾಗಿಂ ತೆಂ ಉಲಯ್ತೆಲೆಂ!
ಸದಾಂಚೆಪರಿಂ ಆಜ್‌ಯಿ ಪಮೆಲಾಚ್ಯಾ ಘರಾ ಮುಕ್ಲ್ಯಾನ್ ಭೈರಾ ಪಾಶಾರ್ ಜಾತಾನಾ, ಮ್ಹಜಿ ದೀಶ್ಟ್ ನವೆಸಾಂವ್ ದೆಕ್ತಾ. ತ್ಯಾ ದೆಕುನ್, ಕೂಡ್ಲೆ ಲಗಾಮ್ ವೊಡುನ್ ಭೈರಾಕ್ ಹಾಂವ್ ರಾವಯ್ತಾಂ ಆನಿ ಸಕಯ್ಲ್ ಉಡೊನ್ ಗೇಟಿಲಾಗಿಂ ಪಾವ್ತಾಂ. ಪಮೆಲಾಗೆಲ್ಯಾ ವಿಸ್ತಾರ್ ಆಂಗ್ಣಾಂತ್ ಸಬಾರ್ ಲೋಕ್ ವಾವ್ರ್ ಕರ್ತಾ. ರಂಗಾಳ್ ಲುಗ್ಟಾಂಚೊ ಮಾಟವ್ ಉಬೊ ಜಾವ್ನ್ ಯೆತಾ ಆನಿ ವೀಜ್ ದಿವ್ಯಾಂಚಿ ಸಾಂಕಳ್ ತಾಂಚ್ಯಾ ಘರಾ ಭೊಂವ್ತಿಂ ಲಾಂವ್ಚೆಂ ಕಾಮ್ ಚಲ್ತಾ.
ಫುಲಾಂ ಝಾಡಾಂಕ್ ಉದಕ್ ಶಿಂಪುನ್ ಆಸ್ಚೊ ತೊ ಮ್ಹಾತಾರೊ ಮ್ಹಾಕಾ ಆತಾಂ ಮ್ಹಜ್ಯಾ ದೊಳ್ಯಾಂ ಮುಕಾರ್‌ಚ್ ಝಳ್ಕತಾ.
''ತುಮ್ಚ್ಯಾ ಘರಾ ಕಸಲೊ ಸಂಭ್ರಮ್ ಆಸಾ?'' ತಾಚೆ ಜಾಪಿಕ್ ಹಾಂವ್ ಆತುರಾಯೆನ್ ರಾಕ್ತಾಂ. ತರ್‌ಯಿ, ತೊ ತಾಚೆಂ ಪರ್ಕಟೆಂ ತೋಂಡ್ ಉಗ್ತೆಂ ಕರುಂಕ್ ದರಬಸ್ತ್ ವೇಳ್ ಕಾಡ್ತಾ ಆನಿ ಸವ್ಕಾಸಾಯೆನ್ ಅಶೆಂ ಮ್ಹಣ್ತಾ, ''ಆಮ್ಚೆ ಬಾಯೆ ಪಮೆಲಾಕ್ ಕಾಜಾರ್ ಆಸಾ!''
'ಖಾಂದಿ ಖುರಿಸ್' ಕಥಾ ಸಂಕಲನಾ (೨೦೧೫) ಥಾವ್ನ್, ವಿಂಚೊವ್ಣ್
Tags:
Valley Vagga, Horse Cart, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
0 Comment/s.